Proverbios 4 - La'aqtaqa Ñim Lo'onatac 'Enauacna 2013

Nqataxac da yaqto' qanayectegue da no'on ñecỹaxac

¹ Qami' ñalaqpi, ỹataqta qana'axaỹaxañiỹalo qome naua lapaxaguenataxanaxaco ca qarta'ai, qataq qaloitegueta yaqto' qauauattoñi da naỹaanataxanaxac.

² Aỹem, qami' sanema na ỹataqta no'on ỹapaxaguenataxanaxacpi, qaq saishet qome da qoquiỹa'ai ne'ena iqataxacpi.

³ Cha'aye aỹem nataqa'en huo'o co'ollaxa so ita'a, qataq aso ỹate'e ỹataqta aỹem lauotaxat co'ollaxa,

⁴ so ita'a naxa da aỹem ỹapaxagueetac nache, 'eeta': «ỹataqta 'oxotoiguilo qome añi 'arquiyaqte naua ỹa'aqtaqa, qataq 'aualaxagueta naua ỹamaxasoxonaxaco yaqto' nache 'eetai' da 'anca'altauec.

⁵ 'Auaconeguet qome da naỹaanec, qataq da naỹaanataxanaxac, qataq saishet da 'aucoua'aisalo naua ỹa'aqtaqa, qataq saishet da qoca'aisalo naamaye.

⁶ 'Auauotec qome de'era naỹaanec, qataq saishet da qoca'ai damaye yaqto' damaye 'am npaxattalec.

⁷ 'Aua'auaxaañi qome da 'auaconeguet da naỹaanec, qataq ỹactec 'anqa'en da 'auaconeguet da naỹaanataxanaxac.

⁸ Qataq 'auauotec qome da naỹaanec, yaqto' damaye ỹo'ot da 'am 'amaqtaqaic, ỹataqta 'ansoxouo qome damaye yaqto' ỹo'ot da 'ayo'oxoyec,

⁹ damaye ỹanagui na 'arqaic ca 'onaxaic llo'oxoraxat, qataq 'am ỹaatem da ỹataqta no'on 'ayo'oxoyec.»

¹⁰ 'Am ỹalcolec, 'ana'axaỹaxanalo qome naua ỹa'aqtaqa, qataq 'auaỹamaxatteque yaqto' nquictrauec naua vi'iye da 'anachaalataxac.

¹¹ Aỹem 'am sachaxaategue da llec de'era naỹaanec, yaqto' qoquetegue ñaqa'en da no'on ñecỹaxac,

¹² qaq da qoquetegue damaye nache qaica ca nqanaxattac da 'arqauaxac, qataq saishet da huo'o ca 'auquia'aqaisop da 'anqalgoqta.

¹³ 'Anasoqchiyiñi qome naua ỹapaxaguenataxanaxaco, qataq saishet da qoca'aisalo naamaye, 'auaỹamaxatteque cha'aye nachenaua nam ỹo'o't da 'arca'alaxa.

¹⁴ Saisheto' da 'auca'ategue da lqauaxac na 'etaxaloxoicpi, qataq saishet da qoquegue da qauem lataxac.

¹⁵ 'Avita'a qome da qoquegue so llec namayepi, qataq 'auỹoolec qome somaye nacherata da 'anapactalec,

¹⁶ cha'aye namayepi saishet da lactapiguiñi da sa ỹo'ot ca qauem, qataq sa do'oche da saxanaxa da ỹo'otec ca qauem ca lỹa.

¹⁷ Namayepi aloq na qauem qataq na laquip da sarecheraqtaxan.

¹⁸ Da nqa'aicỹaxac nam no'on da lataxac, qalaq 'eeta'am na le'eraxa ca dalaxaic na'a'q, damaye nache nquictauec na le'eraxa, choche ivitta'a da ỹataqta yo'oqchiguiñi.

¹⁹ Qaq so nqa'aic na qauemaicpi qalaq napalñi, qataq saishet da ỹaỹaten ca quia'aqaisop.

²⁰ 'Am ỹalcolec, 'aloteleguete qome naua ỹa'aqtaqa, qataq 'ana'axaỹaxaachiguilo naua shena'ape.

²¹ Saishet qome da sa 'auloleguete naamaye, ỹataqta 'oxotoiguilo da 'antoonaxac.

²² Cha'aye naamaye ỹanem da lca'alaxa ca ỹanatalo, qataq nataren 'enauac da lo'ocỹaxac.

²³ Qataq ỹataqta 'antela'a da 'antoonaxac, cha'aye damaye qaica ca lỹa 'eeta'am, damaye nache chegaqaigui da achaalataxac.

²⁴ 'Avito'o' qome da qonapec ca saq'en, qataq 'axanec qome da natenataxanaxac.

²⁵ Nacherato' da ỹalemaqtec 'anqa'en da 'armeenaxanaxac, qataq 'alotegue da 'ata'ague.

²⁶ Qataq 'alochiguinguilo naua piguiñalo naua 'arapia'ate, qataq 'auaỹamaxatchiguiñi 'enauac da 'arqauaxac.

²⁷ Saishet da 'axanec so 'anqa'aic, qataq 'avita'a da qoquegue ca qauem.