Oseas 3 - La'aqtaqa Ñim Lo'onatac 'Enauacna 2013

So Oseas qataq aso 'alo quisheguetaxai

¹ Ñim Nataxala' qaltaq aỹem 'enapega, 'eeta': «'Aue qojec, nache 'aỹa'anem da 'arauotaxanaqtaic aca 'alo quisheguetaxai, maye lauatapiguiñi' nam nauochaxauapi. Cha'aye 'era da 'eetec Ñim Nataxala' da ỹauotec na Israel le'ecpi, na'aictaxa da ỹe'eguelaxa da ỹa'amaqteetac na ỹaqa'a atamnaxala'pi, qataq da naman da chectac anam nqaxaỹaqta uvapi maye qoỹanot naxa namayepi.»

² Huaña, nache sesheenaxana aso 'alo, nache aso lasheue ivi' quince aso lcatpiole ana plata, qataq so trescientos treinta kilos na cebada.

³ Nache shenapega asomaye sheeta': «Nagui, nache qaỹoqtrec naua na'axa'te da 'am ỹalamaqte, nache saishet da 'anquishishi qataq saishet da 'arauañi' ca lỹa ỹale, qaq aỹem nataqa'en ỹataqta 'am ñalemaqte' da 'am ihua qome.»

⁴ Cha'aye qaỹoqtrec qome caua na'axa'te da na Israel le'ecpi, qaica ca lta'a, lataxala', qataq qaica ca lachetaqtaxanaxat, qataq aca lca'atoxonaxalatepi qataq qaica ca ltogue lapoxot, qataq ca natamnaxala' na maiche llalaqpi.

⁵ Qaq qom ime de'era, nache na Israel le'ecpi ñe'eguelaq qome, nache nmitaique Ñim Nataxala' maye Natamnaxala', qataq so David maye lta'a namayepi. Qaq que'ecaua pa'atrec na'axa'te, nache namayepi ỹataqta huo'o naq 'enec naqa'en Ñim Nataxala', qataq da lqouagaxanaqtaic Ñimaye.