Números 31 - La'aqtaqa Ñim Lo'onatac 'Enauacna 2013

¹ Qaq Ñim Nataxala' 'enapega so Moisés, 'eeta':

² «'Apalaique qome ca lvi' na Israel le'ecpi, nache 'analaate' na madianiitapi, qaq qom ime, nache 'am qojec da 'aualegoigui so hua'au 'arhuo' le'ecpi.»

³ Nache so Moisés 'enapega co'ollaxa so nhuo' le'ecpi, 'eeta': «Qanaỹamaxache qome, da yaqto' qanalaachi, qauloquiaxañi na lma' ye Madián da qaupalỹaique ca lvi' Ñim Nataxala'.

⁴ Nache ñi 'oonolec na maiche nalamaxat nhuo' le'ecpi ỹaconeua'a ca mil ỹalleppi da ỹamaq da nalat.»

⁵ Qaq 'era da 'eetec so Israel le'ecpi da iỹotauga so alleppi, nache 'enauac so maiche nalamaxat nhuo' le'ecpi da ỹaconeua'a so mil ỹalleppi, qaq da ima'a't nache ivi' doce mil ỹalleppi so jec da nalat, na'atchigui na lo'ogoxonaxatpi.

⁶ Nache so Moisés ỹamaq somayepi da nalat, nnaictague' naqa'en so Finés, som llalec so ntaxaỹaxanaxanec Eleazar, qaq somaye ỹachetac so nogoxoshetpi maye sa qaishetapec, qataq aso nasheerepi da yaqto' qaỹamaq da nalat so alleppi.

⁷ Nache somayepi nalaate' co'ollaxa so madianiitapi, nache nmatchiguiñi so ỹalleppi, qaq ipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.

⁸ Qaq nataqa'en ỹalaua't soua cinco nta'al ye Madián, Evi, Requén, Sur, Jur qataq Reba, qataq nataqa'en ỹalauat so Balaam, som llalec so Beor.

⁹ Nache so Israel le'ecpi ỹaconeua'a da ỹauec so 'alpi, ñaqpiolec qataq deuotaxanec so na'atetpi huacapi, qataq qaguetapi, qataq so logoxoshetpi maye huo'o da lashiichiỹaxac,

¹⁰ qataq ỹavigaxat 'enauac so lalamaxat huaqta'a't nỹecpi maye ỹotta'a't naua nañalo, qataq so no'onaxapi maye lalamaxatpi somayepi.

¹¹ Qaq co'ollaq ime, nache laỹona't 'enauac se'eso loxonecpi somayepi, shiỹaxauapi qataq so shiguiỹacpi,

¹² nache se'eso loxonecpi ỹauegueua'a co'ollaxa so Moisés, qataq so ntaxaỹaxanaxanec Eleazar, qataq so nhuo' Israel le'ecpi maye netaña co'ollaxa ye nalochiguiñi 'alhua ye Moab, maye sa qaỹapeque ye Jordán qataq nalotta ye Jericó.

¹³ Nache so Moisés, Eleazar qataq 'enauac so lataxala'pi so maiche nhuo' le'ecpi, ca'ata'aguet co'ollaxa somayepi, huaña so pa'auec som qanayeutaña nanataqa'.

¹⁴ Qalaxaye so Moisés, dalemataỹa co'ollaxa so nataxala'pi maye ilotague' so mil, qataq so cien alleppi, maye chegaqa'a so alaataxac,

¹⁵ nache, 'eetega 'eeta': «¿Ta'ainco' da nca'altauec qanqa'eñi na 'alpi?

¹⁶ Ye nachana anamayepi ana ỹalaxaguet co'ollaxa da la'aqtac so Balaam, nache ỹo'otec na Israel le'ecpi, da dataỹa'aguet Ñim Nataxala', co'ollaq huaña ye Baal Pegor. Ỹoqo'oye Ñim Nataxala' iuaxanec co'ollaxa so nleuaxa na Israel le'ecpi.

¹⁷ Qaq ỹoqo'oye nagui qaualauache 'enauac na ñaqpiolec, qataq na 'alpi maye mashe ỹauana ca ỹale.

¹⁸ Qalaxaye na 'alpi maye ñaq saxanaxa da ỹauana ca ỹale, nache qauacoñiỹa, saishet da qaualauache.

¹⁹ Qataq 'enauac de'era qoñiita da huo'o ca dalaataxan, huo'otaq ỹasheltapigui ca leuaxaic, nache pa'atauga qome qanqa'eñi na pa'auec na qoñiitaña nanataqa' ivittrec caua siete na'axa'te. Qaq ca na'a'q tres, qataq ca na'a'q siete, nache qami' qataq na qoroxoñiqui, qanqui'itaxacheeta qome.

²⁰ Nataqa'en qaỹoita qome 'enauac na nogoxotpi, qataq na nogoxot lo'oc, qataq na quetaq laue, huo'otaq 'epaq.»

²¹ Huaña, nache so ntaxaỹaxanaxanec Eleazar, da'aqtaxanem 'enauac so alleppi maye chegaqa'a co'ollaxa so alaataxac, 'eeta': 'Era da lataxac da namaxasoxonaxac maye Ñim Nataxala' ỹanem co'ollaxa so Moisés, 'eeta':

²² Na nogoxoshetpi oro, plata, bronce, lcat qataq na quiguiñi,

²³ 'enauac na lcat maye nalota'aguet na le'eraxa ca norec, nache qaỹasaxangui ca le'eraxa ca norec namayepi, da yaqto' qui'itta qanqa'en, qalaxaye nataqa'en iuen da qaiỹoxona ca 'etaxat yaqto' iqashelgaxatta. Qaq ca nogoxoshetpi maye sa nalo'oguet ca le'eraxa ca norec, nache qaỹauota'a ca 'etaxat da qaiỹo da yaqto' qui'itta.

²⁴ Nataqa'en qauỹoi' qome naua qorogolli' ca na'a'q siete, yaqto' qami' qui'itte'. Ime nache ishet da qauanaiua'a na nanataqa' maye qanayeuta'a.

Da 'eetec da qanaloqnec ca nhuotaxanaxatpi

²⁵ Ñim Nataxala' 'enapega so Moisés, 'eeta':

²⁶ «'Am 'antaune' qome so ntaxaỹaxanaxanec Eleazar, qataq na lataxala'pi, na maiche nalamaxat nhuo' le'ecpi. Da qanaloqchiñi na shiỹaxauapi, qataq na shiguiỹacpi, maye qarhuotaxanaxache, chegaqaigui na madianiitapi

²⁷ nache 'aucolaxachigui qome ne'ena nhuotaxanaxatpi, dos 'anqa'en ca laponqa'ate, nache ca 'oonolec naponec 'aỹa'anem nam jec co'ollaxa da nalat, qaq ca lỹa naponec nache 'aỹa'anem ne'ena maiche nalamaxat nhuo' le'ecpi.

²⁸ Qataq 'auỹotauga qome ñi 'oonolec na quinientos nam taỹot na alleppi maye jec co'ollaxa da nalat da yaqto' ỹalamaxat 'anqa'en: shiỹaxauapi, nauegaxanaxala' huacapi, 'ashenapi, qataq ana qaguetapi,

²⁹ nache 'aỹa'anem so ntaxaỹaxanaxanec Eleazar que'eca Aỹem qoỹanem da ỹalamaxatpi.

³⁰ Qataq 'auỹotauga qome ñi 'oonolec na cincuenta na taỹot na laỹe Israel le'ecpi: shiỹaxauapi, nauegaxanaxala' huacapi, 'ashenapi, qataq ana qaguetapi, qataq 'enauac na laỹe shiguiỹacpi. Nache 'aỹa'anem na leviitapi, cha'aye namayepi nachena na ilotague' ñi npe'l maye lalamaxat Ñim Nataxala'.»

³¹ Nache so Moisés qataq so Eleazar ipacchiguilo da lamaxasoxonaxac Ñim Nataxala' maye ỹamaxalec co'ollaxa so Moisés.

³² Nache se'eso nhuotaxanaxatpi maye chegaqaigui so alaataxac, ivi' seiscientos setenta y cinco mil aso qaguetapi, qalaxaye saishet da qanaloqteneuo som ỹaconapi co'ollaxa se'eso alleppi,

³³ qataq setenta y dos mil so nauegaxanaxala' huacapi,

³⁴ sesenta y un mil so 'ashenapi,

³⁵ qataq treinta y dos mil so qa'ampi maye saxanaxa da ỹauana ca ỹale.

³⁶ Qaq so taỹot so alleppi, ivi' trescientos treinta y siete mil quinientos qaguetapi,

³⁷ qaq asa'aso qoỹanec co'ollaxa, nache qaiỹotauga aso seiscientos setenta y cinco qaguetapi da lalamaqte Ñim Nataxala',

³⁸ qaq so treinta y seis mil nauegaxanaxala' huacapi, qaiỹotauga so setenta y dos da lalamaxat Ñim Nataxala',

³⁹ qaq so treinta mil quinientos 'ashenapi, qalaq qaiỹotauga so sesenta y uno da lalamaxat Ñim Nataxala',

⁴⁰ qaq aso dieciséis mil qa'ampi, qaiỹotauga aso treinta y dos da lalamaqte qanqa'en Ñim Nataxala'.

⁴¹ Nache so Moisés ỹanem so ntaxaỹaxanaxanec Eleazar, som qaiỹotaugapi da lalamaxat Ñim Nataxala'. Nache ipacchigui qanqa'en da lamaxasoxonaxac Ñim Nataxala', maye ỹamaxalec co'ollaxa so Moisés.

⁴² Qaq so laỹe se'eso nhuotaxanaxatpi, maye so Moisés iỹotauga co'ollaxa da taỹot naqa'en so laỹe Israel le'ecpi,

⁴³ ivi' trescientos treinta y siete mil quinientos aso qaguetapi,

⁴⁴ treinta y seis mil so nauegaxanaxala' huacapi,

⁴⁵ treinta mil quinientos so 'ashenapi,

⁴⁶ qataq dieciséis mil so qa'ampi.

⁴⁷ Nache se'eso taỹot co'ollaxa so Israel le'ecpi, so Moisés nqateua'a ñi 'oonole na cincuenta, nache 'ena'am so shiỹaxauapi qataq so shiguiỹacpi, nache ỹanem so leviitapi maye nacheso so ilotague' so npe'l maye lalamaxat Ñim Nataxala', nache ipacchigui naqa'en da lamaxasoxonaxac Ñim Nataxala'.

⁴⁸ Qaq so nataxala'pi maye ilotague' so mil qataq so cien alleppi, taua'a co'ollaxa so Moisés,

⁴⁹ nache, 'eeta': «Qomi' ñaloqtenaqtega't 'enauac so alleppi maye seloqtague'pi, qalaq somayepi nalota't.

⁵⁰ Ỹoqo'oye ñi 'oonolec qomi' sanaxauo 'enauac nam saconaxa co'ollaxa: oro, nhuaxashecpi, chiguishaqtepi, nshetepi, nqolacpi qataq na laỹe 'otaxatpi da sanqot Ñim Nataxala' da qarachetaqtaxanaxat da yaqto' qaỹapalaxat na qarasouaxashetpi.»

⁵¹ Nache so Moisés qataq so Eleazar ỹaconeguet co'ollaxa so 'otaxatpi oro maye lachetaqtaxanaxatpi somayepi.

⁵² Nache so nachetaqtaxanaxat oro maye ỹaneuo se'eso lataxala'pi so mil qataq so cien alleppi, ivi' ciento ochenta y cuatro kilos,

⁵³ cha'aye ñi 'oonolec se'eso alleppi huo'o co'ollaxa so maiche lla'ac co'ollaq nhuo' so nalattague'pi.

⁵⁴ Qaq so Moisés qataq so ntaxaỹaxanaxanec Eleazar ỹaconeguet co'ollaxa so oro maye lachetaqtaxanaxatpi so nataxala'pi, nache iroua'a so npe'l da yaqto' Ñim Nataxala' saishet da icoua'ai na Israel le'ecpi.