Lucas 17 - La'aqtaqa Ñim Lo'onatac 'Enauacna 2013

Da ivireguet ca shiỹaxaua da ỹo'otec da ca'ai da lpi'iỹaxac ca lỹa

¹ Nache So Jesús 'enapegalo soua lapaxaguenataqa, 'eeta': –Qalota na lataxacpi ana 'alhua, da ỹo'oteguet da na shiỹaxauapi sa ỹalaxaguet Ñim Lo'onatac 'Enauacna. Qaq damaye, nache 'eetai' qome. Qalaxaye, ¡ỹataqta qauem da taỹa'ague ca shiỹaxaua maye ỹo'oteguet da huo'o ca lasouaxashet ca lỹa!

² Da huo'o ca ỹo'oteguet ca 'oonolec nam saq 'amaqtaqpiolec maye Aỹem ca'attague' da saq ỹalaxaguet naqa'en Ñim Lo'onatac 'Enauacna, nache camaye ỹataqta ỹactec da nque'eenaxac, saq 'ena'am da qaicoñero'ot na lqosot ca coma'. Ime, nache qaỹasaxangui aso auaxai.

³ Qaq ỹoqo'oye, ¡qanchelỹañi qome da huo'o ca qauo'oche! Ca 'anauochaxaua qom huo'o ca 'am ỹo'otec sa ỹaỹamaxañi, qaq no'on da 'auachaxana cam 'am ỹo'otec camaye. Qaq da 'am iỹaxanot da 'auchoxoren, nache 'am no'on da 'auchoxoren.

⁴ Qaq na'aictaxa da ivi' ye 'oonolec na'a'q da qalota na 'am ỹo'otec sa ỹaỹamaxañi, qaq camaye da 'am iỹaxanot da 'auchoxoren, qaq 'am no'on da 'auchoxoren.»

Da 'enec da npi'iỹaxac

⁵ Nache soua lamaxa'she 'enapegalo' So Jesús, 'eetra': –'Am Qarataxala', 'anquigaxatsheguem qome da qarpi'iỹaxac.

⁶ Nache So Qarataxala' 'enapegalo' soomaye, 'eeta': –Qami' da huo'o ca qarpi'iỹaxaqui, na'aictaxa da lcatam acatai' ala maye ỹataqta qapio'ole ana le'enaxat mostaza, qalaxaye ishet da qoñiỹapega ara'ara qo'oipaq late'erai, qoñiita': «Qoca'ai ne'ena qonetaña, ime, qaq qonangui aso auaxai», qaq ara'ara qo'oipaq ishet da qami' ỹalaxagueta.

Da lo'onataxanaxac cam qaỹamaqtac

⁷ Da huo'o ca 'oonolec da qoñiita da huo'o ca l-latac, qaq camaye da huo'otaq chegaqauga na no'onaxa da huo'otaq mashe imat da na'attapiguisheguem na 'alhua, huo'otaq da ilotague' cam 'atetpi, qaq ¿'am peta'a ishet da qonapega da qoneta': «'Aỹala, 'anso'ooñi, 'auque'e?»

⁸ 'A'i, saishet, nda'a't da qonapega, qoneta': «Ña 'anaỹamaxat qome, aỹem qouapegue', 'auo'ot ca anoq. Nato' qom ime da iquia'axac qataq da ñeỹomaxac, nache ishet da 'am 'auque'e.»

⁹ Qaq ¿peta'a ishet da 'aỹa'anem da 'ana'achec que'eca 'arlatac qom mashe imat cam 'auamaxalec? 'A'i, saishet.

¹⁰ Qaq nache 'eetec qami' da qaumache 'enauac nam qami' ỹamaxaleguete Ñim Lo'onatac 'Enauacna, nache saishet da qauacheetaique da qami' ỹanema ca na'achec. Nachaqrata da qoñiita': «Qomi' choche qomi' namaxa'she, nachaqrata da so'otaq qataq sepagaqtelec dam qanamaxasaguec.»

So Jesús natare'n soua diez ỹale't maye nchega na lo'oc

¹¹ Qaq co'ollaq mashe jec So Jesús da taigue da Jerusalén, nache taalec yem 'alhua maye huaigui ye Samaria qataq ye 'alhua Galilea.

¹² Qaq co'ollaq ivita som naña som saq 'amaqtaq nỹecpiolec, nache ỹa'axasoxootegueta Somaye soua diez ỹale't, maye nchega na lo'oc, qalaxaye qaỹata'a ca huetra'a soomaye,

¹³ co'ollaq ỹa'ala'q, 'eetra': –¡'Am Jesús maye 'Am Napaxaguenataxanaq, qomi' 'auchoxore'n qome qomi' 'anatare'n!

¹⁴ Nache So Jesús co'ollaq ila'alo soomaye, nache 'enapegalo, 'eeta': –Qauesomiỹa, qanachaxañeeua'a cam ltaxaỹaxanaxanecpi nam shiỹaxauapi da qaitaxaỹapegue' Ñim Lo'onatac 'Enauacna. Qaq co'ollaq quetrague' soomaye ca nqa'aic, nache maiche no'oite'.

¹⁵ Nache so 'oonolec soomaye co'ollaq ila'a da mashe no'oita na lo'oc, nache ñe'eguelaq, nache ỹo'oxoreetac Ñim Lo'onatac 'Enauacna, ỹataqta ỹa'alaqtai'.

¹⁶ Nache ỹa'aroto naua l-llectel So Jesús, ỹataqta iviraxata'aguet naqa'en na latap na 'alhua, nache ỹaatacot da na'achec Somaye. Qaq se'eso ỹale, somaye lma' ye Samaria.

¹⁷ Nache So Jesús 'enapeco': –¿Saisheto' da diez soua no'oite' qanqa'en na lo'oc? ¿Ca huetra'ague caua lỹa't?

¹⁸ Cha'aye yem ya' chegaqa'a ca lỹa 'alhua, ¿peta'a yemaye 'oonolec da ñe'eguelaq da ỹanot da llo'oxonnataxanaxac Ñim Lo'onatac 'Enauacna?

¹⁹ Nache 'enapega so ỹale, 'eeta': –Qoñisheguem qojec. Mashe 'am no'oita, cha'aye 'aua'amqaanataxan.

Da lviraxac da lo'onataxanaxac Ñim Lo'onatac 'Enauacna

²⁰ Nache nam chegaqaigui na fariseopi inattac So Jesús, da chaq lagui qaq ivita ca laloqo' da Ñim Lo'onatac 'Enauacna da do'onataxan. Nache Somaye ỹasat, 'eeta': –Ca lviraxac da lo'onataxanaxac Ñim Lo'onatac 'Enauacna, camaye saishet da qaila'a.

²¹ Qataq saishet da qoỹeeta': «¡'Ena namaye!» huo'otaq da qoỹeeta': «¡'Era cha'a!» Cha'aye da lo'onataxanaxac Ñim Lo'onatac 'Enauacna mashe qami' huetanguilo.

²² Nache 'enapegalo soua lapaxaguenataqa, 'eeta': «Huo'o qome ca na'a'q, qaq qami' huo'o da qaryaqai da qauloỹa'a ca laloxoqui maye huetoigui da Aỹem, maye Aỹem Shiỹaxaua Llalec ñachaxan, qalaxaye saishet qome da qauloỹa'a.

²³ Huaña qome, nache huo'o ca 'eeta': ‹¡'Ena namaye, hueta'a ne'ena!› huo'otaq 'eeta': ‹¡'Era damaye, hueta'ague de'era!› Qalaxaye saishet qome da qoqui da qauca'acheegue.

²⁴ Cha'aye Aỹem Shiỹaxaua Llalec qom ñe'eguelaq, nache 'enauac da Aỹem qaila'a, 'eeta'am na nqashelgaxa da nqashilliguiñi, nache imata 'enauac na piguem.

²⁵ Qalaxaye hua'auñi qome da saigui na qalota ñeque'eenaxaguesat, qataq saishet qome da Aỹem qaỹaconeguet, saishet da Aỹem ỹaconeguet nam shiỹaxauapi maye huetaigui nagui ne'ena na'a'q.

²⁶ Qaq Aỹem Shiỹaxaua Llalec qom ñe'eguelaq, nache na shiỹaxauapi da lataxac, 'eeta'am co'ollaq so na'a'q maye huetaigui so Noé.

²⁷ Somayepi deque'etac qataq nỹomtac, qataq huarootega't qataq huetapegue' da laronaxac na llalpi, choche ivitta'a so na'a'q co'ollaq so Noé inoxonoigui aso nnotaxaqui maye quiguingui na 'etaxat. Nache anac so auot, huaña, nache ileu 'enauac somayepi.

²⁸ Qaq nache 'eetec nataqa'en soua vi'iye maye huetaiguilo co'ollaxa so Lot: so shiỹaxauapi deque'etac qataq nỹomtac qataq maiche nmeetega't, danaxaatac qataq ỹo'otta'ape naua lma'ate.

²⁹ Qalaxaye co'ollaq ca'ai so Lot ye Sodoma, nache anac so norec qataq so quiquiaxaraic chegoqo'ot na piguem, nache ỹalauat 'enauac somayepi.

³⁰ Qaq 'era qome da sheetec Aỹem Shiỹaxaua Llalec, qom ivita que'eca na'a'q da ñachaxan.

³¹ Nache que'eca na'a'q da huo'otaq huo'o ca pa'atasheguema na l-laq ca lma', qaq saishet da huenotec da nqatec na logoxotpi maye pa'ataigui ca lma'. Qataq da huo'otaq huo'o ca huetauga na no'onaxa, qaq camaye saishet da ỹe'eguelaxaua'a ca lma'.

³² Qaq qauennache qome da 'eetec co'ollaxa aso lhua so Lot.

³³ Cha'aye ca nshetaique da maiche nca'alaxatec da nachaalataxac, nache camaye deqat. Qalaxaye cam iqataqchet da nachaalataxac souaxat Aỹem, nache camaye qanca'alaxatec.

³⁴ Qaq que'eca pe maye huetoigui da ñevi', nache huo'oi qome caua nauataña't, qaq 'oonolec qome ca sauec caamaye, qaq ca lỹa qalaq ño'onaxatañi.

³⁵ Qataq huo'oi qome caua dos 'alol da'araxaata'ape, nache 'oonole qome aca sauec, qaq aca lỹa qalaq ño'onaxatañi.

³⁶ Qataq huo'oi qome caua dos shiỹaxau' huetrauga na no'onaxa, nache 'oonolec qome ca qaỹauec, qaq ca lỹa qalaq qano'onaxatañi.»

³⁷ Nache co'ollaq hua'axaỹa de'era soua napaxaguenataqa, nache inattrac, 'eetra': –«'Am Napaxaguenataxanaq, ¿chaq hua'ague qome de'era?» Nache Somaye 'eeta': –«Qomye cam hueta'ague ca leuaxaic, qaq nacheca ca huaña da lapona't na teguesanpi.»