Levítico 11 - La'aqtaqa Ñim Lo'onatac 'Enauacna 2013

Na shiguiỹacpi maye qanallec qataq na sa qanallec

¹ Nache Ñim Nataxala' 'enapega so Moisés qataq so Aarón, 'eeta':

² «Qoñiỹapega qome na Israel le'ecpi, qoñeeta': 'enauac na shiguiỹacpi maye huetalec ana 'alhua ishet da qollequi,

³ ca ishet da ye'eguelaqtaxan qataq ca colaxara'ache naua nna'ache,

⁴ qalaxaye saishet qome da qollequi ne'ena shiguiỹacpi: Ana nauanaxanaxa maye ishet da ye'eguelaqtaxan qalaxaye saishet da colaxara'ache naua nna'ache. Cha'aye saishet da qui'itta.

⁵ Ana soxona maye ishet da ye'eguelaqtaxan, qalaxaye saishet da colaxaguilo naua nna'ache. Cha'aye saishet da qui'itta.

⁶ Ana lerma maye ishet da ye'eguelaqtaxan, qalaxaye saishet da dos naua lqona. Cha'aye saishet da qui'itta.

⁷ Ana cos maye colaxara'ache naua nna'ache, qalaxaye saishet da ye'eguelaqtaxan. Cha'aye saishet da qui'itta.

⁸ Qaq saishet qome da qollequi ca lapat ne'ena shiguiỹacpi, qataq saishet da qaupocheeua'a da mashe ileu. Cha'aye saishet da qui'itta.

⁹ Qaq na 'etaxat le'ecpi, qalaxaye ishet da qollequi na huo'oi naua laua'tole qataq ana lso, auaxai le'ec, huo'otaq tala le'ec.

¹⁰ Qalaxaye ca qaicaua caua laua'tole qataq aca lso, camaye saishet da qollequi, na'aictaxa da auaxai le'ec, huo'otaq tala le'ec, huo'otaq ca qa'em le'ec maye hualectapigui', huo'otaq ca huo'oi naua lapia'ate, qapio'olec, huo'otaq lta'araic,

¹¹ Qataq saishet da qanallequi ca lapat namayepi, cha'aye saishet da qui'itta, nache 'ena'am da mashe leuaxaic.

¹² Qaq 'enauac na huetangui na 'etaxat maye qaicaua naua laua'tole qataq ana lso, nache qauqaiquiỹa qome.

¹³ Qaq na maỹopi maye saishet da qollequi qome nacherata da qauqaiquiỹa: na ỹanegralo, huole, qataq na vi'ic,

¹⁴ qoỹo lo'o' qataq 'enauac na ỹotta'a't maỹopi maye dequi'iỹapec,

¹⁵ qataq na ỹotta'a't qañaxaye'pi,

¹⁶ mañec, chiyet, taqaqole, qataq ana ỹotta'a't qoỹo nỹec lashole,

¹⁷ ana huoqo', lliquiaxai, tetaxañi,

¹⁸ huategra, lesoxo'n, teguesan,

¹⁹ huaqap, togoxosoxonaq, micai, qataq na ỹotta'a't 'altolecpi.

²⁰ Qataq 'enauac na ato' le'ecpiolec maye ishet da huaỹo, qataq na petañi, namaye qauqaiquiỹa qome,

²¹ qalaxaye ishet da qollequi nam huo'oi naua laua't, nam petañi, qataq nam huo'oi naua lasotaxanaqte:

²² pelgaxanaq, quiñite, milec, qataq ana ỹotta'a't shiiquioxoipi.

²³ Qalaxaye na laỹe ato' le'ecpiolec maye ishet da huaỹo qataq petañi, qauqaiquiỹa qome.

Na sa qaỹashen da qaỹasheleua'a

²⁴ Qaq 'ena na saishet qome da qami' qui'itte' naqa'en: Ca shiỹaxaua da ỹasheleua'a ca shiguiỹac leuaxaic, nache camaye iviraigui ca pe da saishet da qui'itta.

²⁵ Qaq da huo'o ca ỹacoosop ca 'oonolec na shiguiỹacpi da mashe leuaxaic, nache saishet da qui'itta iviraigui ca pe. Ỹoqo'oye camaye iuen da iỹoi' caua alogo.

²⁶ Qataq 'enauac na shiguiỹacpi maye saishet da colaxara'ache naua nna'ache, qataq saishet da ye'eguelaqtaxan, nataqa'en saishet da qui'itta. Qaq ca shiỹaxaua da ỹasheleua'a camaye, nache nataqa'en saishet da qui'itta.

²⁷ Nache 'enauac na shiguiỹacpi maye cuatro naua lapia'ate, qalaxaye dapiaxanalo naua lapia' lavi'illi, namayepi nataqa'en saishet da qui'itta. Qaq ca shiỹaxaua da ỹasheleua'a ca mashe leuaxaic ne'ena shiguiỹacpi, nache nataqa'en saishet da qui'itta iviraigui ca pe.

²⁸ Qaq ca ỹacoosop ca 'oonolec ne'ena shiguiỹacpi da mashe leuaxaic, nache nataqa'en saishet da qui'itta iviraigui ca pe. Qaq ỹoqo'oye camaye iuen da iỹoi' caua alogo.

²⁹ Qaq 'ena na shiguiỹacpiolec maye saishet da qui'itta: 'al, chegoxonaxa, qataq na 'enauac ỹotta'a't maye hualectapigui',

³⁰ qataq nache 'eeta'am na da'ailo'oc, que'ereguesaq, 'aqtaqlai', qataq ana maishe'.

³¹ Qaq 'ena na shiguiỹacpiolec maye saishet da qui'itta. Qaq ca shiỹaxaua da ỹasheleua'a ca mashe leuaxaic ne'ena shiguiỹacpiolec, nache camaye saishet da qui'itta iviraigui ca pe.

Qaivita'a da qanhuoiguet ca shiguiỹac maye saishet da qui'itta

³² Qaq ca mashe leuaxaic ne'ena shiguiỹacpiolec maye saishet da qui'itta, da talec ca nogoxoshet 'epaq, nogoxot, nogoxoshet maye chegaqaigui na lo'oc na shiguiỹac, huo'otaq ca machaqca na no'onataxanaxatpi, nache camaye saishet da qui'itta iviraigui ca pe, qaq ỹoqo'oye camaye iuen da qaisheraxangui ca 'etaxat, qaq da ime nache qaltaq qui'itta.

³³ Qaq da huo'otaq tangui aca naco'oña 'alhua, nache 'enauac ca huetangui acamaye saishet da qui'itta. Qaq ỹoqo'oye acamaye iuen da qailaxachigui.

³⁴ Qaq ca le'ec 'etaxat acamaye da talec ca nallec, nache que'eca nallec saishet da qui'itta, qataq ca 'etaxat maye huetagui acamaye, saishet da qui'itta.

³⁵ Nache 'enauac ca talec que'eca shiguiỹacolec leuaxaic, na'aictaxa da qatelaxanaxaqui huo'otaq norec lma', nache saishet da qui'itta. Ỹoqo'oye camaye iuen da qailaxachigui. Cha'aye saishet da qui'itta.

³⁶ Nachecata ca 'etaxat maye npaxaatasheguem, huo'otaq aca ñi'illoxoqui maye qaỹachegoxottapiguingui ca naquip maye qui'itta, acamaye saishet da na'axat ca le'ec, qalaxaye na nogoxoshetpi da huo'o ca nhuoiguet ca shiguiỹac leuaxaic, nache camaye saishet da qui'itta.

³⁷ Qaq que'eca shiguiỹacolec leuaxaic, da talec aca nañiguishe ala maye mashe huotaique qoỹaañi, nache acamaye nache 'eetai' da qui'itta.

³⁸ Qalaxaye da mashe qaỹapapiaxat aca'aca nañiguishe ala, nache da talec ca shiguiỹacolec leuaxaic, nache acamaye saishet da qui'itta.

³⁹ Qalaxaye da huo'otaq huo'o ca maiche ileu nam shiguiỹacpi maye ishet da qanallec, nache ca ipoteua'a camaye, nache saishet da qui'itta iviraigui ca pe.

⁴⁰ Qaq ca chec na lapat que'eca shiguiỹac maye maiche ileu, camaye iuen da iỹoi' caua alogo, qalaxaye saishet da qui'itta iviraigui ca pe, qataq ca ỹacoosop camaye, iuen da iỹoi' caua alogo qalaxaye saishet da qui'itta iviraigui ca pe.

Na sa qaỹashen da qanallec qataq da qui'itta nataxac

⁴¹ Qataq saishet da qollequi na ỹotta'a't shiguiỹacpiolec maye hualectapigui', cha'aye saishet da qui'itta.

⁴² Nache 'enauac na hualectapigui', saishet da qollequi, na ỹaualgaxaata ana da'am huo'otaq na cuatro naua lapia'ate, huo'otaq na qalota na lapia'pi, cha'aye saishet da qui'itta.

⁴³ Qaq ỹoqo'oye, saishet qome da qami' na'aqche't ne'ena shiguiỹacpiolec, cha'aye saishet da qui'itta.

⁴⁴ Cha'aye Aỹem, Nachaỹem Nataxala' maye Qanatamnaxala'ai. Aỹem, ỹataqta qui'itta da ỹataxac, qaq ỹoqo'oye qami', iuen da ỹataqta qui'itta da qarataxaqui. Nache saishet qome da qami' na'aqche't ne'ena shiguiỹacpi maye hualectapigui'.

⁴⁵ Aỹem Nataxala', maye qami' ñeqateeguesopa co'ollaxa ye Egipto, da yaqto' nache Aỹem Qanatamnaxala'ai. Qaq ỹoqo'oye qami', iuen da ỹataqta qui'itta da qarataxaqui. Cha'aye Aỹem, ỹataqta qui'itta da ỹataxac.»

⁴⁶ Qaq 'era da llec na shiguiỹacpi, na maỹopi, nam hualectapigui' ana 'alhua, qataq 'enauac na 'etaxat le'ecpi,

⁴⁷ yaqto' ỹataxaraic na shiguiỹac maye qui'itta, qataq na saishet da qui'itta, qataq nam ishet da qanallec qataq nam saishet da qanallec.