Jeremías 37 - La'aqtaqa Ñim Lo'onatac 'Enauacna 2013

Da ncoñetaguec So Jeremías

¹ So Nabucodonosor maye nta'a ye Babilonia, ỹanagui da nta'a ye Judá so Sedequías, som llalec so Josías, da nmeneguet naqa'en so Jeconías som llalec so Joaquim.

² Qalaxaye so Sedequías qataq som 'amaqtaqaicpi ltauapi qataq 'enauac so nhuo' le'ecpi, saishet co'ollaxa da ỹalaxaguet da la'aqtac Ñim Nataxala' maye ỹachegoxotchigui so la'aqtaxanaxanec Jeremías.

³ Nacherata da so nta'a Sedequías ỹamaq so Jucal, som llalec so Selemías qataq so ntaxaỹaxanaxanec Sofonías som llalec so Maseías, da nqo'ona so na'aqtaxanaxanec Jeremías, da yaqto' 'enapega, 'eeta': «Qomi' 'anatameeleguete qome, 'auỹaxanot Ñim Nataxala' maye Qanatamnaxala'.»

⁴ Qaq so Jeremías ye saxanaxa co'ollaxa da qaicoñe', nache somaye huesochiguiñi da coleetapogoigui so shiỹaxauapi.

⁵ Qaq so nalleppi so Faraón mashe ca'ai co'ollaxa ye Egipto, nache so caldeopi maye iloquiaxaatac ye Jerusalén co'ollaq ỹaỹaten de'era nache ca'ai yemaye.

⁶ Qaq huaña nache Ñim Nataxala' ỹauo'o so la'aqtac ỹanem so la'aqtaxanaxanec Jeremías, 'eeta':

⁷ Da la'aqtac Ñim Nataxala' maye Natamnaxala' na Israel le'ecpi, 'eeta': «Qaua'aqtaxañim qome ca nta'a ye Judá maye Aỹem namaxasoxona da aỹem inat, da so nallecpi ñi faraón, maye anacta co'ollaxa da yaqto' itauan na Judá, somayepi mashe ỹe'eguelaxa ye Egipto.

⁸ Qaq na caldeopi qalaq ñe'eguelaq qome da iloquiaxan na huaqta'a't nỹecpi na Jerusalén, qaq loxonec qome, nache ỹegueua'a ỹauota'a ca norec.

⁹ Aỹem Nataxala' qami' seqatalo: Saishet qome da qaulamaxachiỹauec da qoñeetega so caldeopi mashe ỹoqta ca'ai ne'ena, cha'aye saishet da nache 'eetec de'era.

¹⁰ Qaq na'aictaxa da qami' qoroxoñiqui 'enauac na alleppi caldeopi maye qami' iloquiaxaata'ape, qataq na'aictaxa da nachenata na que'emaxaicpi alleppi da no'onaña cam nanataqa', qalaxaye camayepi ñesheguem qome, nache ỹegueua'a na huaqta'a't nỹecpi.»

Da ncoñetaguec so Jeremías

¹¹ Qaq so alleppi caldeopi co'ollaq mashe huotaique da ca'ai ye Jerusalén, cha'aye ỹaỹaten da mashe anacta so nalleppi so Faraón,

¹² nache so Jeremías ca'ai so huaqta'a't nỹecpi da yaqto' taỹa yem na'alhua so Benjamín, da yaqto' huapegue' da lataxac som 'alhua maye talec somaye.

¹³ Qalaxaye co'ollaq ivireua'a so Nasom so Benjamín, nache huo'o sa ỹale maye le'enaxat Irías som llalec so Selemías qataq laual so Jananías maye lataxala' na nauanaxanaxanecpi, somaye nllañi so Jeremías, nache 'enapega 'eeta': ¡'Am qache huotaique da 'auauaxaiguet na caldeopi!

¹⁴ Nache so Jeremías ỹasat, 'eeta': ¡Saishet da nache 'eetec de'era, saishet da sauotaique da sauaxaiguet na caldeopi! Qalaxaye so Irías saishet da na'axaỹaxana somaye, nacherata da ỹaconeua'a da icoñi', qataq ỹauegueua'a so 'amaqtaqaicpi nataxala'pi.

¹⁵ Nache somayepi ỹataqta dalemataỹa co'ollaxa so Jeremías, nache damaxasoxoolec da qaiuaxan, qataq qaicoñe', qoỹanaigui so lma' so neraxanaxanec Jonatán, som qaỹo'otchigui co'ollaxa da ncoñetaxanaxaqui.

¹⁶ Nache so Jeremías hueta'a aso ncoñetaxanaxaqui maye pa'aỹañi, nache ỹataqta qaỹoqtrec soua na'axa'te da hueta'a.

¹⁷ Nache so nta'a Sedequías damaxasoxooña co'ollaxa so Jeremías da qaỹeuegueua'a so lma' lta'araic somaye, nache so Jeremías co'ollaq qaỹauegueua'a so nta'a, nache se'eso nta'a ndote' da inat somaye, 'eeta': ¿Peta'a huo'o ca la'aqtaxanaxac Ñim Nataxala'? Nache so Jeremías ỹasat, 'eeta': Aja', qaq damaye, 'eeta': 'Am nta'a, 'am loxonec qome ñi nta'a ye Babilonia.

¹⁸ Qaq so Jeremías nataqa'en inat so nta'a Sedequías, 'eeta': ¿Negue't cam ỹasouaxashet maye 'am so'otec 'am nta'a, huo'otaq ca so'otec nam 'amaqtaqaicpi 'artauapi, huo'otaq nam shiỹaxauapi cam huo'omshe aỹem qaỹa'añiỹaigui añi ncoñetaxanaxaqui?

¹⁹ ¿Cam hueta'ague que'eca na'aqtaxanaxanecpi, maye 'eetega saishet da anac ñi nta'a ye Babilonia, da iloquiaxan 'am qataq na hueta'a ne'ena 'alhua?

²⁰ Ñaq aỹem 'ana'axaỹaxana nagui 'am nta'a qataq 'auasateguet de'era iquiquiaxac maye 'am sanem: Saishet qome da aỹem 'auasheeta da qaltaq aỹem qaỹe'eguelaxata ñi lma' ñi Jonatán maye neraxanaxanec, ten qom seleuaigui ñimaye.

²¹ Qaq huaña nache so nta'a Sedequías damaxasoxoolec so Jeremías da qoỹaataña ye qasoxoc maye nauanaxanaqa' da ncoñetaqa' qanqa'en, qataq 'enauaque naua na'axa'te da qairotegueua'a ana nauole 'ayiiña maye chegoqtegueuga so nqa'aic maye hueta'a na imeetac naxa ana nauole. Qaq damaye nache qoỹeeta'ac co'ollaq ñaqauo'o ana nauole 'ayiiña se'eso huaqta'a't nỹecpi. Qaq 'era da 'eetec da so Jeremías hueta'a so qasoxoc maye nauanaxanaqa'.