Génesis 18 - La'aqtaqa Ñim Lo'onatac 'Enauacna 2013

Ñim Nataxala' ỹachaxanapeguem so Abraham da huo'o ca llalec

¹ Ñim Nataxala' nachaxana so Abraham co'ollaq huaña yem lma' ana qo'oipaqpi le'enaxat encina maye lma' so Mamre. Qaq so Abraham co'ollaq nso'ootañi netaña so lasom so lpe'l, se'eso na'a'q laiñi,

² nache somaye co'ollaq namatasheguem, nache soua tres shiỹaxau' nachattrañi huetra'a so saqaỹapeque somaye. Qaq co'ollaq ilaugalo, nache nqalgaqasheguem da ilo'ogueta soomaye, nache ỹa'alyiñi naua l-llecte, ivira'aguet na latap na 'alhua,

³ nache 'eeta': «'Am Ỹataxala', 'am ñachoxonnot da aỹem 'arqouaguec, saishet qome da sa 'anaỹaloxon da qojec.

⁴ Da 'auaỹamaxareeta, nache seỹaxanaique ca 'etaxat, da yaqto' qauỹoi' naua qarapia'achilli', ime, nache cara'acolec qanmachiiuec, qoñiỹo'ot ye lpaqal ara qo'oipaq.

⁵ Cha'aye mashe qananaitelec na lma' nam qaramaxashequi, qaq ishet da huo'o ca qami' ñerougalo da yaqto' qauqui'ii, yaqto' huo'o da qara'añaxaqui qom qaltaq qoquii.» Nache soomaye, 'ena'apo': «Aja', ỹaỹamaqchiguiñi.»

⁶ Nache so Abraham pa'aigui so lpe'l, nache 'enapego' aso Sara, 'eeta': «¡'Auỹalapigui' qome! 'Auacona ca veinte kilos cam ỹataqta no'on 'ayiiña, nache 'auraqten, nache 'auo'ot aca 'arauolepi.»

⁷ Qaq ime nache so Abraham nqalgoqtauga so hueta'a aso lalopi, nache lca'aua'a so ỹataqta no'on, qataq chaxaraic huaca llalec. Nache ỹanem so 'oonolec som lamaxashecpi, nache somaye saỹaỹaloxon da ỹo'ot so nallec.

⁸ Qaq saishet da nachesota so huaca llalec, maye nataqa'en ỹanema soomaye aso queso qataq so huaca lche'. Nache ỹataqta qochetegueto soomaye co'ollaq deque'eta'ape, huetro'oto aso qo'oipaq.

⁹ Qaq co'ollaq ime da lquia'axa'c, nache soomaye inattrac so Abraham, 'eeta': «¿Hua'ague ca hueta'ague aca 'arhua Sara?» Nache somaye 'enapeco': «Qomye 'ara, pa'ataigui ñi lpe'l.»

¹⁰ Nache so 'oonolec soomaye 'enapeco': «Na lỹa vi'i, nache qaltaq ñe'eguelaq qome da 'am ñamaqtega, qalaq nache huetoigui qome da añi 'arhua Sara huo'o ca llalec.» Qaq aso Sara na'axaỹaxaatega 'enauac na ntaxaỹaxacpi, hueta'ague na l-laq so Abraham, asomaye huetaigui so lasom so npe'l.

¹¹ Qaq so Abraham qataq aso Sara soomaye mashe ỹa'axaiqolqa, ỹoqo'oye aso Sara mashe vi'iiguet da na'axac.

¹² Qaq ỹoqo'oye aso Sara, ỹataqta sa nalo'oguet da laỹalliguiyec, nache 'enapeco': «¿Ca 'eeteco' da qaltaq huo'o ca ỹamanaxanaqtaic? ye ñim ihua qataq aỹem mashe qomi' ỹa'axaiqolqa.»

¹³ Nache Ñim Nataxala' 'enapego' so Abraham, 'eeta': «¿Ta'ainco' da daỹalliguiye ara Sara? ¿Saishet peta'a da ỹa'amaqten da huo'o ca llalec, souaxat da mashe ỹe?

¹⁴ ¿Huo'o peta'a ca alaqaic da saishet da ỹo'ot Ñim Nataxala'? Na lỹa vi'i, nache qaltaq 'am ñamaqtega, qaq mashe huo'o qome ca llalec ara Sara.»

¹⁵ Qaq aso Sara co'ollaq hua'aqchigui de'era, nache huo'o da lcolanaxa, nache huotaique da nqoleguet. Ỹoqo'oye 'enapeco': «Aỹem saishet da saỹalleguettac.» Qalaxaye Ñim Nataxala' ỹasateguet asomaye, 'eeta': «Aỹem saỹaten da 'am 'auaỹalleguettac.»

So Abraham nachoxonnot Ñim Lo'onatac 'Enauacna souaxat so Sodoma

¹⁶ Qaq ime, nache se'esoua maxasoxoiqa nachaayiñi, nache je'c da nqo'oora so huaqta'a't nỹecpi ye Sodoma. Nache so Abraham ca'ataueeguelo soomaye da yaqto' ncoyegueneto.

¹⁷ Qaq huaña, nache Ñim Nataxala' deuennataxan, nache 'eeta': «Na Abraham, iuen da sa'aqtaxanem na dam so'ot,

¹⁸ cha'aye namaye, nachena na lta'a qome ca qalota ỹotta'a't shiỹaxauapi qataq 'añaxaicpi. Aỹem sachaxanapecot co'ollaxa da namaye chegoqchigui ñaqa'en da saalec da ichoxonnataxanaxa 'enauac na ỹotta'a't shiỹaxauapi, maye huetalec ana 'alhua.

¹⁹ Aỹem lleca'aua'a co'ollaxa namaye, da yaqto' ỹamaxalec ca llalaqpi, qataq cam chegoxoguetpi, da ỹalaxalec na ỹapaxaguenataxanaxacpi, qataq da ỹo'ot 'enauac cam ỹaỹamaqchiguiñi, qataq ca no'on lataxac, yaqto' Aỹem sepaqueelec 'enauac nam sachaxanapeguempi.»

²⁰ Qaq huaña nache Ñim Nataxala' da'aqtaxanem somaye, 'eeta': «Ye shiỹaxauapi maye lma' ye Sodoma qataq ye Gomorra, ỹataqta qauem da na'aqtaguec, qataq da lasouaxashet ỹataqta lta'araic.

²¹ Qaq nagui ñeqo'ona yemaye, da semeten da ỹoqta 'eesa da ỹataqta lta'araic da lasouaxashet, maye aỹem qaỹa'aqtaxaateguem. Yaqto' saỹaten.»

²² Qaq soua dos se'esoua maxasoxoiqa je'c co'ollaxa da nqo'oora ye Sodoma, qalaxaye so Abraham, no'ona'aguet co'ollaxa Ñim Nataxala'.

²³ Qaq nache so Abraham nquicot co'ollaxa Ñim Nataxala', nache inat, 'eeta': «¿Peta'a 'aulaxachigui qome na qaica ca ỹasouaxat, da l-llañe' 'anqa'en ca huo'o na lasouaxashet?

²⁴ Qaq da huo'otaq huo'o ca cincuenta shiỹaxauapi maye qaica ca ỹasouaxat yi'iye huaqta'a't nỹecpi. Qaq ¿peta'a nache 'ena'am 'aulaxachigui qome yi'iye huaqta'a't nỹecpi, qaq saishet da 'auchoxoren souaxat que'eca cincuenta shiỹaxauapi?

²⁵ ¡'Am saishet da 'auo'ot de'era da 'aualauat cam qaica ca ỹasouaxat, da cañe' 'anqa'en cam huo'o ca lasouaxashet, da 'eco' 'eeta'a't caua dos da huo'o ca lasouaxashe't! ¡Saishet qome da 'auo'ot de'era! cha'aye 'Am maye 'am 'amaqtaqaic da 'anmit 'enauac ana 'alhua, ¿qaq peta'a saishet da 'auo'ot cam nalochiguiñi lataxac?»

²⁶ Qaq huaña nache Ñim Nataxala' ỹasateguet somaye, 'eeta': «Da selaleguete caua cincuenta maye qaica ca lasouaxashe't, yi'iye huaqta'a't nỹecpi ye Sodoma, qaq nache chegoqchiguilo qome caamaye da sechoxoren 'enauac na netaña yemaye.»

²⁷ Qalaxaye so Abraham qaltaq ỹe'eguelaxalec da, 'enapec: «'Auchoxoren qome aỹem, da 'eco' qaica ca ỹa'aloxo da 'am setaxaỹot, ye nache 'Am maye 'Aro'onatac 'Enauacna, aỹem qalaq choche aỹem shiỹaxaua,

²⁸ Qaq da huo'otaq qaicaua caua cinco maye qaica ca lasouaxashe't, que'ecaua cincuenta, ¿qaq peta'a da qaicaua que'ecaua cinco, qaq nache 'ena'am 'aulaxachigui qome 'enauac yi'iye huaqta'a't nỹecpi?» Nache Ñim Nataxala', 'enapeco': «Da selaleguete caua cuarenta y cinco maye qaica ca lasouaxashe't, nache saishet qome da selaxachigui.»

²⁹ Qaq so Abraham qaltaq ỹe'eguelaxalec da denataxan, 'eeta': «¿Qaq da huo'otaq huo'oi caua cuarenta maye qaica ca lasouaxashe't?» Nache Ñim Nataxala', 'enapeco': «Da huo'otaq huo'oi caua cuarenta, nache saishet qome da selaxachigui yi'iye huaqta'a't nỹecpi.»

³⁰ Qalaxaye so Abraham qaltaq ỹe'eguelaxalec da, 'enapec: «'Am ñachoxonnot da saishet da aỹem 'aualemataỹa, souaxat dam she'eguelaxattalec inataxanaxac, ¿qaq da huo'otaq 'aulaleguete caua treinta?» Nache Ñim Nataxala', qaltaq ỹasateguet somaye, 'eeta': «Qomye da huo'oi caua treinta, nache sechoxoren qome yi'iye huaqta'a't nỹecpi.»

³¹ Qaq so Abraham qaltaq ỹe'eguelaxalec da denataxan, 'eeta': «'Am Ỹataxala', aỹem ỹataqta qaica ca ỹa'aloxo da sheetec de'era da 'am senatto'ot, qaq ¿chaq 'eetec da huo'otaq 'aulaleguete caua veinte maye qaica ca lasouaxashe't?» Nache Ñim Nataxala', ỹasateguet somaye, 'eeta': «Qomye da huo'oi caua veinte, nache saishet qome da selaxachigui yi'iye huaqta'a't nỹecpi.»

³² Qaq so Abraham, qaltaq ỹe'eguelaxalec co'ollaxa da denataxan, 'eeta': «Ñaq aỹem 'anqouaguec 'Am Ỹataxala', saishet da aỹem 'aualemataỹa, qalaxaye nache pa'atec nagui da 'am senat, ¿ca qonetec da huo'otaq 'aulaleguete caua diez?» Nache Ñim Nataxala', 'enapeco': «Qomye da huo'oi caua diez, nache saishet qome da selaxachigui yi'iye huaqta'a't nỹecpi.»

³³ Qaq Ñim Nataxala', co'ollaq ime da detaqtague' so Abraham, nache jec ca'ai ye hueta'a. Qaq so Abraham qalaq ỹe'eguelaxaua'a so lpe'l.