Éxodo 31 - La'aqtaqa Ñim Lo'onatac 'Enauacna 2013

So Besalel qataq so Aholiab

¹ Ñim Nataxala' 'enapega so Moisés, 'eeta':

² «Aỹem lleca'ateua'a ñi Besalel, ñim llalec so Uri, qataq laual so Ur, som chegoxoguet so Judá,

³ ñimaye sanaigui da lta'araic ỹa'añaxac, da yaqto' ỹo'ot da laỹaanec, lauattonaxanaxac, laỹaanataxanaxac, qataq da sa nqalaate' da huo'o ca ỹo'ot,

⁴ yaqto' da ỹo'ot ca no'onatac nache ỹo'oxoraqta naqa'en na lcat plata, oro qataq na bronce,

⁵ qataq da ichec da naloqchiiñi qataq da lapaxañi ca ỹataqta 'onaxaic coma' qataq da ichec ca 'epaq, qataq ỹo'ot ca camachaqca ne'enaqtac.

⁶ Qataq sauo'o ltaua ñi Aholiab, ñim llalec so Ajisamac, maye chegoxoguet so Dan. Qataq 'enauac ca laỹepi ỹaanaxanaxaicpi sami' da nquiguec da laỹaanec, yaqto' ỹo'ot 'enauac ca 'am samaxalecpi da 'auo'ot:

⁷ Ca npe'l maye huaña da aỹem qanauane', aca arca laỹe caua nqataxaco, qataq cam lapoxot acamaye, qataq 'enauac ca lhuenecpi que'eca npe'l,

⁸ qataq ca nquia'axala' qataq cam lhuenecpi camaye, ncoỹaraxanaxaquipi, qataq ca lhuenecpi acamaye, qataq aca lca'atoxolate ca nchenaxanaxat,

⁹ qataq aca nca'atoxonaxalate da qaỹavigaxat ca nachetaqtaxanaxat qataq ca lhuenecpi, nỹoxonaxaqui qataq ca lmala' camaye,

¹⁰ qataq caua alogo ñi ntaxaỹaxanaxanec Aarón, qataq ñeua llalqa da ỹacoorelec da lo'onataxanaxac da ntaxaỹaxanaxanaqa,

¹¹ qataq ca ncoraxanaxat qataq ca nchenaxanaxat maye ama da laitaỹaxac, nataqa'en ca npe'l. Qaq ñiimaye ipacchigui qome da ỹo'o't 'enauac na 'am samaxalec.»

So na'a'q mataxaqui

¹² Ñim Nataxala' 'enapega so Moisés 'eeta':

¹³ «'Aua'aqtaxanem qome na Israel le'ecpi, da ỹa'aqtac, 'eeta': ‹Qami' shenapegalo, da huo'o naq 'enec qanqa'eñi ye na'a'q mataxaqui, cha'aye damaye la'anaxat da sheeta, qataq da qoñiita, qataq nache 'eetai' qome naua vi'iye da qauo'ocheetac qataq cam qami' chegoxogueta. Yaqto' qauaỹaañita da Aỹem Nataxala' maye qami' lleca'aua'alo da Aỹem qauo'onataxañiitacot.

¹⁴ Nache qami' huo'o naq 'enec qanqa'eñi yi'iye na'a'q mataxaqui. Qaq ca saỹalaq qataq qaica ca 'enec naqa'en yi'iye na'a'q mataxaqui, nache camaye qaỹalauat. Qataq ca shiỹaxaua da do'onataxan yi'iye na'a'q, camaye qaỹo'orauec, ca'ai qanqa'en na lauo' le'ecpi.

¹⁵ Nache seis na'axa'te da huo'o ca qaỹo'ot no'onatacpi, qalaxaye da ivita ye na'a'q siete, nache mataxaqui. Qaq da huo'o ca shiỹaxaua da do'onataxan yi'iye na'a'q mataxaqui nache camaye qaỹalauat›.

¹⁶ Qaq ỹoqo'oye na Israel le'ecpi, ỹataqta huo'o naq 'enec qome naqa'en yi'iye na'a'q mataxaqui, qataq ỹo'ot ca nmataxac, qaq 'era da nache 'eetai' lataxac qome da llec da qanachaalataxaqui.

¹⁷ Qaq damaye nache 'eetai' qome da la'anaxat na Israel le'ecpi qataq Aỹem. Cha'aye Aỹem Nataxala', so'ot co'ollaxa na piguem qataq ana 'alhua, huaiguilo soua seis na'axa'te, qaq so ivita so na'a'q siete, nache ime da ỹo'onataxanaxac nache ñematec.

¹⁸ Nache Ñim Nataxala' co'ollaq ime, da detaqtague' so Moisés hualec aso qasoxonaxa Sinaí, nache ỹanema soua dos coma'ye maye nanettaleguete soua lqataxaco, maye maiche ỹelyiñi Ñimaye ỹauota'a ana llaxaata.»