Esdras 5 - La'aqtaqa Ñim Lo'onatac 'Enauacna 2013

Qaltaq qano'oxoosheguem aso atamnaxaqui

¹ Soua na'aqtaxanaxanaqa Hageo qataq so Zacarías maye chegoxoreguet so Iddo, soomaye da'aqtaxaarem so judiopi maye netaña ye Judá, qataq ye Jerusalén, da la'aqtac Ñim Nataxala' maye Natamnaxala' so Israel le'ecpi.

² Huaña nache so Zorobabel, maye llalec so Salatiel, qataq so Josué, maye llalec so Josadac, soomaye ỹacoorelec da ỹoltaq qano'oxoosheguem aso atamnaxaqui maye lalamaqte Ñim Lo'onatac 'Enauacna, maye naña ye Jerusalén, qaq se'esoua na'aqtaxanaxanaqa nache huetra'aguet somayepi qataq itauaatac.

³ Qalaxaye so Tatenay, maye ilotague' so netaña ye pa'aỹa'ague da avit so tala Éufrates, qataq so Setar Bosnay, qataq so ltauapi, nqo'ona co'ollaxa somayepi nache inat, 'eeta': «¿Negue't ca qami' ỹamaxaleguete da qaltaq qavi'iguelaqailec da qano'oxoñiisheguem ana atamnaxaqui, qataq na lpaqtaxat?»

⁴ Qataq «¿ca 'eetec ca le'enaxat ca ilotague' ne'ena shiỹaxauapi maye no'oxootapiguisheguem ne'ena nỹecpi?»

⁵ Qalaxaye Ñim Lo'onatac 'Enauacna ỹataqta npaxattalec so nataxala'pi judiopi, nache se'eso nta'a saishet da nqanaxat da lo'onataxanaxac somayepi, choche ivitta'a da qaỹamaxa so na'aqtac so nta'a Darío, qataq da qaỹaỹateeta ca lereguishec la'aqtac somaye.

⁶ Huaña nache so Tatenay maye ilotague' som netaña ye pa'aỹa'ague da avit so tala Éufrates, qataq so Setar Bosnay qataq so ltauapi somaye, maye ilotague' se'eso 'alhua maye qanayeetaña, qaỹamaxa aso nere so nta'a Darío,

⁷ qaq so huetalec aso nere, 'eeta': «'Am, nta'a Darío, ñaq 'auaconeguet da qarquinaxanaxac, qataq no'on da qouetaigui qome da nlagaxayec.

⁸ 'Am sa'aqtaxanaxam da qomi' mashe souaqta'a ye 'alhua Judá, qataq seviraqa'a añi atamnaxaqui maye lalamaqte Ñim 'Amaqtaqaic Lo'onatac 'Enauacna, maye qano'oxootapiguisheguem, lo'oxonaxat qanqa'en na lta'araic coma', qataq qalapaxaua'alo naua laỹel na ỹataqta no'on qo'oipaq. Qataq ỹataqta qaiỹalapegue' de'era no'onataxanaxac da saqaỹaỹaloxon da qaimat.

⁹ Nache senataqtac ye nataxala'pi judiopi, da chaq negue't ca ỹamaxalec da qaỹe'eguelaxalec da qano'oxoosheguem añi atamnaxaqui, qataq da qalapaxaua'a na no'on qo'oipaq.

¹⁰ Qataq ca 'eetec ca le'enaxat cam qaỹatatalecpi de'era no'onataxanaxac, da yaqto' 'am sa'aqtaxanaxam.

¹¹ Nache qomi' ỹasategueta, 'eeta': ‹Qomi' lamaxa'she Ñim Lo'onatac 'Enauacna maye ilotague' na piguem qataq ana 'alhua, qaltaq ño'oxonaqtapiguisheguem ana atamnaxaqui maye mashe qaỹoqtegue so vi'i da no'oxoosheguem co'ollaxa so ỹataqta 'amaqtaqaic lta'a so Israel le'ecpi.

¹² Qalaxaye souaxat da so hua'au qarta'alpi inogoqchet co'ollaxa Ñim Lo'onatac 'Enauacna maye neta'ague da piguem, ỹoqo'oye Ñimaye ỹanem so caldeo Nabucodonosor, maye nta'a ye Babilonia, da ilaxachigui ana'ana atamnaxaqui, qataq 'enauac nam netaña co'ollaxa na Jerusalén ỹaueegue da Babilonia da ỹauo'o l-latacpi.

¹³ Qaq so mashe qaỹata'ague de'era, qataq huetoigui so la'auaxanec vi'i da lo'onataxanaxac so Ciro, maye nta'a ye Babilonia, nache somaye damaxasoxoolec da qaỹe'eguelaxalec da qano'oxoosheguem ana'ana atamnaxaqui maye lalamaqte Ñim Lo'onatac 'Enauacna.

¹⁴ Nataqa'en damaxasoxoolec da qaỹe'eguelaxat 'enauac se'eso nogoxoshetpi oro, qataq lcat plata, maye ỹacona co'ollaxa so nta'a Nabucodonosor, ỹachegoxotaigui aso atamnaxaqui maye lalamaqte Ñim Lo'onatac 'Enauacna, maye naña ye Jerusalén, da iro'ogue da Babilonia nache ỹanaigui aso natamnaxaqui. Nache nqateeguesop asa'aso natamnaxaqui, som nogoxoshetpi da ỹanem so Sesbasar, maye ilotague' ye 'alhua Judá.

¹⁵ Nache so Ciro ỹamaxalec so Sesbasar da ỹacona 'enauac se'eso nogoxoshetpi da ỹe'eguelaxata añi atamnaxaqui maye naña ye Jerusalén, qataq da qano'oxoosheguem nache qaỹe'eguelaxatchiguiña som togoshec lma' aso atamnaxaqui maye lalamaqte Ñim Lo'onatac 'Enauacna.

¹⁶ Qaq co'ollaq mashe nvita na Jerusalén so Sesbasar, nache somaye lapaxañi so lo'oxonaxala' ana atamnaxaqui maye lalamaqte Ñim Lo'onatac 'Enauacna. Qaq nache chegoqchiguiña da qano'oxootapiguisheguem anamaye, qalaxaye ñaq saxanaxa da ime.

¹⁷ Qaq nagui 'am nta'a da 'auaỹamaxareeta, nache qomi' seỹaxanaxaua'a da qanmit ana nerepi maye huetalec na ỹo'ot so nta'alpi ye Babilonia, yaqto' saỹatenaqta da 'eesa da so nta'a Ciro, damaxasoxoolec da ỹoltaq qano'oxoosheguem añi atamnaxaqui maye lalamaqte Ñim Lo'onatac 'Enauacna, maye naña ye Jerusalén. Qaq no'on nataqa'en da qomi' 'aua'aqtaxanema ca 'eetec ca 'arasataxac 'am nta'a.›»