1 Samuel 1 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna ỹauo'o so llalec aso Ana

¹ Qaq se'eso nma' maye huaigui aye qasoxonaxapi ye Efraín, le'enaxat Ramá, nache netaña co'ollaxa so ỹale maye chegoxoguet so llalaqpi so Suf, qaq somaye le'enaxat Elcana. Somaye nache llalec so Jeroán qataq laual so Eliú. So lỹa lapi' co'ollaxa le'enaxat Tohu, som llalec so Suf, maye chegoxoguet som llalaqpi so Efraín.

² Qaq so Elcana huo'oi soua dos lhua't. Aso 'oonole le'enaxat Ana, qaq aso lỹa Peniná. Aso Peniná huo'o so llalaqpi, qaq aso Ana qalaq qaica ca llalec.

³ Qaq 'enauaque naxa soua vi'iye da so Elcana ca'ai naxa ye lma', nache taỹa ye Silo da yaqto' huaña yemaye da ỹo'oxoren, qataq ỹanot ana lachetaqtaxanaqte Ñim Nataxala' maye Qaica ca Ỹaqalanapec. Qaq yemaye nache netraña soua dos llalqa so ntaxaỹaxanaxanec Elí, som le'enaxat Jofní qataq so Finés, qaq soomaye nataqa'en ntaxaỹaxanaxanaqa da qaitaxaỹapegue' Ñim Nataxala'.

⁴ Nache so Elcana naxa da ỹaneuo ana lachetaqtaxanaqte, nache ỹanem naxa na laỹe som lachetaqtaxanaxat aso Peniná, qataq 'enauac so llalaqpi asomaye, ỹalleppi qataq so 'alpi.

⁵ Qalaxaye aso Ana ỹataqta ỹactec naxa da lyac na ỹanem, cha'aye ỹataqta lauotaqte, na'aictaxa da Ñim Nataxala' saq ỹanem da lco'oxoc asomaye.

⁶ Ỹoqo'oye asom Peniná, maye lasaxaua, ỹataqta saq ỹaxanapec, qataq ỹe'eetac ivitta'a da inogoqchet, cha'aye Ñim Nataxala' saq ỹanem da lco'oxoc asomaye.

⁷ Qaq nache 'enauaque soua vi'iye da nache 'eeta'ac de'era aso Peniná, da ỹe'eetac aso Ana naxa da somayepi taua'a aso atamnaxaqui maye lalamaqte Ñim Nataxala', ỹoqo'oye aso Ana ỹataqta nỹeetac naxa, nache saishet da deque'e.

⁸ Huaña nache so Elcana, som lhua asomaye inat, 'eeta': Ana, ¿ta'ainco' ye 'anỹeetac? ¿Ta'ainco' ye 'auaquicota qataq saishet da 'auque'e? ¿Peta'a saishet da ñapacalec da lyacỹaxac ca diez 'aỹa'alaqpi?

⁹ Qaq huo'o so na'a'q, co'ollaq huaña ye Silo, nache aso Ana ñisheguem co'ollaq imat da lquia'axac. Qaq so ntaxaỹaxanaxanec Elí nso'ootangui aso nso'onaxaqui, netaña so sa qaỹapeque so ñegueuo aso atamnaxaqui maye lalamaqte Ñim Nataxala'.

¹⁰ Nache aso Ana nỹeetac, cha'aye ỹataqta lta'araic da laquicoxo, nache nqouagaxaunot Ñim Nataxala',

¹¹ nache ỹanot da la'aqtac, 'eeta': «'Am Nataxala' maye Qaica ca 'Auqalanapec, qom 'aula'a da lta'araic lhuogoxo ana'ana 'aramaxashe, qataq da aỹem 'auennata'a, nache 'auauo'o qome ca ỹalec. Nache camaye 'am sanot qome, da yaqto' 'enauaque naua na'axa'te da 'am do'onataxaatacot. Qataq 'Am sanot da ỹa'aqtac, da saishet qome da qanpetec na laue camaye.»

¹² Qaq cha'aye aso Ana ỹataqta qaỹoqtec da natamnaxac da nqouagaxaueetacot Ñim Nataxala', nache so Elí ilotagui co'ollaxa da choche datac na alap asomaye.

¹³ Cha'aye aso Ana ipa'axaatauo na la'aqtacpi da natameetacot Ñim Nataxala', nache saishet da qaỹa'axaỹa, nache choche datac na alap, nache so Elí ipi'itaxaatega da taxai asomaye.

¹⁴ Nache 'enapego', 'eeta': «¿Che laguio' qaq imeuec nam 'artaxa? ¡Ñaq 'axaañi ctaxa na lataxa!»

¹⁵ Nache aso Ana 'enapeco': «'Am ỹataxala', saishet da aỹem taxai. Aỹem saishet da huo'o ca ñeỹomgui lataxa, chaqrata da ỹataqta lta'araic da ỹaquicoxo, ỹoqo'oye aỹem ỹataqta semato'ot damaye da sa'axatem Ñim Nataxala'.

¹⁶ Qaq 'am saishet qome da 'arhuennataxac da aỹem 'etaxaloxoi, cha'aye aỹem ñeqouagaxaueetacot Ñim Nataxala', cha'aye aỹem ỹataqta lta'araic da ỹaquicoxo qataq da iuogoxo.»

¹⁷ Nache so Elí 'enapeco': «'Aue qojec, nache 'aulactapiguiñi qome, qaq Ñim Natamnaxala' na Israel le'ecpi 'am ỹanem qome cam 'auỹaxaataique.»

¹⁸ Nache aso Ana 'enapeco': «Ỹataqta qalota da ña'achec.» Ime, nache aso Ana ỹe'eguelaxa som chegoqchiguiña, nache deque'e, qataq nache saishet da ỹe'eguelaxa da daquicotac.

¹⁹ Qaq so lỹa na'a'q nache no'ottrashegue'm, qaq co'ollaq ime da nqouagaxaueetracot Ñim Nataxala', nache ỹe'eguelaxara so lma't yem Ramá. Ime, nache so Elcana qaltaq lauatapiguiñi' aso lhua Ana, nache Ñim Nataxala' tachigui lauel da lashelaxanaxac asomaye.

²⁰ Huaña, nache aso Ana hualaxai, qaq co'ollaq ivita so laloqo' da deco'o, nache ỹale so llalec, nache ỹanagui da le'enaxat Samuel, cha'aye asomaye 'enapeco': «Seỹaxanot co'ollaxa Ñim Nataxala'.»

²¹ Qaq so lỹa vi'i, nache so Elcana qaltaq ỹauec co'ollaxa so llalaqpi da taỹa ye Silo, da yaqto' ỹaneuo aso lachetaqtaxanaqte da ỹanot Ñim Nataxala', qataq da ipacchigui som ỹan la'aqtac co'ollaxa,

²² qalaxaye aso Ana saishet da jec, ỹoqo'oye 'enapego' so lhua, 'eeta': «Aỹem saishet da ashec nato' qom ivita da ỹaxaañi da l-llepaxac na nogotolec. Huaña qome nache serouo da sanot Ñim Nataxala' qalaxaye nache naña qome yemaye.»

²³ Nache so Elcana maye lhua asomaye, 'enapeco': «Aja', 'auo'ot cam ỹoqta ỹaỹamaqchiguiñi 'anqa'en. Nache 'ano'onañi nato' qom mashe ỹaxaañi da l-llepaxac na nogotolec. Qataq 'aupacchigui qome da 'ara'aqtac maye 'aỹa'anem co'ollaxa Ñim Nataxala'.» Nache aso Ana no'onañi da yaqto' ỹaqchet so llalec, choche ivitta'a co'ollaq ỹaxaañi da l-llepaxac somaye.

²⁴ Qaq co'ollaq mashe ỹaxaañi da l-llepaxac so nogotolec, qalaxaye somaye ñaq qapio'olec, nache ỹauegueua'a aso atamnaxaqui maye lalamaqte Ñim Nataxala' maye naña ye Silo. Nataqa'en ỹauegueuo so huaca llalec maye mashe ivi' soua tres vi'iye, qataq so veinte litro so 'ayiiña, qataq aso 'oonole lo'oc na shiguiỹac nlaqchigui so lataxa.

²⁵ Ime, nache soomaye ỹaareuo so lachetaqtaxanaxa't huaca llalec, qaq so nogotolec qalaq ỹanema so Elí.

²⁶ Nache aso Ana 'enapego' somaye, 'eeta': «Aỹem 'auchoxoren 'am ỹataxala', qalaxaye ỹataqta 'eesa da 'am 'anca'altauec, qaq nachaỹem maye soota'a caillaye ne'ena da ñeqouagaxaueetacot Ñim Nataxala', qaq 'am saqaỹapeque caillaye.

²⁷ Nache seỹaxaatacot co'ollaxa Ñim Nataxala' da aỹem ỹanem ne'ena nogotolec, qaq Ñimaye aỹem ỹanem namaye.

²⁸ Qaq aỹem ñanac cha'aye maiche iuennataxa co'ollaxa da sanot namaye Ñim Nataxala', da yaqto' nache 'eetai' naua na'axa'te da do'onataxaatacot Ñimaye.» Nache so Elí ỹa'alyiñi naua l-llecte da nqouagaxaunot Ñim Nataxala'.