Yòvdìy 5 - ŊWÀʼ NYÙYWír veé Jerusaleme tóŋ ji Nyùy Tàr shám á áwune 1 Éè Nyùy Tàr, kú a kuumé kinyo ke kí kooyin ver kí. Ku lèéy, e yèn nshoórsí wo wù nəən ne ver. 2 Á lì ne nsay yer, e fò e vitúm vi, wír ve səné nəə́, e yòv láʼ sér. 3 Vèr sì ji wón tsə̀, atàr vérí yòʼ dzə̀ə́, aàyìy vérí sì ji vikǐy ŋkfə. 4 Vèr yún mendzə́v yunín, e bó a no, yún meŋkaʼ yúnín, e bó a tòn. 5 Wír ve á nyoorì verí sí koóri nsən sér, a vèr sí kee keèn, là meemè. 6 Vèr shwì ne kitú e Ejiv, e shwì é Assiriya, e bó a koóy kifá ké a yi. 7 Atàr vérí‑iì jày e Nyùy Tàr, e wìy kpùkír, vilaʼày vé jay wov ví siíy, a ròn a dzə̀ ver. 8 Sí sáʼ akwǎn aŋgàa vibàn ver, là wír wóo bòyìr ver fo áwuné wo. 9 Vèr nyavrì e dzəʼə̀m yérí, bó a boŋ kifá ke yi, a dzə̀ bìʼ ashóŋ ve á siìn kwáʼ e dzə̀m. 10 Jìŋ koò ne ver, kinjàʼ ki shúr, wúné wáa lùm, lum, ríʼsin, kù moo ji vèr tò é kiy. 11 Lóo dzə e Jerusalem, á ghàtí vikìy vér, e ntèʼ seé Juda, á ghàtí wón vér vee vikìy. 12 Áwune sə̀ŋ ne vilìmbìy vér é yuv fó wo, ví kpúkír, a bó á yòʼ fə̀m ghvə́m vé saʼ vér. 13 Á lì ne wónlě nsùm vér ji akwàn vév, e lì bèy, a kàn, á wáa jò kibán, a kàn, á wáa ghvəəné e sar mbeʼ se meŋkàʼ. 14 Ŋgày sé wìr sér sí tàʼrí ne, á tàʼrí ne fo shùu kày ŋkàlaʼ, fo á yii kaári, kwaŋrì vinyo. Wónlě nsùme shwèy ne yòv. 15 Dzəʼə̀m yérí sì ŋgeʼ ŋgeʼ, là vijuŋ, ceŋ ye vèr‑iì rə́si sherìi máy, vèr kfə́n é nsòv. 16 Nsiì wo vèr‑iì bínsi lày ne, lòné shóv ver, bìʼ ajay vér. 17 Tím yérí sí búʼ buʼún, a síi səə́ne, lo, diy dìyìn, 18 bìʼ Gwan Sion wo siìn vifə̀m, a sì kirə́ʼ ke dzə́ akuúrá shó. 19 Yii bèy, Nyùy Tàr, à dzə̀ ké Fon woo là may. Sáʼ yée kù wíy a dzə ghán sidzə̀m, mo ŋgwàʼ si kóʼó. 20 À làysìn ne rú ver ŋkuuŋkùŋ à? Bó à yòʼ dzəə́ wìy a kuumé ver a? 21 Éè Nyùy Tàr, ku siìr ver e wò wùn, é vèr kfə́n, e yèn wò. Kii wò, Nyùy Tàr, ku yiì, é dzəʼə̀m yérí wáa dzə mo yí‑iì rə́si dzə́. 22 Mo dzə̀ ji à mèŋ ne ver ŋkuuŋkùŋ a? À kù sí wìy a shwiíy a dzə̀ kilòŋ vèsən, là yar à? |
© 2022 CABTAL