Yòvdìy 4 - ŊWÀʼ NYÙY

Á tón Jerusalem, ŋgeʼ nəə́ wír vee fó

¹ Á ku lèéy, e yèn, nyàŋ koò ne e kishà ke mbàm ke baar kí, kisha kee wúntí kíwun ki bùŋ ne sə́nín. Tíy seé lav cù si sí néŋnin e ghaŋ se dzəə, tíy, a dzə̀ see jeéy sí.

² Wónlě nsùm veé Sione‑eè tókir, kù mo tòkír *kisha ke mbàm ke baar kee wúntí kíwun. Lèn wáa dzə, aá sí lóvti sho moo kíŋ yee mbóm, kifá, aá bóm bomén e wóo.

³ A fə̀m dzə̀ nyám yee koosàʼ, bo yì kù yii nyoor wón və́. Yii bèy, aàyǐy won veé Jerusaleme lóvti e véví, moo shinə́n sheé woʼ shee *ostrish she shí lo, shí yàʼáy wúm.

⁴ Kilòŋ ké won kí yùm ne, e yùm ben, toór kilòŋé káʼkír. Wóné fəə́ viloòné vé vifa ve yi, a ŋgaà wóo fo yòʼ dzə̀.

⁵ Wír ve vé‑eè rə́si bon vifá e wùn, á sí toóŋe jíŋ e mentàrnín. Ve vé‑eè kuyin é mvə̀m fùʼ, á sí ghán lèn, síy a dzə̀ vinsíy.

⁶ Ŋgeʼ ye yì gbuùn e wír vém veé Jerusalemé kitu tàv é ŋàŋ, yì tàv, e shaà ye yì‑iì gbuùn e Sodom kitu. Ké Sodom ki dzə̀ a Nyùy‑iì bvə̀ʼə́y fó kàŋ mòʼón, a bó yòʼ dzə̀ moo ke yii wír.

⁷ Wón ntoʼ veé Jerusaleme‑eè dzə̀, aá rəsìn ji lìŋ. Áwune‑eè bavkìr moo shiŋgvə́r. Vé‑eè dzə̀ abíyín moo biì, kiʼ anjaʼkìn moo *síbaŋ yee safiri.

⁸ Lèn wáa dzə, aáwune sí sə́n moo ŋwaáné. Wìr yòʼ kfə̀n yén áwune é dzəə, wù kìíy. Wún wóví taàŋè ne, e mày, á yúm, a dzə moo shiŋkúnŋkun.

⁹ Yì‑iì bòŋ ké wìr ve vé‑eè kpuun yé rər, e shaà ké wìr ve á kpú yé jiŋ. Á lo, jìŋ rèŋèr áwune é mbòŋén, á wàa kpukír, là kifá kée luʼ e shuù.

¹⁰ Vikìy ló, a naá wón vév ji vifá ve yi, áwune, aá yii rə́r mendzən me wìr e ŋàŋ. Á sí kfə́r wón vév ji á fiʼ bòy fo jiŋ, jíŋ, ye yì sùmèn ŋkàlaʼ.

¹¹ Kilòŋ ké Nyùy Tàr kí‑iì shwìíy, e tònén, wù dìn dòʼshwíiy və wo tavín. Wù‑uù màʼ və́y é Sion, fóo bò, à kinsə̀ŋ ki shó.

¹² Bó njèm yòʼ‑oò ghàn shì afon veé vitum, kìn wan vin, fə̀m woo feé, ji a dzə̀ aŋgàa vibàné bàʼtí rə́r, e tò káy Jerusalem sho.

¹³ Kí‑iì kòóy bey, bìʼ jay aŋgàa ntum Nyùy vee fó, e kòóy, bìʼ vinyo ve atàá cùu‑uù buʼtì. Áwune‑eè yúyri alànjò aáwuné mvəm, wíri, a dzə̀ vee Nyùy mbòv.

¹⁴ Lèn wáa dzə, a vilìmbìy vìn vi ghán, jiʼkìr e shuù se dzəə moo amfìr, jiʼkìr, là wír wóo ghar áwune. Á jiʼkìr, bìʼ fo á liìn ne lor mensə me alànjò.

¹⁵ Áwune lóo wìy, wíri wàa key jii, «Vèn kíŋrí, vé *kifàné, lá vèn kùm wír.» Áwune nèn kù a ghan, a jan janén é vitum. Wíri kù a bàʼàr, a nyàysì nyàysìn jii, «Yòʼ dzə̀ vèr səə̀sí wír vìn.»

¹⁶ Dzə̀ Nyùy Tàr kitú kfə́, wo wù‑uù taʼarin áwune, a bó wù yòʼ dzəə́ kér shíi wov. Bó wìr yòʼ‑oò dzəə́ yúnin atàá cù, a bó á yòʼ‑oò dzəə́ ghvə́m vilìmbìy.

¹⁷ Vèr‑iì tùytí sí, a shìy wír wo wù sə́ ver, e lèéy bèn, síi səə́né, là ŋgaà benben. Vèr‑iì kòʼ ŋkiy e věr virùmèn, la kitúm ki yòʼ wìy, e sə̀ ver.

¹⁸ Aŋgàa vibàné sí dzə wuú yér, a bó yòʼ dzə̀ vèr kfə̀n yù fó a fəəsín e shuù se dzəə. Ghán sér sí sì fó mentsə̀m, vishiíy vér ví sì é kiwo, dzəʼə̀m yérí kù mày ne bèn.

¹⁹ Aŋgàa vibàn vérí meè ne ji věv, e shaà mo lùŋ wo wiy yii sə́y fo ntoò yùv. Áwune jùm ne ver áàŋkoŋ, e nèn a teʼ lèn e kirə̀ʼ ké woʼ kí.

²⁰ Á koò ne fon wor é kitam, fon, a yì‑iì yòʼ Nyùy Tàr. Dzə̀ wun wo vèr‑iì yoy, tiir e wùn wó. A vèr‑iì kí ji á wíy lìr e wun sar vàv, a dzə e vitúm ví mvəm.

²¹ Àshè, wìr veé Edom, ven ve á dzə́ e nsay Us, vèn wáa sheʼrí rì, a yu vijuŋ vi. Wóon woo bàr ŋgeʼ kù yíi wìy sa, a vèn yíi no, a baa, e shoʼóy ndzə̀y, a dzə kinshóʼ.

²² Òó mbaà ŋgònjuù yee Sion, ŋgeʼ se vèn yén bìʼ ajay vén sí kù yíi mày, bó Nyùy Tàr yòʼ yíi màʼtì ven é kwaʼ vikwàn. Yii bèy mbà, ŋgònjuù yee Edom, Nyùy Tàr yíi màʼ ŋgeʼ e věn kitu, e toʼór yii yén kisaŋe.