Ŋwàʼ Jov 3 - ŊWÀʼ NYÙY

Jov ghvəvrì Nyùy

¹ Jov nèn yiì lò, e mvə̀ʼ shuu və́, e shòv kishiíy ke vé‑eè dzəən wun.

² Wù wáa dìy, a suúy jii:

³ «Éè wan ŋkfə wìr, kishiíy ke vé‑eè dzəən mo kí ku lày làyìn, aá ku shòv vitsə́ʼ ve vé‑eè tiimen bvəm yém shóvín ŋkuuŋkùŋ.

⁴ Kishiíy ke vé‑eè dzəən mo kí ku kfə̀n ji ndzə vitsə̀ʼ. Nyùy woó yuv ku làysìn làysìn, é la shùy yòʼ fə̀m tò, à tóo shó.

⁵ «Nyùy ku yiì, é kí kfə́n ji kishiíy ké mendzə̀n, a sən ji cùm, e yiì, é mbàʼ sum súmen, sumè, é kí wáa sən, a beemé.

⁶ «Vitsə́ʼ ve vé‑eè tiimen bvəm yém ví ku lày làyìn é ŋòròʼ. Á ku làysìn, e làa yòʼ a taŋ e mvə̀m vishìíy veé kiya. Á ku fə̀ə́r fəərín fó mvə̀m vishìíy veé ŋwee.

⁷ Vitsə́ʼ vin vi ku kfə̀n ji vé wiíy woo kár, ve bó yòʼ dzə̀ wìr wàa ndzəʼ ji á kòʼ á kikún ké wan.

⁸ Vé səme ku shòv shóvín. Wír ve á yii səʼ kigàgǎʼsòŋ kee Leviyatane ku ròʼ.

⁹ Vitsə́ʼ vin, á ku ndzə̀mér sàŋ wo wù bán kijàvndzə, fo ndzə kfən jàv, é vitsə́ʼ vin vi wáa shìy ji ráne rə́ne, a kifá ki yòʼ yíi a dzə, a bó yòʼ dzə̀ ví yèn fo ndzə javì.

¹⁰ Á ku shòv kishiíy kin, bìʼ fo kí‑iì yiìn, yè wor tiím bvəm yém, e shòv, bìʼ wáy ye kí wayin mo é ŋgeʼ.

¹¹ «Éè mǒ vèné, vé‑eè lòo dzəə́ mo, yií ka fo m shaa sháan féyì? Yì‑iì yiì ka fo á ku tàŋ yè wor táŋén?

¹² Yè wor‑iì kíki mo ji ka? Wù‑uù nyoor mo ji ka féyì?

¹³ A mò‑oò bóo shaà, bo m dzə̀ lèn e rəsìn, bóŋ mbuùné yem, dzə́ lèn, meemè.

¹⁴ Meemè vèr aàfone, aàtǎr ntoʼ véví, aàŋkfəə́ wòŋ, áwune veé yàŋgùʼ, ve vé‑eè bàʼrìn ŋkà se laʼ sév, aá dzəə́ yén vifə̀m lán.

¹⁵ Bo m kì yíi a meèmè vèr à vé saʼa, aàŋkfəə́ wòŋ, áwune ve vé‑eè tsəətìn tsəə̀tìn e *kisha ke mbàm ke baar kí, rúner láʼ sév e ke fəvír kí.

¹⁶ Yì‑iì yiì ka féyì, fo á dzəə́ mo ji wán woó shikón, é m tósín, aá liti, a dzə moo wán wo wù shaàn, a wù yóʼ ne yèn kirə́ʼ.

¹⁷ Kù dzə̀ áàŋkfəə́ wòŋ, fo a dzə̀ vé kisaŋe neèr liì wov kisaŋ, a dzə̀ fó, fo a dzə̀ wír ve á lìmèn ne, e dòrí wàa ker meemè.

¹⁸ Kù dzə̀ áàŋkfəə́ wòŋ, fo wír ve á koorin, e fiìnè e vikwàné meemè, a bó á yòʼ kfə̀n yú a wìr wámri áwune ji á mo á wáa lìm ji.

¹⁹ Wìr dzə̀m dzə̀ fó réŋréŋ, à wo kuʼùn, à ghéʼncey, a bó wìr wùmòʼ yòʼ dzəə́ reŋ vikwàn fo wùmòʼ.

²⁰ «Bìʼ ka mo Nyùy yii ji vé ŋgeʼe wáa dzə sho? Wù fó dzəʼə̀m e wír ve á dzəə̀n e nyárí wùn bìʼ ka?

²¹ Á siíme kpú, yii bèy, a yí yòʼ li áwune, koŋ fóo kpu, jwímer kpú mo wìr jwìmér fùʼ.

²² Áwune lo, á wàa sheʼrí kpú. Yí li áwune, á wàa yu vijuŋ e ŋàáŋàŋén.

²³ Bìʼ ka mo Nyùy bávti dzəʼə̀m wìr, a dzəə̀ rə sə́tí ne, wír, a Nyùy tsə́m ne kay, e giìmè sho?

²⁴ «Shwéme kù sì vém vee viyíkìr, a m kónsi moo ndzə́v.

²⁵ Kinyo ke mò‑oò fanè ki kù dzə̀ kíwun ke m tó sho, ke mò‑oò leey, a wúné beéme mo kí kù dzə̀ ke kí kooy mo.

²⁶ Shilív shém shí yòʼ dzə́ nyaáŋ, a bó m yòʼ kér meemè. Ŋgeʼ si kù dzər dzə̀rìn e mǒ kitu, a bó rəsìne yòʼ dzə̀.»