Ŋwàʼ Jov 1 - ŊWÀʼ NYÙY

Nyùy fó vitaáví ji Satan mum Jov

¹ Wìr wùmòʼ‑oò dzə̀, aá yoŋ ji Jov, a wù‑uù dzə́ e wòŋ wo á yoŋ ji Us. Wù‑uù dzə̀ là shilóm, tíy a dzə̀ é suuyrú, ghvə́m Nyùy, bin ndzə̀m é kinyò ke bi kí.

² Wù‑uù kér wón vee vilum saàmbà, kér vee vikìy ataár.

³ Wù‑uù dzə̀ ŋgaà kav, a wù kér njiì nsə̀kì saàmbà, akamer ansə̀kì ataár, anàʼ ve á lim súm ghii tàn, e lì vimbèʼbìy vee vikìy ghii tàn. Wù kfə́n a ker sa wír ve á lim fo wun nyanyày, la wìr yòʼ kfə̀n a dzə wo a dzə̀ wùn wun dzə̀v kiwó fo wù‑uù dzə́, e mbìv yee fo shùy yii tó.

⁴ Wón vəə́‑əə̀ lo, á wàa kàʼ ŋkàʼ, wìr wàa tar afə́r və́ e wun laʼ, e kfə́ kee kishiíy kí. Á kaʼ bèy, á nèn tsə̀nsí ntum kimbi e jemèr sév see sitaár si ji á wiy á, é wùn áwune wáa yinín, a nonín.

⁵ Áwune yí ŋkàʼ vən, ghánen e melav melav, tárninè, Jov nèn bvəə̀shí, e jàŋrì áwune, e *kfə̀mrí. Wù lo, wù lò é yuv kijàvndzə kijàvndzə, e yiì cu ye tonèné jeéy jeéy mo wón və́ vee vilume dzəə̀n. A wù‑uù rəm fo wun bvə̀m jii, «Rə̀ʼ‑ə́ə̀ wáa dzə, a wón vémé jày ne, e kuù Nyùy aáwuné shiliv.» Á mo Jov kù‑uù yii bèy, ghán sidzə̀m.

⁶ Wáa dzə e kishiíy kímóʼ kí, nsheèlav se Nyùy si báʼtí e Nyùy Tǎr si ji á duŋri kitú, a Satan dzə̀ sá e ŋgoo.

⁷ Nyùy Tàr dzə́r e Satan jii, «À kì ghán ké fèé?» Wù bìnèr e Nyùy Tàr jii, «M kì ghán yá woŋ, du e mbìy, kfə́n e bàm, kóʼ e kùy, sə̀y e tsən.»

⁸ Nyùy Tàr dzə́r shó jii, «À shoòshí ŋgaà lìm wom woo Jov, a kwàʼtì ké ji ka? Wìr yòʼ dzə̀ shó e kitu ke nsay, wo wù dzəə̀n là shilóm, tíy e suuyrú, ghvə́m mo, kfə̀n bin ndzə̀m é kinyò ke bi kí moo wun.»

⁹ Satan bìnèr e Nyùy Tàr jii, «A dzə̀ Jov wàa ghvəm wò, a bó wù yòʼ kì kifá ke wù yíi koóy fo wò à?

¹⁰ Bó à yòʼ tsə̀m ne kay mbìv sidzə̀m, e gìŋ wùn à kfə́ə rəə́, à kifá kidzə̀m ke wù kér ki shó à? À səə̀vì ne kifá kidzə̀m ke wù limè, e dzə̀sì kéŋ rə́, nyám sə́ sí wáa dzə nyanyày e wòŋ.

¹¹ Yii bèy, aà lò lèn, e sə̀ kifá kidzə̀m ke wù kérí, bo wù lo, e kuù wò e wò si.»

¹² Nyùy Tàr nèn sùúy e Satan jii, «Yuúrí, m fò ne wò vitaáví ji à laar kifá kidzə̀m ke wù kérí, cáʼcáʼ dzə̀ jii, lá à yòʼ làʼ á kiwó e kitu wo.» Á bèy, Satan nèn lò fo Nyùy Tǎr si, a dù.

Satan múm Jov

¹³ Wáa dzə e kishiíy kímóʼ kí, a wón Jov vee vikìy wùn à vee vilume dzə́ e lúmér yev yee ŋgàywìr lav, yínin, nóninè,

¹⁴ wìr lìm tó fó ndzə, e sùúy e Jov jii, «Vèr lò ne, a dànèr anàʼ ji á wáa kom súm, a vimbèʼbìy ví tíy yíkir fo ghaŋ,

¹⁵ wír veé Sabeàa sásín, e nyoòrì, e kùúy ambòŋ wùn à vimbèʼbìy ví vidzə̀m. Á kì gwàtì vé lìm vé, ku sòsìn mo vèr mòʼón cáʼ, e lèʼ, e wìy ji m fiʼti e wò.»

¹⁶ Mo wù kù tíy tiísi, ŋgaà lìm wùmòʼ nèn siì bvə̀y, e sùúy e Jov jii, «Nyùy tsə̀nsí ne kishèv fo yuv, kí dzə́v njiì e dzə̀m, e yùyrí aŋgaà vé lìm adzə̀m, e laàr kifá kidzə̀m láarin, ku bèr mo vèr mòʼón cáʼ wo m leʼen ji m ku wìy, e fìʼtì e wò.»

¹⁷ Mo woo shooy tiísi kfə́, wùmòʼ nèn siì bvə̀y, e sùúy e Jov jii, «Wír veé Kaldeàa sàsìn ne, e bvə̀y ŋgoo sitaár, e nyoòrì akamer vé, e kùúy, e dù sho adzə̀m. Á gwàtì ne vé lìm vé adzə̀m, ku jòʼsì mo cáʼcáʼ wo m bòyìn, a leʼ ji m wiy, e fìʼtì e wò.»

¹⁸ Mo wù kù tíy tiísi, wùmòʼ kfən bvə̀y, e sùúy e Jov jii, «Wón vée lò ne ji vé‑eè wáa yinín, a nonín e lùmér yev yee ŋgàywìr lav,

¹⁹ kinsəm ki sásín, e bvə̀y fó woʼ, e kètì kór se lav see sikweè, lav keésí e wóné kitu, áwune kpúkír, ku jòʼsì mo vèr mòʼón cáʼcáʼ wo m bòyìn, a leʼ ji m fiʼti e wò.»

²⁰ Jov yuúrí, e nèn tùm é yuv, e tiìné kikúm ke da ki fó wùn, e lò, e kwaày kitú, e feèné, e gbù fo nsay, a fo ghvə́m e Nyùy, a suúy jii:

²¹ «Mò‑oò fəə́ fo yè wór bvə̀m, a m yòʼ kér kifá, a m wíy lòo kpu, e làa yòʼ lì kifá. Nyùy Tàr fò ne kifá kidzə̀m e mò, e kfə̀n sə̀. Búríi wáa dzə fo Nyùy Tàr.»

²² Mo vinyo vìn vi‑iì kooyin, bó Jov yòʼ‑oò lo jày, a bashí Nyùy.