Ŋgàn 23 - ŊWÀʼ NYÙY

Ntir yee 6

¹ Aà dzə̀ʼə̀m, a yikír vèn taà saʼ, à sə̀ʼə́m, e kìíy dzə́ə ye à yíkir vèn wun.

² Aà dzə̀ yíkímay, à wàa yen fóo yi, e tonén.

³ Lá à yòʼ a ker shií é viyikìr və́ ve ví rəʼtìnè. A dzə̀ wù wàa levtí wò sho lévtín.

Ntir yee 7

⁴ Lá à yòʼ kù a tàŋèn ji à kuʼ. Ku fìír, e bàʼàr kitám kee bey,

⁵ bìʼ fo à lóo yen ji à kùʼ ne, vikuʼùy vee shooy vi nèn kù ŋeèmé, e lày. Ví kù dzə̀ kfə́ moo lùŋ wo wiy, wo wù lo, wù fèŋ, e dù duùn é yuv.

Ntir yee 8

⁶ Lá à yòʼ a dìy ji à ku yì vifá ve yi ve ŋgaà vikaàmè. Lá à yòʼ a dìy viyíkìr və́ ve ví rəʼtìnè.

⁷ Wù lo, wù yòŋ e wò ji á yi, a no, a wù dzə́ kfə́, biʼ a dzə̀ káv, yén ji à wày á ne wun e kilày.

⁸ À yíi màʼ viyíkìr ve à kì yiin, é suyrì ye à kì suyrì wune lay kisáŋ.

Ntir yee 9

⁹ Lá à yòʼ a suŋnín e kiyúŋ kí, wò moo fií, bìʼ fo wù kù yíi a ŋway jí sé ŋwáyín.

Ntir yee 10

¹⁰ Lá à yòʼ kùvsín bìíy ŋgvən yee fó yàŋgùʼ, e nə̀ə́ e wón tsə̀ə́ virə̀ʼ.

¹¹ Nyùy wo wù lo, wù tìn áwune fó ŋgeʼ tàv féyì, a wù yíi sə nsaʼ yev, e saʼ, é yì koó wò.

Ntir yee 11

¹² Tiír vifií ví é yeʼéy, e fò vituʼùr ví, e yuùrí ntir.

Ntir yee 12

¹³ Lá à yòʼ yàr fó a sə̀r wán, aà fə̀m ndzə́n a dzə̀ e ŋgwàne, bo yòʼ dzə̀ wù kpù.

¹⁴ À dzəv wán e ŋgwàne, à sə̀ wun fo kpúu.

Ntir yee 13

¹⁵ Wan wòm, aà lòo dzə, a ker vifií, bo m yíi a yu vijuŋ.

¹⁶ Rúrú, à wíy lòo suúy suuyrú, é m wáa sàvnìn.

Ntir yee 14

¹⁷ Lá à yòʼ a baŋrí yii wìr ve bií, a meŋ Nyùy. Kú a dìy ké ji à wáa ghvəm Nyùy Tàr ghán sidzə̀m.

¹⁸ Rúrú, kibvəə́shí ké ki tíy fo, a bó yòʼ dzə̀ kifá ki sə̀ʼ kinyo ke à tiirin vifií shó.

Ntir yee 15

¹⁹ Wan wòm, yuúrí ntir yem, a ker vifií ví, a tiy a dzə̀ é kinyò ke ru kí.

²⁰ Lá à yòʼ shèm ŋgoo amfoòkìnó, kìn ye vé kishwaa, ve á rə́si bvə́ʼ a dzə̀ nyám.

²¹ Anónoón wùn aàyíyiíné kù wíy to a dzə̀ é kitàn. Wìr rə́si, lóo buuné buunén, bo wù kù wíy a màʼ ndzə̀y a dzə̀ see vinsàʼ.

Ntir yee 16

²² Á yunín tàr won wo wù‑uù dzəən wò, a yen fóo ŋway yè won, fə̀m a wù dzə́n ne.

²³ Mùm kitávín, e keèrí ntir wùn à kiíyi, à suuyrú, keérí, e ghàr kitávín.

²⁴ Tàr à wìr wo wù yunin Nyùy kù wíy a sheʼrí feyì, a wìr wo wù kér wán woo kiíy, wíy a yu vijuŋ ve ghaʼán ví.

²⁵ Ku yiì, é tàr won wùn yè won wáa yu vijuŋ, e yiì, é ye won wo wù dzəən wò wáa sheʼrí.

Ntir yee 17

²⁶ Wan wòm, tiír vifií ví e mǒ wùn, e lì liì a dzə̀ wóom.

²⁷ Wiíy woo sàkì dzə̀ kitám, a wiiy viŋkar dzə̀ líŋ wo wìr li sho.

²⁸ Wù lo, wù lìr, a teʼ vilum moo shóŋ, a yiì, vilum wàa bvəə́r melav mev.

Ntir yee 18

²⁹ Yii dzə́ la mendzən mendzən? Yii dzə́ la ŋgeʼ ŋgeʼ? Yii taʼ la melaà? Yii ghvəvrì la? Yii kér la vileémé, a wù yòʼ kì fó fo? Yii baŋ la e síi?

³⁰ Kù dzə̀ amfoòkìnó ve á rə́si nó noón, áwune ve á bìŋrìn vintav ve melùʼ.

³¹ Lá à yòʼ a leéy meluʼ ji bìʼ fo mè kiʼ kijuŋ, líynin e bàr bèn, sə́y e kilòŋ kijuŋ.

³² Mè lo fo bàm, mè lùm wír moo yó, e tè moo búv,

³³ à wàa yen vinyo e vinjeenjèm, a taŋrí vinyo, là yú,

³⁴ a koo moo wír wo wù neèmèn é kikoŋ e mvə̀m rìbà ndzə̀v, a shwéri kar kikóŋ, kóʼ sho, kfə̀n sə́y sho, a wù yaʼà.

³⁵ À yii lò, a làmrì jii, «Vé‑ee ndzə́n mo, a m yú ji m lèm a? Vé‑ee dzəv mo, a m yú à? M yíi lò e yuv é ghàn ka, e bó a tàʼ memoʼ mè?»