Ŋgàn 15 - ŊWÀʼ NYÙY

Kisúŋnìn kee weè ki tóm njiìn wo juŋ

¹ Wìr binèr kinyo ji weè, kí wàa ker kimán, binèr ji shwǎŋ, kí ŋàʼár dòʼshwiíy.

² Fiì súŋninè, wìr dzə̀m kù yèʼéy kinyo. Kiyúŋ kí mvəʼ shuu, kù a fəə kiyúŋsì.

³ Nyùy Tàr kaʼày virə́ʼ vidzə̀m, kíy wír ve juŋe, à ve bií.

⁴ Jì yee weè dzə̀ moo kicí ke wìr yí, wù lùŋ. Kimboʼtì ki nəə sho, kí wìy a dzə̀ e nyári.

Kinyo ke wìr wo wù ŋwáy ntir, à ké wìr wo wù yú kí

⁵ Kiyúŋ kí kù yii ŋwáy ntir tàr wov ŋwáyín, yii bèy, a wìr wo wù yú ntir dzə̀ fií.

⁶ Wìr yú Nyùy, wù wàa ker bùʼ e gháʼán e wun kitàv. Wìr méŋ Nyùy, lòné nə̀ə́ e wun keŋ.

⁷ Fiì fó yéʼéy, yí tìr wíri. Njìʼ lo kfə́, wù mèŋ yéʼéy.

⁸ Wír ve á méŋ Nyùy Tàrí lóo cù wun, wù tèn cu yév. Wír ve á tíy réŋ e Nyùy kinyòo lóo bùnrì, Nyùy wàa yu vijuŋ.

⁹ Nyùy Tàr yii nyaysì liì wìr ve á méŋ wun, koŋ wír ve á yii kinyo kee tìítiy.

¹⁰ Wìr bin ndzə̀m é dzəə yee tìítiy, á sə̀r ŋgaàŋ, e màʼ ŋgeʼ sho kijuŋ. Wìr tén ntir tenén, bo wù kù yíi dù, e jòʼsì a dzə̀ é kpu.

¹¹ Mo Nyùy yén vinyo vee aŋkfəə́ wòŋ vidzə̀m, a dzə̀ wù kfə̀n mèŋ kímóʼ kí ke kí dzəə̀n e wìr shiliv á?

¹² Ŋgaà jàʼ yòʼ yii koŋ ji á tír wun, a bó yòʼ dzə̀ wù dù, e mbaà afií gheéy.

Mo shilív shí yii kér dzəʼə̀m wìr

¹³ Wìr lóo yu vijuŋ, wù wàa ŋwàŋkìr. Shilív shí ndzə́ʼə́, wù wàa dzə e nsòv.

¹⁴ Shilív shé fiì shí kù diy a dzə̀ kiíy, a kiyúŋ kí kù yú a dzə̀ fo kiyúŋsì ki.

¹⁵ Dzəʼə̀m aghéʼnceyí tàv é ŋàŋ. Yii bèy, a shilív shee nyaáŋ shí kù dzə́ kfə́, shéʼri shèʼrín.

¹⁶ A sì kùʼ, e tò é ŋgeʼ, bòŋ shishàr wùn à ghvə́m Nyùyi.

¹⁷ Bòŋ a yi vikwiíy é mvə̀m kikòŋnìn, e shaà fó a kfər mbòŋ e mvə̀m kinyàm.

¹⁸ Wìr lóo lùm shilív, wù màʼ melaà, lóo kfəmén e wun dòʼshwiíy, wù sə̀r kitáŋnìn.

¹⁹ Wìr njoó kfə́ njoón, akíghàʼá sùm wun. Wìr lóo tiy réŋ e Nyùy kinyò, vinyo və́ ví wàa ghan e mboʼ.

Ntir ye yuún fó vijuŋ

²⁰ Wàn lóo ker vifií, kitàr kí wàa sheʼrí. Wìr yúŋsi, wù wàa leéy kiyìy ntéŋ.

²¹ Yú mbuù vifiì vijuŋ e wun kiyuŋsì, a fiì yii kfə́ kinyo tìítiy.

²² Wìr buu ŋgaà ntir, antaŋ vəə́ bvəə̀rí, lóo ker, á wàa dù kijuŋ.

²³ Wìr binèr kinyo, kí shémsinè, wù wàa yu vijuŋ. Jì ye yì fəən é ghan bòŋ, e shaàsìn.

²⁴ Dzəə̀ wìr woo fií kù yii danèr wun a dzə̀ é dzə̀ʼə̀m ye dáa, kiŋsìn wun fo wù du áàŋkfəə́ wòŋ.

Kimaysì ké wìr ve á yú Nyùy, à ké wìr ve á méŋ Nyùy

²⁵ Nyùy Tàr saʼtì lav wìr wo wù ŋaʼà, kiŋsìn kéŋ wiíy ŋkfə kíŋsin.

²⁶ Nyùy Tàr nyaysì antaŋ ve bií, shéʼri kiláyláy ke juŋ ki.

²⁷ Wìr jum séʼ kiŋkùvrì, wù maʼ ŋgeʼ e wun lav, a wìr wo wù wíy shiíy dzə̀ wo wù ban kòyàr.

²⁸ Wìr yú Nyùy, wù wàa bìnèr kinyo, a mèy shintíy. Wìr wo wù méŋ Nyùy mvəʼ kfə́ shuu, kù a fəə vinyo ve bi ví.

²⁹ Nyùy Tàr kù yii yú bunrì wìr ve á yú wun, bin ndzə̀m e wír ve á méŋ wune.

³⁰ Wìr bvətì vishí, wúné bòŋ wíri. Á yú sáʼka wo juŋ, á wàa sheʼrí.

³¹ Wìr yú ntir, wù kfə̀n é fiì.

³² Wìr ŋwáy ntir, wù màʼày kitú, yú ntir, wù wàa ker vifií.

³³ À lóo ghvəm Nyùy, bo à kèʼ ne, a ker vifií. Wìr kù merìr yúnín ŋkuŋén, bo wù wáa ker ghvə́m.