Nehemia 3 - ŊWÀʼ NYÙY

Vé kibàʼrì ke kày yeé Jerusalem

¹ Eliashiv woo taà cù wo kuʼùn wùn aàŋgàa ŋgoo və́ vee atàá cùu nèn bòm Shúu Kày Njiì, e shwì Nyùy sho ji sì á woo jeéyí, e nèn wàyrí shuu si. Vé‑eè bòm kirə́v ké kày, e kèʼ fo fo, e dù, e meé e Kirùmèn kee Wiì, e kfə̀n dù, e mèé e Kirùmèn kee Hananel, e nèn shwì sá Nyùy sho.

² Wír veé Jerikòo nèn bòm ke kí‑iì batin. Sakkur woo wan Imri bóm sá ke kí‑iì səʼən kév.

³ Kfə́ə Hassenàa‑aà bòm Shúu Kày Sə. Áwune‑eè bòm, e wàyrí aŋkoytì wùn à shuu si mo sí‑iì dzəə̀n, e wàyrí mfìn si wùn à kóŋ sí.

⁴ Meremot woo wan Uria woo wan Hakkos náŋsín kirə́v ke kí batin. Meshullam woo wan Berekiya woo wan Meshesabel náŋsín sá kímóʼ kí. E wun bàm, wáa dzə Tsadok woo wan Baana wo wù‑uù naŋsin sá fómóʼó.

⁵ Wír veé Tekoàa náŋsín ke kí‑iì batin, yii bèy, a vilìmbìy vév ví yòʼ‑oò lo wày kiwó kév é lìm ye wír ve á danèr áwuneé‑eè foon.

⁶ Wír ve vé‑eè naŋsin Shúu Kày woo Jeshanàa dzə̀ ji Joyiada woo wan Pasea wùn Meshullam woo wan Besodeya. Áwune náŋsín bey, e neèr aŋkoytì, e wàyrí shuu si wùn à mfìn si, à kóŋ sé mfìn si.

⁷ Kirə́ʼ ke kí‑iì dzəə̀n aáwuné ghaŋ ki dzə̀, a yì‑iì nàŋsín Melatia woo wír woó Gibeon wùn à Jadon woo wír woó Meronot, à wír veé Gibeone, à veé Mispàa, Mispa wo yì‑iì dzəə̀n kirə́ʼ ké dzə ke ŋgaà saʼ woó mbìv wòŋ ye á liysin ne Yufret.

⁸ Ussiel woo wan Harhaya, a dzə̀ taà kilàm kishà ke mbàm ke baar kí, náŋsín ke kí batin. Hananiya wo wù‑uù fer sa vishàŋsìn ve sùsù nèn nàŋsín kee wun ghaŋ. Áwune‑eè nàŋsín kay e Jerusalem, e dù, e mèé e Kày yee Kimà.

⁹ Refayia wo wù‑uù sáʼ mbìv yìmòʼ fó kimbàr ke wòŋ ke dzəə̀n kee Jerusalem, a dzə̀ wan Hur nèn nàŋsín ke kí‑iì batin.

¹⁰ Aáwuné bàm, Jedayia woo wan Harumav nèn nàŋsín kilíŋ ke kí‑iì batin, a kí dzə̀, a dzə̀ e wun ghaa lav. Hattush woo wan Hashavneya náŋsín ke kí batin.

¹¹ Malkija woo wan Harim wùn Hashuv woo wan Pahat‑Moav nèn nàŋsín kilíŋ kímóʼ kí wùn à Kirùmèn ke Kiy se bomén sí.

¹² Shallum woo wan Hallohesh, a sáʼ wun mbìv kibàr ke Jerusalem kímóʼ kí, nèn nàŋsín kilíŋ kímóʼ kí, a wón və́ vee vikìyí‑iì tòm wun.

¹³ Yì‑iì nàŋsín Hanun wùn à wír ve vé‑eè dzə́ e Sanoàa Shúu Kày woo fó mboʼ. Áwune‑eè nàŋsín, e wàyrí shuu si wùn à mfìn si, à kóŋ sé mfìn si, e kfə̀n nàŋsín sa kirə́v ké kày, e dù, e mèé e Shùu Kày wo wú kiʼ róŋ, a kí dzə̀ kóy kishóv mtàn e ghiì baà.

¹⁴ Malkija woo wan Rekav‑iì nàŋsín Shúu Kày wo wú kiʼ róŋ. Wù‑uù bòm, e wàyrí shuu si wùn à mfìn si, à kóŋ sé mfìn si. Rekav‑iì dzə̀ ŋgaà saʼ woó kimbàr ke wòŋ kee Bet‑Hakkerem.

¹⁵ Shallum woo wan Kol‑Hose nèn nàŋsín Shúu Kày wo wú kiʼ dàn. Wù‑uù bòm, e wày vitú, e wàyrí shuu si wùn à mfìn si, à kóŋ sé mfìn si. Wù kfən nàŋsín kirə́v keé ghaa Kisə̀m kee Shela e fòn ghaa sum, e dù, e mèé mo á sèʼtìn dzə́ə ye yì sə́y fo Ŋkàlaʼ Davir. Shallum‑eè dzə̀ ŋgaà saʼ woó kimbàr ke wòŋ kee Mispa.

¹⁶ E wun bàm, Nehemia woo wan Asbuk náŋsín ke kí batin, e dù, e mèé e ŋkìʼnìn fə̀m sé rám Davir, e kfə̀n dù, e mèé e kisə̀m ke tuŋén kí, e shaà dù, e mèé fo láʼ vé rərí dzəə̀n. Nehemia və̀n‑eè dzə̀ wír wo wù‑uù sáʼ kimbàr ke wòŋ kee Bet‑Sur.

¹⁷ E wun bàm, wír veé ram Levìi nèn nàŋsín kév, aá lim e Rehum woo wan Bani sar. Hashabia wo wù‑uù sáʼ mbìv yìmòʼ fó kimbàr ke wòŋ ke dzəə̀n kee Keyla, náŋsín sá ké wùn à wír vəə́ fó ghaŋ.

¹⁸ E wun bàm, afə́r véví náŋsín kév, aá lim e Binnuy sar, a dzə̀ wír wo wù‑uù sáʼ mbìv yìmòʼ fó kimbàr ke wòŋ ke dzəə̀n kee Keyla kímóʼ kí, a wù‑uù dzə̀ wan Henadad.

¹⁹ Eser woo wan Jeshua nèn nàŋsín ke kí batin, e kèʼ fo mbìv ye yì kiʼ dzə́ə ye yì sə́y e kitàv ké vifa ve rər, e dù, e mèé fo kayi duùn, e bvə̀nén. Eser‑iì dzə̀ ŋgaà saʼ woó Mispa.

²⁰ E wun bàm, Baruk woo wan Tsabbay nèn nàŋsín mbìv yìmòʼ, e kèʼ fo Kimbvən, e dù, e bàʼ e shuù wo wú nəə e taà cù wo kuʼùn woo Eliashiv lav.

²¹ E wun bàm, Meremot nèn kfə̀n nàŋsín mbìv yìmòʼ, e kèʼ fo taà cù wo kuʼùn woo Eliashiv shùu lav, e dù, e màysì fo lav tiimen. Meremot‑iì dzə̀ wan Uria, a Uria dzə̀ wan Hakkos.

²² E wun bàm, atàá cù ve vé‑eè dzəə̀n é ŋgvən see fó ghaŋe nèn nàŋsín kirə́ʼ ke kí‑iì batin.

²³ Aáwuné bàm, Benjamin wùn Hashuv nèn nàŋsín mbìv ye yì‑iì kiʼ láʼ yév. Aáwuné bàm sá, Asaria nèn nàŋsín kee wun ŋkìʼnìn lav. Asaria‑aà dzə̀ wan Ma‑Aseyia, a Ma‑Aseyia dzə̀ wan Ananiya.

²⁴ E wun bàm, Binnuy woo wan Henadad nen kfə̀n nàŋsín fómóʼó, e kèʼ fo Asaria ghaa lav, e mèé e Kimbvən, e dù, e bàʼ e kor kày.

²⁵ E wun bàm, Palal woo wan Usay nèn nàŋsín mbìv ye yì‑iì dzəə̀n é ŋkìʼnìn Kimbvən wùn à kirùmèn ke kí somèn fo ntoʼ kùy e nsheèlav sí shùu maàndzə. E wùn bàm, wáa dzə Pedayia woo wan Parosh,

²⁶ e bóo lì vé lìm veé lav cù ve á dzə́ e gwan Ofel. Wùn áwune‑eè nàŋsín virə́ʼ, e dù, e meé e ŋkìʼnìn Shùu Kày Ndzəv fo kirùmèn ki somènè, e mbìv yee fo shùy yii tó.

²⁷ Aáwuné bàm, wír veé Tekoàa nèn kfə̀n nàŋsín kirə́ʼ kímóʼ kí kee kèʼ fó ŋkìʼnìn kirùmèn ke ghaʼtín kí, ke kí somènè, e dù, e bàʼ e wǔn kày yeé Ofel.

²⁸ Atàá cùu‑uù nàŋsín mbìv kùy Shùu Kày Nyàm se Ŋkoʼ, a wìr náŋsin kirə́ʼ ke kí kiʼ shúu lav və́.

²⁹ Aáwuné bàm, Tsadok woo wan Immer nèn nàŋsín ke kí kiʼ lav rə. E wun bàm, Shemayia wo wù‑uù leey Shúu Kày woó mbìv yee fo shùy yii tó, nèn nàŋsín kímóʼ kí. Wù‑uù dzə̀ wan Shekania.

³⁰ E wun bàm, wáa dzə Hananiya woo wan Shelemia wùn Hanun woo wan Tsalav wo wù meen ji ntuùfú. Áwune‑eè nàŋsín mbìv yev yìmòʼ fó. Aáwuné bàm, Meshullam woo wan Berekiya nèn nàŋsín kee wun ŋkìʼnìn laʼ.

³¹ E wun bàm, Malkija wo yì‑iì dzəə̀n sá wùmòʼ woo taà kilàm kishà ke mbàm ke baar kí, nèn nàŋsín ke kí batin, e dù, e mèé e ghaa lav ye dzəə̀n ye vé lìm veé lav cù, à ye wónlě way, a yì kiʼ Shúu Kày fo á yii báʼti mànjòŋ, e dù, e bàʼ mo lav yeé kitu ke kor kày dzəə̀n.

³² Vé kilàm ke kishà ke mbàm ke baar kí wùn à vé wayí nèn nàŋsín ke kí jòʼsìn, a kí kéʼ fó lav yeé kitu ke kor kày, e dù, e mèé e Shùu Kày Njiì.