Kintaŋ 8 - ŊWÀʼ NYÙY

Aaron tiír kitiir ke làm

¹ Nyùy Tàr lò, e yòŋ e Mooser jii,

² «Suúy e Aaron ji wù yíi tiír a lam see saàmbà, é sí wáa kàʼày virə́ʼ é mbìy kitiir ke làm.»

³ Aaron ku nèn yiì bèy, e tìír lam, sí wáa kàʼày virə́ʼ é mbìy kitiir ke làm réŋréŋ mo Nyùy Tàr‑iì yòŋèn e Mooser.

⁴ Dzəə̀ ye vé‑eè fèrìn kitiir ke làm sho‑oò dzə̀ jii, vé‑eè lì kisha ke mbàm ke baar kí, e dzə̀vtì, e nèn fèr sho, e kèʼ fo sar, e dù, e meé e vibuùshì, e nàŋsín fó yuv. Á kù‑uù fèr réŋréŋ mo Nyùy Tàr‑iì dìnèn e Mooser.

Á sháv wír veé ram Levi ji wír vee jeéyí

⁵ Nyùy Tàr kfən lò, e sùúy e Mooser jii,

⁶ «Fəə́r wír veé ram Levìi fo wír veé Israyí mvəm, e *kfə̀mrí áwune.

⁷ Dzəə̀ ye à kfə́mrí áwune shó dzə̀ jii, à yíi waŋrí mendzə́v me ŋkfəmrì aáwuné wùn, e nèn yòŋ, aáwune kóm wún wóv e dzə̀m, e sù ndzə̀y sév. À yii bèy, bo à kfə̀mrí ne áwune.

⁸ Áà nèn yòŋ, aáwune wiy e wàn nàʼ woo lumèn wùn à cu vifa ve yi ve á yíi tatí shoo, a dzə̀ ji meŋkfəŋ me kpuún mè, aá shwír ne meŋgvə́r shó, áà nèn kfə̀n tàʼ wan nàʼ woo lumèn wùmòʼ ji wo cù ajay.

⁹ À yíi koʼór wír veé ram Levi e shùu *kibàn ké ntàsín, e banén màŋgòŋ woó Isray e dzə̀m.

¹⁰ À kóʼor áwune e Nyùy Tǎr si bèy, é wír veé Israyi neer wó yév aáwuné kitu,

¹¹ é Aaron nèn fò áwune e Nyùy Tàr ji cu ye nanèné ye yí loòn fo wír veé Israyi, aáwune wáa dzə, a yiì kév a dzə̀ lím Nyùy Tàr.

¹² Aaron yii bèy, é wír veé ram Levìi nèn neèr wó yév aànàʼá kitu, áà nèn lì wo mòʼón, e cù Nyùy Tàr shó ji cu ajay, e lì wùmòʼ ji wo cù ye tonèné, e fíʼ manrí ajay wìr veé ram Levi sho.

¹³ Áà nèn kòʼór wír veé ram Levi vìn e Aaron wùn à wón vəə́ si, e wày aáwuné wo ji cu Nyùy Tàr ye nanèné.

¹⁴ «Á mo à wíy fəə́r wír veé ram Levi fo wír veé Israyí mvəm, e lèm jeéy, aáwune wáa dzə ji wír vém.

¹⁵ À maysì kfə́mri áwune, kfə́n fó áwune ji cu Nyùy Tàr ye nanèné, aáwune nèn wìy a yiì lim yév é kibàn ké ntàsín.

¹⁶ Á ku fə̀ə́r áwune fo wír veé Israyí mvəm, e fò e mò ŋkuuŋkùŋ ji ŋkùvtu wòn veé Isray vee dzə́ə mbìyi. M lì ne áwune ji aŋgàa lìm vém.

¹⁷ Kifá kee lumèn kidzə̀m keé Isray ke dzəə̀n dzə́ə mbìyi kí dzə̀ kém, kìn dzə̀ wír, kìn nyám. Mò‑oò yùyrí kifá kidzə̀m ke dzəə̀n dzə́ə mbìyi é Ejiv, e bàvtí keé Isray, e lèm jeéy ji kifá kém.

¹⁸ M nen lì lèn wír veé ram Levi fo wír veé Israyí mvəm ji á li á kirə́ʼ ké won vee vilum adzə̀m vee dzəə́ mbìyi e wír veé Israyí mvəm.

¹⁹ M shòʼ ne wír veé ram Levi, e fò e Aaron wùn à wón vəə́ ji ŋkùvtu wìr veé Isray. Áwune kù wíy a lìm e kibàn ké ntàsín e wír veé Israyí kiliŋ fo virom vímóʼ ví lo, e gbù aáwuné kitu e ghan se á loòn, e kòʼtí e ghaa kibàn ké Nyùy.»

²⁰ Mooser wùn à Aaron, à màŋgòŋ woó Isray ku nèn yiì kinyo kidzə̀m réŋréŋ mo Nyùy Tàr‑iì yòŋèn e Mooser ji á yii e wír veé ram Levìi.

²¹ Wír veé ram Levìi kfə́mrí vitú vév, e sù ndzə̀y sév, Aaron nèn fò áwune moo cu ye nanèné e Nyùy Tàr. Wù kfən yiì cu yée man ajay vév shó.

²² Kee shooy ki shaà, wír veé ram Levìi nèn wìy, a yiì lim yév é kibàn ké ntàsín e Aaron wùn à wóné sar. Vé‑eè lo yiì vinyo vidzə̀m réŋréŋ mo Nyùy Tàr‑iì yòŋèn e Mooser ji á yii á e wír veé ram Levìi.

²³ Nyùy Tàr kfə̀n‑eè sùúy e Mooser jii,

²⁴ «Nsər yee kùm wír veé ram Levi dzə̀ jii, vilum vee kèʼ fó kiya nshòv sitàn e mbaà, a dù duùn fó mbìyi wíy a yiì lim e kibàn ké ntàsín.

²⁵ Wìr mee kiyá mtàn, é wù nèn dù fo meèmè, e màʼtì lim.

²⁶ A dzə̀ wír woo bey, wù wàa sə afə́r və́, a lìm e kibàn ké ntàsín, yii bèy, a bó yòʼ dzə̀ ji kfə̀n lim a wun. Á mo à wíy a fo lim e wír veé ram Levìi ben.»