Kèʼlo 3 - ŊWÀʼ NYÙY

Mo wír mbìyi tavin kitú fo Nyùy

¹ Á bèy, fo mvə̀m vifa ve Nyùy Tàr, wun woo Nyùy‑iì bomen, yò nèn fìír, e shaà vifá vidzə̀m. Yì lò, e dzə̀r e wiíy jii, «Nyùy kù yòʼ‑oò lo shàʼnín rú ji lá vèn yòʼ kfə̀r kicí kímóʼ kí fó kiboo fen a?»

² Wiíy bìnèr sho jii, «A dzə̀ vèr kfə̀r vicí veé kiboo fen vidzə̀m.

³ Yii bèy, Nyùy‑iì lo sùúy ji lá vèr yòʼ kfə̀r á kicí ke kí tíy e ntìntìn kiboò. Vèr wáa yen saa fóo kùm. A vèr mùm, bo vèr kpùkír a ne.»

⁴ Yò nèn sùúy e wiíy jii, «Bó vèn yòʼ yíi kpu gheéy.

⁵ Nyùy‑iì yoŋ bèy, bìʼ fo wù‑uù kiìn ji a vèn kfə̀r, é vifií vén ví mvəʼəm, é vèn wáa dzə moo wun woo Nyùy, a kiíy jeéyjeéy fó kinyò ke juŋ ki wùn à ke bi kí.»

⁶ Wiíy leéy kicí kiy, e yèn, a kí bóŋ féyì fó kfər, e kfə̀n yèn, a kí kiʼ kijuujùŋ, a kòŋ feyì fóo kfər, a ker vifií. Wù nèn kòy, e kfə̀r, e kfə̀n fò lúm və, wù kfə́r sá.

⁷ Kù mo áwune kfərin bey, vifií vév ví nen mvə̀ʼkìr, áwune yén ji á dzə̀ á kinshóʼ, e nèn kèŋ vav se kici ké *fig, e baàné, e fèr atéʼ vév shó.

⁸ Lòo meé e kimbòrndzə, lùmèn və̀y wùn wiíy yú nsən se Nyùy Tàr, a sí giv e mvə̀m kiboò, e nèn nyèŋ, e nə̀ə́, e lìr fo Nyùy Tǎr si, e mvə̀m vicì veé kiboo fey.

⁹ Yii bèy, Nyùy Tàr yòŋ lumèn, e dzə̀r shó jii, «À bèé?»

¹⁰ Wù bìnèr jii, «M kì yù, a nsən sé si giv e mvə̀m kiboò, m nén a fàn, e nyèŋ, e lìr, bìʼ fo m kì dzəə̀n kinshóʼ.»

¹¹ Nyùy Tàr nèn dzə̀r jii, «À ghàn é le, bóo kiíy ji à dzə̀ kinshóʼ? À kfə̀r ne kicí ke mò‑oò shaʼnin ji lá à yòʼ kfə̀r kiy à?»

¹² Lùmèn bìnèr jii, «Kì fò wiíy wo wò‑oò foon ji vèr wun wáa dzə, é bo m kfə́r.»

¹³ Nyùy Tàr dzə́r e wiíy jii, «À yèe le, bóo lovtí bèn?» Wù bìnèr jii, «Kì bòʼtí yó mo, é bo m kfə́r.»

Ŋgeʼ ye Nyùy màʼàn é bǎm jay wìr

¹⁴ Nyùy Tàr nèn sùúy e yò jii: «Mo à kì boʼtin wiíy, fo vifa ve ŋeʼèn ví, veé kwaʼ wùn à veé laʼ vi, m shòv ne wò. Kèʼ fo lán, à sí wìy a son sonén a dzə̀ e bvə́me, é viyíkìr vé vi wáa dzə nsay nsay, e dù, e meé mo à wíy kpu.

¹⁵ M yíi màʼ vibàn e vèn wiíy nsàn, e kfə̀n màʼ e rám yée, à yé wiíyi. Wìr woo wun ram wíy bvə́ʼ kitú ké, áà wìy tè wun fo nsən kiwuù.»

¹⁶ Fo ké wiíy ki, Nyùy suúy jii: «M wíy dzə̀sì ŋgeʼ yè e ŋàáŋàŋén é ghan se à dzəə̀n e bvə́me, e dzə̀sì nyár yé e ghan se à dzəə, aà kù wíy a baŋrí a dzə̀ lum wò, a kù wíy a ker wun sáʼ, áà wáa yu fo fo.»

¹⁷ Fo lùmèn kiliŋ, wù suúy jii: «Mo à yuun ji wiiy wò, e kfə̀r kicí ke mò‑oò shaʼnin e wò ji lá à yòʼ wìy kfə̀r, m shòv ne nsay bìʼ wò. Dù meé mo à wíy kpu, à kù wíy a sòrkìr sòrkìn, e bó a koóy kifá fo nsay, a yi.

¹⁸ Vikwiíy vé njoŋ vi wùn à kivi wíy a fəə e nsay, aà kù wíy a lùŋ a dzə̀ fó vifa ve à lìmèn é nsay.

¹⁹ À wíy a lìm, a ndzə̀ʼnìn, e bó a koóy kifá ké a yi. Kù bey, e meé e ghan se à wíy kpu. Mo mò‑oò bomen wò e nsay, aà dzə̀ nsay, à kù wíy kfən e nsay.»

²⁰ Adam nèn lò, e shù yír wiiy və ji Efa, bìʼ fo wìr msòŋ e dzə̀m kù‑uù wíy ràm a dzə̀ fo wun.

²¹ E ghan sin, Nyùy Tàr nèn fèr ndzə̀y e jùv nyàm, e màʼ e Adam wùn wiiy və́ wùn.

Nyùy júm Adam wùn Efa fo kiboo keé Eden

²² Á bèy, Nyùy Tàr nèn lò sùŋnín jii, «Yén ri, wìr sì moo vèsən, kiiy jeéyjeéy fó kinyò ke juŋ ki wùn à ke bi kí. Lá á yòʼ màʼtì, é wù koy kicí ke kí fó dzəʼə̀m, e kfə̀r, e wìy shaàrì.»

²³ Nyùy Tàr nèn jùm wun fo kiboo keé Eden ji wù du, a lìm nsay ye vé‑eè liìn, e bòm wun sho.

²⁴ Wù jùm, e lèm vifá veé yuv ve ghaʼtín ví é mbìv kiboò yee fo shùy yii tó ji lá wìr yòʼ shaà, e dù fo kicí ke kí fó dzəʼə̀m ki dzəə̀n. Wù kfən lèm nyùy ye yì‑iì bavkìr moo kiliímé ke və̀y, binkìr mbìv sidzə̀m, ji yì wáa kìŋsìn sa.