Jona 4 - ŊWÀʼ NYÙY

Jona shwiíy kilòŋ bìʼ Nyùy wo wù shamen Nineve

¹ Mo Nyùy shamen wír veé Nineve bèy, kí bír Jona feyì. Wù wáa shwiíy kilòŋ.

² Wù nèn a bùnrì, a suúy e Nyùy Tàr jii, «Éè Nyùy Tàr, kí kúvsín fó kinyò ke mò‑oò suuyin, a m dzə̀ə́ fo laʼ a? Á kinyè ké kinyò ke kí‑iì yiìn, é bo m túmnín, a leʼ, a dù e Tarshish. Mò‑oò kì jii, à dzə̀ Nyùy wo wù rə́r mendzən me wíri, shám áwune, a bó à yòʼ táv shwiiy kilòŋ. À yòʼ yii yar fó dìn koŋ yé ye wiyí e wíri. À yòʼ yii koŋ, a màʼ ŋgeʼ e wìr kitu.»

³ Á bèy Nyùy Tàr, ku màyìr dzəʼə̀m yémé. Bòŋ ke m kpú, e shaà fó a dzə, a yen dzə́ə ye vinyo vi du sho bèn.

⁴ Nyùy Tàr suúy shó jii, «Kù yòʼ dzə̀ ghay wó fó a shwiíy kilòŋ á?»

⁵ Jona nèn fəə̀sín fo ŋkàlaʼ fèy, e dù, e dzə̀ʼə̀m e kirə̀ʼ kímóʼ kí, é mbìv ye shùy yii tó fo fo. Wù nèn lò, e tùy táv və́, a beè shúy e sar wo, a shìy kinyo ke kí yíi koóy Nineve.

⁶ Nyùy Tàr, wun woo Nyùy nèn lò, e yiì, tíŋ kifa kímóʼ kií kúy, e rə̀ŋsìn, a fo kindzə̀ə́ndzəm e Jona kitu, é wù fíʼ a ker rəsìn. Á bèy, Jona nén a yu vijuŋ feyì bìʼ tíŋ kifa kee shooy.

⁷ Ndzə bvəə́shí, e jàv, Nyùy tsə́nsí koʼòr, yì yí tíŋ kifa kìy, kí yóvrí, e yùm.

⁸ Shùy yiì tò, Nyùy tsə́nsí shwér wo wú‑uù wiy fo mbìv ye shùy yii tó fo fo, a wú lum ji báv. Shùy kfə́n a ban sa Jona e ŋàŋ, wún vəə́ lùm, wù wèvrì. Wù wáa siimé kpú, a suúy jii, «Bòŋ ke m kpú, e shaà fó a dzə sho.»

⁹ Nyùy suúy e Jona jii, «Kù yòʼ dzə̀ ghay wó fó a shwiíy kilòŋ, a dìy tíŋ kifa və̀n a?» Jona bìnèr jii, «Kí bìr mo féyì, a m koŋ lèn e kpu kpuún.»

¹⁰ Nyùy Tàr suúy shó jii, «Shii wò dzə̀ ka é tiŋ kifa fèn, wo à dìyìn é ŋàŋ ben, a bó yòʼ‑oò bìy wò, a bó yòʼ‑oò yiì wò, bo wú kúy. Wú‑uù fəə̀, e kùy, e bvəə̀shí, e yùm.

¹¹ Dzə̀ ji lá m yòʼ a dìy ŋkàlaʼ ye kuʼùn yeé Nineve rə̀n à? Yì kér wíri e shaà ansə̀kì kishóv mbaà é wiì (120,000), a wír vìne‑eè dzə́, a bó á yòʼ kì jeéyjeéy fó kinyò ke bi kí wùn à ke juŋ ki. Ŋkàlaʼ rə̀n kfə́n a dzə, a nyám si dzə̀ sá sho sineénín.»