Jeremia 21 - ŊWÀʼ NYÙY

Jeremia yíysí ji á wíy tòn a Jerusalem

¹ Nyùy Tàr kfən lò, e tiìsí ntum rə e mò, a ghán sin si‑iì dzə̀, a Fòn Tsədekiya woó Juda tsə́nsí ne Pashur woo wan Malkia, wùn taà cù Tsəfaniya woo wan Ma‑Aseyia ji á wiy, e yèn á mo woo Jeremia ji

² m ku bùʼ á wó e Nyùy Tàr, bìʼ rə́r se Nebukadnessar woo fon woó Babilon sí nəə áwune shó. M ku lòn á ji kìn Nyùy Tàr‑íì yii viŋgaʼnìn və́ vé vinyò mo wù yii yii, e kiír Nebukadnessar fo áwuné wùn.

³ Nyùy Tàr nèn sùŋnín e mò woo Jeremia, m bìnèr aáwune jii,

⁴ «Vèn du, á sùúy e Fòn Tsədekiya ji Nyùy Tàr woo Nyùy wìr veé Isray sùúy a jii, ‹Vèn leéy, e yèn mo fòn woó Babilon wùn à vé rər vəə́ gìŋèn ŋkàlaʼ yen, e kaàrí, e tàr. Vèn yíi fəə e vifá ve rər ví, taáme áwune shó, é m biner ji kifá kisáŋ. Rúrú, m yíi lì aŋgaà vén vibàn, e nəə́ sho e ntìntìn ŋkàlaʼ fèn.

⁵ Mómò kitú kém, mo kí nyarin mo é ŋàŋ, dòʼshwíiy wom kóʼ, m yíi fùnèn ven vitaáví vém vidzə̀m.

⁶ M yíi bvəʼə́y kifá kidzə̀m ke kí dzəə̀n é mvə̀mlaʼ fèn. Kifə̀ʼ ke tavín kí yíi tatí, e teè wíri wùn à nyám si.

⁷ M yii bèy, é m li Tsədekiya woo fon Juda wùn à vé saʼ vəə́, à wír veé ŋkàlaʼ ve á bòyìn fó kifə̀ʼ, kìn fó rər, kìn fó jiŋ, e way e Nebukadnessar woo fon woó Babilon kiwo, é wùn aàŋgàa vibàn véví lóvtí aáwune lóvtín. Wù kù wíy fo sáʼ ji á gwati áwune, aá kpúkír. Wù yòʼ wíy bavtí áwune, a wù yòʼ wíy rər mendzən mev, a wù yòʼ wíy sham áwune. Kù suuy mo woo Nyùy Tàr.› »

⁸ Nyùy Tàr nèn kfə̀n sùúy ji m yoŋ á lèn e wìr dzə̀m jii, «Mo woo Nyùy Tàr, m neer vinyo e věn si vibaà, luŋ wùn à kpúu.

⁹ Wír wo wù yíi gòʼ e ŋkàlaʼ fèn, yíi kpu rə́r, aámóʼó kpú jíŋ, aámóʼó kpú kév a dzə̀ kifə̀ʼ. Yii bèy, a wìr wo wù yíi fo shiŋkfəŋ e wír veé Babilon ve á gìŋèn vené yíi bòy, e leʼ e kitú kfə́ kí, é dzəʼə̀m rəə́ goʼ.

¹⁰ M kù wày ne wayín ji m maʼ a ŋgeʼ e ŋkàlaʼ fèn, é la réŋ yòʼ a dzə fo. Suuy mo woo Nyùy Tàr. M lo, e way ŋkàlaʼ rə̀n e fòn woó Babilon kiwo, é wù laar e və́yí.»

Nyùy wíy màʼ ŋgeʼ e fòn woó Juda wùn à kfə́ə rəə́

¹¹ Nyùy Tàr nèn yòŋ ji m suúy á e fòn woó Juda wùn à kfə́ə rəə́ jii, «Vèn yuúrí kinyo ke Nyùy Tàr suuy ki.

¹² Nyùy Tàr suuy jii: « ‹Ven vee rám Davir, vèn wáa tinén vinyo vi tìítiy ghán sidzə̀m. Vèn wáa sə wír wo á bóʼó fo ŋgaà mbóʼmé wo. Kí búŋ fó bèy, bo liì won kisaŋ yíi yiì, é dòʼshwíiy wom kóʼ, a wù yíi a baarí moo və́y, là ŋgaà ndzə̀mér.

¹³ Éè Jerusalem, m yíi fùnèn ven. Vèn yén ji vèn dzə̀ á kirùmèn ke kí gaá e mboʼ. Vèn dzəv nsaŋ jii, a dzə̀ taàmé la ver? Kfə̀n dzəv jii, a dzə̀ bvə̀ʼ la kikum ke kày kér?

¹⁴ Rúrú, m yíi màʼ ŋgeʼ e věn kitu mo yii yéné dzəə̀n. M yíi tòn ntoʼ yen e və́yí, e tòn kifá kidzə̀m ke kí kaarin fó, e tàr. Suuy mo woo Nyùy Tàr.› »