Hosea 3 - ŊWÀʼ NYÙY

Hosea wùn wiiy və woo ŋgaà joònè

¹ Nyùy Tàr kfən lò, e sùŋnín e mò, a suúy jii, «Kfən dù, e dìn koŋ yée e yeè lav wò. Abaày, wiíy, a taà lav və kóŋ ben, wù gháʼ e gháne, e dù, e yèn lumèn wo sən. Kú a kòŋ wun réŋréŋ mo m kù dzəə́ koŋ wír veé Isray, fə̀m mo áwune loòn ne, a ghvəm anyùy ámóʼó, a kòŋ fó a cù áwune.»

² M ku nèn dù, e tìn yeè lav wom, e fò mbàm *ashekel nshòv sitàn e ghvə̀m, a dzə̀ woo kisha ke mbàm ke fəvír kí, e kfə̀n fò tin se saŋ yee *barli nshòv sitàn e ghvə̀m.

³ Mò‑oò tìn bey, e kù nèn a shìvìr sho jii, «À kér fó yìi dzə̀ʼə̀m wòsò ntàmda, aà yòʼ kér fóo yiì a ghan viŋkar, kìn ji lumèn wùmòʼ ghár kóy wó. Mómò kitú kém, m kér fó yìi kur tím, e shìy wò.»

⁴ Kù dzə̀ sá réŋréŋ mo wír veé Israyi wíy dzə̀ʼə̀m ntàmda, là fon, kìn taà ntoʼ. Áwune yòʼ wíy a yiì cu, a bó á yòʼ wíy a ker sə́y se á yii cu fo, kìn atàá cù, kìn mebvə̀m mé a ghvəm.

⁵ Yii bèy, a ghán sí wíy gheén, é wír veé Israyi binkir, a leéy a dzə̀ Nyùy Tàr woo Nyùy wov, e kfə̀n a leéy wír wo wù wíy fəə fo Davir ram, a dzə fon wov. Wíy lòo dzə e ghan sé bàm sí, aáwune wáa koʼtí e Nyùy Tǎr si, a fàn, a yàʼ, a kìʼ kisəəvì a dzə̀ ke fó wun woo Nyùy.