Hosea 1 - ŊWÀʼ NYÙY

¹ Vinyo ve ví dzəə̀n é ŋwàʼ fèn vi dzə̀ ve Nyùy‑iì lo, wù sùŋnín e Hosea woo wan Beeri, e tiìsí sho. Wù‑uù kèʼ, a suŋnín e wun e ghan se Ussiya‑aà sáʼ ji fon woó Juda, e kù a suŋnín e Jotam ghan, a suŋnín e Ahas ghan, e kù a suŋnín sa e ghan se Hesekiya‑aà sáʼ Juda. Ghán sin si‑iì dzə̀, a Jeroboam woo wan Jehoash sáʼ mbìv wòŋ yee kuy ye dzəə̀n ji Isray.

Dzəʼə̀m Hosea wùn wiiy vəə́ din kinyo ke Isray wùn Nyùy

² Yì‑iì dzə̀ é ghan se Nyùy Tàr‑iì kèʼèn, a suŋnín e Hosea ji wù lo ntum rə, wù‑uù sùúy shó jii, «Dùu, e tàʼ wiíy, e wày é lav, lóo way, à wàa kiíy ji yeè lav wò və̀n wíy a ghan a ghán kisaŋe, e dzəə́ wón é ndzə. Kù dzə̀ kíwun ke wír vémé yii e mò. Á ŋwày ne mo woo Nyùy Tàr, e toòmé liì kisaŋ, a cù anyùy ve səné.»

³ Á bèy, Hosea ku nèn wày Gomer woo wan Diblayim e lav. Wù tiím bvəm, e dzə̀ə́ wán wùn wun, a dzə̀ woo lumèn.

⁴ Nyùy Tàr nèn sùúy e Hosea jii, «Shù yír wan və̀ne ji ‹Jesreel›, bìʼ fo ntàm yòʼ‑óò dar, a bó m máʼ ŋgeʼ e fòn woó Isray kitu, bìʼ yúyrí ye Jehu woo tàr à ràm yév‑iì yuyrin wíri é Jesreel. M wíy màyìr sáʼ yév fó Isray.

⁵ Ghán sin si wíy gheén, é m sə́ʼə́r kóy vé rər veé Isray e Kiwoóy ké Jesreel.»

⁶ Gomer kfən tìím bvəm, e dzə̀ə́ wán wiíy. Nyùy Tàr suúy e Hosea jii, «Shù yír wan və̀ne ji ‹Làmèndzən›, bìʼ fo bó m yòʼ dzəə́ wìy rər mendzən me wìr veé Isray, kìn féyì ji m laysin ajay vév.

⁷ Yii bèy, fo ké wìr veé Juda ki, m yíi sham áwune. Mo woo Nyùy Tàr woo Nyùy wov, m yíi bòyìr áwune fo aŋgaà vév vibàné wo, a bó yòʼ dzə̀ e vifá ve rər ví, kìn dzə̀ nyùy sé rər, kìn dzə̀ vinte wùn à mvən si, kìn nyám se ŋkoʼ, kìn vé rər vee aŋgàa koʼ.»

⁸ Gomer shóʼ wán woo wiíy və̀y fo vin, e kfə̀n bòŋ bvəm yímóʼó, e dzə̀ə́ wán lumèn,

⁹ Nyùy Tàr nèn kfə̀n yòŋ e Hosea jii, «Shù yír wan və̀ne jii, ‹Bó yòʼ dzə̀ wír vém.› Ku shù bèy, bìʼ fo wír veé Israyi yòʼ dzə̀ə́ wír vém, a m yòʼ kfə̀n dzə̀ə́ Nyùy wov.

¹⁰ «Yii bèy, wír veé Israyi dzəə́ wìy kùʼ, a dzə moo síy seé rìbà ndzə̀v, a bó á yòʼ wíy yu fó taŋ. A kí dzə̀ jii, e kirə̀ʼ fo vé‑eè yoŋ áwune ji ‹Vèn yòʼ dzə̀ə́ wír vém›, dzə̀ fo á wíy a yòŋ áwune ji ‹Wón Nyùy wo wù gòʼòn kàŋ mòʼón.›

¹¹ Wíy lòo dzə e ghan see shooy, é wír veé Juda wùn à veé Israyi tár shuu, a dzə kifá kimòʼón, tár bèy, aá nèn shòʼ kilìmbìy kév kimòʼón. Áwune kfə̀n wíy taʼám moo vifá veé sum ve ví fəən, a tèʼ. Rúrú, kishiíy ké Jesreel kìn ki wíy a dzə kishiíy ke tavín kí.»