Cù 3 - ŊWÀʼ NYÙY

Cu kikòŋnìn

¹ «Wìr lóo cù Nyùy Tàr e cu kikòŋnìne, a wù fó a dzə̀ nyám fo ŋgoo nàʼ, bo wù kù táy a dzə̀ yee là nsem, kìn dzə̀ yee lumèn, kìn dzə̀ yee wiíy.

² Wù yíi wìy sho e shùu *kibàn ké ntàsín, e neèr kiwó kfə́ é kitu wo, e see fo, áàtàá cù vee wón Aaron vee vitó vəə́ nèn lì mensə́, e wàŋ é virəv vé kiy cù vidzə̀m.

³ Fo nyàm rə̀n ye dzəə̀n ye cù kikòŋnìn, wù yíi fo virə́ʼ vímóʼ ví ji cu Nyùy Tàr ye və́yí bin fo fo. A wù yíi fətí a dzə̀ fóm se sí sùmèn vifá veé bvə̀m, à se sí dzəə̀n é wǔn vito si,

⁴ e lì ndzəʼ see sibaà, à fóm sə́ se sí dzəə̀n é shintay si, e shoʼ kimbày ke bày, e tatí wùn à ndzəʼ si.

⁵ Wón Aaron vee vitó və́ vee atàá cùu yíi lì, e tòn e kiy cù, aá ku neèr a dzə̀ é kitu ke cù ye tonèné, ye yí siìn é kitu ke meŋkàʼ. Dzə̀ cu ye və́yí bin fo fo, a kirəm kfə́ kí boŋ Nyùy Tàr.

⁶ «A nyàm ye wù cu Nyùy Tàr shó ji cu kikòŋnìne dzə̀ njiì, kìn bvəy loŋ, bo wù kù taʼ a dzə̀ yee lumèn, kìn yee wiíy, é wáa dzə yee là nsem.

⁷ Wáa dzə ji wù yii cu a dzə̀ e njiì, wù wìy shó e Nyùy Tǎr si,

⁸ e shùu kibàn ké ntàsín, e neèr kiwó kfə́ é kitu wo, e seè é shùu kibàn ké ntàsín. Wón Aaron vee vitó və́ vee atàá cùu yíi lì mensə́, e waŋ e kiy cù, virə́v vidzə̀m.

⁹ Fo nyàm rə̀n ye dzəə̀n ye cù kikòŋnìn, é wù fəə́r vifá ve cù Nyùy Tàr ye və́yí bin fo fo, a dzə̀ kún e dzə̀m wùn à fóm see fó si. A wù fəər a dzə̀ fó shùu kighvər ké ndzə̀m kí, e kfə̀n fəə́r fóm se sí sùmèn vifá veé bvə̀m, à fóm sidzə̀m se sí dzəə̀n é wǔn vito si,

¹⁰ e lì ndzəʼ see sibaà, à fóm sə́ se sí dzəə̀n é shintay si, e shoʼ kimbày ke bày, e tatí wùn à ndzəʼ si.

¹¹ Bo taà cù sí ton e kiy cù ji cu vifa ve yi, cu Nyùy Tàr ye və́yí bin fo fo.

¹² «A cu rəə́ lò a dzə bvəy loŋ, wù wìy shó e Nyùy Tǎr si,

¹³ e shùu kibàn ké ntàsín, e neèr kiwó kfə́ é kitu wo, e seè fó. Wón Aarone yíi lì mensə́, e waŋ e kiy cù, virə́v vidzə̀m.

¹⁴ Fo nyàm rə̀n, é wù fəə́r cu Nyùy Tàr ye və́yí bin fo fo, a dzə̀ fóm se sí sùmèn vifá veé bvə̀m, à fóm sidzə̀m se sí dzəə̀n é wǔn vito si,

¹⁵ e lì ndzəʼ see sibaà, à fóm sə́ se sí dzəə̀n é shintay si, e shoʼ kimbày ke bày, e tatí wùn à ndzəʼ si.

¹⁶ Táti, é taà cù nèn tòn e kiy cù ji cu vifa ve yi, cu Nyùy Tàr ye və́yí bin fo fo, é kirəm kfə́ kí wáa bòŋ Nyùy Tàr. Fóm se nyàm cù sidzə̀m si kù dzə̀ sé Nyùy Tàr.

¹⁷ Bó vèn yòʼ wíy a yi fóm, kìn mensə́. Á nsər ye yì wíy a tiy ghán sidzə̀m e virə̀ʼ vidzə̀m ve vèn wíy a dzə sho mo ŋgwàʼ si wíy a dzə.»