Cù 12 - ŊWÀʼ NYÙY

Mo dzə̀ á kfə̀mrí wiíy e ghan se wù dzəən

¹ Nyùy Tàr yòŋ e Mooser jii,

² «Suúy e wír veé Israyi jii, a wiíy bòŋ bvəm, e dzə̀ə́ wán lumèn, bo wù yíi a dzə kirə́ʼ kimòʼón kishiíy saàmbà, a dzə moó ghan se wù yén ghán sə́ bey, a dzə̀ ji wù dzə̀ e *kifàn kí wùn.

³ Kishiíy kí mee ji waamé, aá sáŋ mbèʼ se wan woo shooy.

⁴ Á sáŋé, é yeè wàn kfən dzə̀ʼə̀m kishiíy nshòv sitaár e mtaár, aá *kfə́mrí wun, é bo wù rán fó səy ye wù kì sə́yí. Wù yòʼ yíi a kùm kifá ke á lèmèn jeéy ji ké Nyùy, a bó wù yòʼ yíi shaà e *kibàn ké ntàsín, a bó kinyo kfə́ ké kfəmrí ki shaá.

⁵ «Yii bèy, a wù dzə̀ə́ wán wiíy, bo wù yíi a dzə kirə́ʼ kimòʼón ŋgàm sibaà, a dzə e kifàn kí wùn moo ji wù yén a ghán sə́ bey, é wù nèn kfə̀n dzə̀ʼə̀m kishiíy nshòv ntuùfú e mntuùfú, é bo á kfə́mrí wun, é wù rán fó səy ye wù kì sə́yí.

⁶ «Ghán sə́ sé kfəmrí si gheenè, kìn dzə̀ bìʼ wán woo lumèn, kìn dzə̀ bìʼ woo wiíy, é wù li vifá ve cù, e wìy yèn taà cù sho e shùu kibàn ké ntàsín. Wù kù yíi wìy e wàn kiyaʼ woo kiyá ji cu yee tòn nyám e dzə̀m, e kfə̀n wìy e kibìŋ kí, kìn e kibuù ki, ji cu jay.

⁷ Taà cù yii cu sho e Nyùy Tǎr si, kfə́mri wun, é wù nèn ràn fó shaà ye wù‑uu shaa. Á nsər ye yì dzəə̀n bìʼ wiíy wo wù dzəən wán, kìn dzə̀ woo lumèn, kìn dzə̀ woo wiíy.

⁸ «Wáa dzə a kitan ki gháʼ ne fo wù yún wan kiyaʼ, wù wìy e vibìŋ ví vibaà, kìn e wón vibùu abaà, é kímóʼ kí wáa dzə ji cu ye tonèné, é kímóʼ kí wáa dzə cu ajay, é taà cù kfə́mrí wun, é wù rán fo wun kifàn.»