2 Wòŋ 1 - ŊWÀʼ NYÙY

Fòn Solomon lón vifií fo Nyùy

¹ Solomon woo wan Fòn Davir‑iì ghàr sáʼ vifòn veé Isray, yí tuúy, a Nyùy Tàr woo Nyùy və leey fo wun, yii, a wù dzə́ wír wo ghaʼán.

² Fòn Solomon lò, e tòóy wír veé Isray adzə̀m. Wù‑uù tòóy amfòómé ve á sáʼ wíri nsə̀kì nsə̀kì, à ve á sáʼ wíri wií wií, e kfə̀n tòóy sa atǎr nsaʼ, e bóo lì atǎr kfəə veé Isray adzə̀m, áwune ve á sáʼ wíri.

³ Wíri báʼtí, wùn à Fòn Solomon nèn dù e kirə̀ʼ ké cù keé Gibeon. Dzə̀ fó, fo *kibàn ké ntàsín kí‑iì dzəə̀n é ghan fóo fèy, a dzə̀ ke Mooser woo ŋgaà lìm Nyùy Tàr‑iì fèrìn é woʼ.

⁴ Yì‑iì dzə̀ é ghan sin, a ŋkùv mensàŋ sì é Jerusalem, bìʼ fo Davir‑iì liìn ne fo Kiriat‑Jearim, e wìy, e wày é kibàn ke wù‑uù tamen é Jerusalem ji wù wáa tiy a sho.

⁵ Yii bèy, a kíy cù wo vé‑eè fèrìn e kisha kee *brons kií kù dzə̀ kfə́ é Gibeon, a dzə̀ wúwun wo Besalel‑iì fèrìn, wun woo wan Uri, Uri woo wan Hur. Kíy cù və̀ne‑eè dzə̀ é mbìy kibàn ké ntàsín ké Nyùy Tàr. Dzə̀ é kiy cù fèn fo Fòn Solomon wùn à wìr dzə̀m‑eè duùn ji á cu á Nyùy Tàr.

⁶ Fòn Solomon kóʼtí é kiy cù fèn, woo kisha kee brons ki, a wú tíy e mbìy kibàn ké ntàsín, e Nyùy Tǎr si, e yiì cu ye tonèné fó, nsə̀kì.

⁷ Wáa dzə vitsə́ʼ vee shooy, Nyùy Tàr wìy fo Solomon wùn, e sùúy e sho jii, «Yòŋ kifá ke à taʼ ji m fó wò ki, é m fó kíwun.»

⁸ Solomon bìnèr e Nyùy jii, «À dìn ne koŋ yé ye wiyí e tàr wor Davir, e kòʼór mo ji fon e wun ntaʼ.

⁹ Éè Nyùy Tàr, wò woo Nyùy, ku yiì, é ŋkàʼmé wo wò‑oò kàʼàn tàr wor Davir sho gheén. Kí à kòʼór ne mo ji fon ji m wáa saʼ wíri, aá dzə̀ nyanyày, a bó yòʼ dzə̀ á tàŋ.

¹⁰ Ku fò ri mo vifií wùn à kiíyi, é m wáa saʼ wír vìn sho. Kí búŋ fó bèy, bo bó yòʼ dzə̀ wìr kìíy móo saʼ wír vé ve á dzəə̀n agháʼán vin.»

¹¹ Nyùy Tàr suúy e Solomon jii, «Mo shilív shé shi suuyin, à lón a dzə̀ vifií wùn à kiíyi ji à fíʼ a saʼ wír vém shó ve m lèmèn wò ji fon wov, aà yoʼ lòn a dzə̀ vikuʼùy, kìn mbàm, kìn ghvə́m, kìn dzəʼə̀m ye dáa, kìn ji m yúyrí aŋgaà vé vibàn,

¹² bo mo‑óò fó wò vifií wùn à kiíyi, e kfə̀n fo wò vikuʼùy, e fo mbàm, e fo ghvə́m, e dzəə ye bó fòn wùmòʼ wo wù‑uù saʼan ne e wò mbìy yòʼ‑oò yiì ne a ker, a bó wùmòʼ wo wù wiy fo wò bàm yòʼ wíy a ker.»

¹³ Fòn Solomon nèn lò fo kirə̀ʼ ké cù keé Gibeon fèy, fo kibàn ké ntàsín kí‑iì dzəə̀n, e kfə̀n é Jerusalem. Wù kfə́n bey, e nèn a dzə fo, a saʼ Isray.

Vitaáví vé Fòn Solomon wùn à vikuʼùy və́ ví

¹⁴ Fòn Solomon‑eè bàʼtí *viténtén vé rər ve səŋ nyám si, e bàʼtí nyám se ŋkoʼ nyanyày. Wù‑uù kér viténtén kishóv ghii kweè e nsə̀kì (1,400), kfə̀n kér nyám se ŋkoʼ nsə̀kì nshòv sibaà e ghvə̀m (12,000). Wù‑uù lèm vifá vìn e ŋkà se laʼ se á yoŋ ji ŋkà se laʼ se vitentén, e lèm vímóʼ ví é Jerusalem fo wun woo fon‑eè dzəə̀n.

¹⁵ Wù‑uù yiì, *kisha ke mbàm ke fəvír wùn à ke baar kí wáa dzə e Jerusalem ji kifá kee fó tèr moo tíy bey, a kicí ké *sidar ki fúm fo fumén moo kicí ké *sikamor keé sar agwan veé Juda.

¹⁶ Nyám se ŋkoʼ se Fòn Solomon si dzə̀, a sí‑iì lo a dzə̀ fó Ejiv wùn à fó Kue. Wónlě way veé ntoʼo‑oò lo, á wàa dù e Kue, a yun fo fo,

¹⁷ a kávi dzə̀ ashekel kishóv mtàn e wiì, a dzə̀ *shekel woo kisha ke mbàm ke fəvír kí. Á lo, á yùn kiténtén fó Ejiv, a kávi dzə̀ ashekel ghií ntuùfú. Á kfə̀n‑eè lo, á wàa lì sa viténtén wùn à nyám sìn si, a fiìnè aàfon veé Hit wùn à veé Arame.