2 Samuel 9 - ŊWÀʼ NYÙY

Davir wùn Mefiboshet

¹ Wáa dzə e kishiíy kímóʼ kí, Davir dzə́r e wír vəə́ jii, «Wìr woó kfəə Saul dzə̀ə́ sho e tin a? A kù dzə̀ m wàa kòŋ fóo bùʼ ŋgaàŋ bìʼ Jonatan.»

² Ŋgaà lìm woó kfəə Saul wùmòʼ wáa dzə, aá yoŋ ji Tsiba, á nèn jàŋ ji wù wiy, e yèn á fon. Wù wìy, Fòn Davir dzə́r shó jii, «Dzə̀ wò Tsiba à?» Wù biímé ji nyàr, dzə̀ á wun.

³ Fòn kfən dzə̀r jii, «Wìr woó kfəə Saul dzə̀ə́ sho e tin a? A dzə̀ Nyùy wàa kòŋ ji m buʼ á wun.» Tsiba biímé ji nyàr, wùmòʼ waà dzə̀ə́ a sho, a dzə̀ á wan Jonatan, a dzə̀ wír, a wù kér ndzə́m wuú e dzə̀m.

⁴ Fòn nèn dzə̀r jii, «Wù yii dzə́ fèé?» Tsiba bìnèr jii, «Wù dzə̀ á e Lo‑Debar, e Makir woo wan Ammiel lav.»

⁵ Á bèy, Fòn Davir nèn tòóy wun.

⁶ Wun woo Mefiboshet woo wan Jonatan, wo kfə̀n‑eè dzəə̀n wan wàn Saul nèn wìy. Wù‑uù wìy, e tsə̀m ndzəə́, e làʼ kitú fo nsay ji wun din á ghvə́m. Davir dzə́r shó jii, «Dzə̀ wò Mefiboshet à?» Wù biímé ji nyàr, dzə̀ á wun.

⁷ Davir suúy e wun jii, «Lá à yòʼ a fàn. M lo, e bùʼ wò bìʼ tàr won Jonatan. M lo, e siìr ŋgvən Saul woo tàr à tàr won e wò, e kfə̀n lì wò, áà wáa yikír wòsò ghán sidzə̀m.»

⁸ Mefiboshet kfən tsə̀m ndzəə́, e làʼ kitú fo nsay, a sham wún jii, «Mo woo kwǎn fòn, m dzə̀ kém ka, é bo tàr wor wáa yen mo ji wír, kimkpú ke jwi fo kimkpu ke jwi à?»

⁹ Fòn nèn tòóy Tsiba wo yì‑iì dzəə̀n ŋgaà lìm Saul, e sùúy e wun jii, «M fò ne vifá ve Saul woo tàr won lìm, à vé kfəə rəə́ vidzə̀m e Mefiboshet wo dzəə̀n wan wàn tàr won lìm.

¹⁰ Vèn à wón vée, à vé lìm vée yíi a lìm nsay Mefiboshet, a kav vifá, a wìy, a yiír kfə́ə rə́ shó. Yii bèy, é wúnwun woo Mefiboshet woo wan tàr won lìm wáa yikír a dzə̀ vèr wun e ntoʼ.» Fòn‑eè yoŋ bèy, a Tsiba kér wón vee vilum nshòv sitàn e ghvə̀m, a vé lìme dzə̀ wír mbaà.

¹¹ Tsiba bínsí ji wun woo ŋgaà lìm fòn yíi a yiì a vinyo vidzə̀m ve taàtá və woo fon waà yòŋèn. Á bèy, Mefiboshet nèn a yikír wùn fòn réŋréŋ moo wan ntoʼ bèy.

¹² A Mefiboshet kér wán wo terí, a yírí dzə̀ ji Mika. Wìr dzə̀m woo Tsiba lav nèn kù a lìm fo Mefiboshet.

¹³ A wúnwun woo Mefiboshet kù dzə́ e Jerusalem, yikír wùn fòn, a wù‑uù dzə̀ wír, a wù ndzə́m wuú e dzə̀m.