2 Samuel 16 - ŊWÀʼ NYÙY

Fòn Davir wùn Tsiba

¹ Fòn Davir bíʼír gwan, e lòo bàŋrìn, e bvə̀y e Tsiba woo wir lìm Mefiboshet wùn, a wù tsəə́ne vimbèʼbìy vibaà, a ví béʼ ntuʼ se kiban ghii baà, à báŋ se kitiír ké *vayin se saŋèn sí mentuʼ wií, à vifá ve koomén vé mbìy vi, visə́ŋ wií, e bóo lì shiluʼ.

² Fòn Davir dzə́r e Tsiba jii, «À du a dzə̀ feé e vifá vìn vi?» Tsiba bìnèr jii, «Nyàr, vimbèʼbìy ví dzə̀ á ji fòn wùn à kfə́ə rəə́ wàá kóʼ. Kibán wùn à vifá ve koomén ví wáa dzə a vifá ve yi ve vé rər və́, shiluʼ shi wáa dzə a shé wìr ve á ghanen ne, e dòrkír e woʼ ji á wàá nó.»

³ Fòn nèn dzə̀r jii, «Wan wàn tàr won lìm bèé?» Tsiba bìnèr jii, «Wù dzə̀ lèn e Jerusalem, a wù leey ji wír veé Israyi waà yíi siìr a vifon ve tàr wov Saul e wun lán.»

⁴ Fòn Davir suúy e Tsiba jii, «Bo kéŋ Mefiboshet e dzə̀me sì lèn yé.» Tsiba bínsí jii, «Nyàr, Nyùy ku yiì, é m wáa yiì vinyo ghán sidzə̀m, a dzə̀ ve ví wáa gheén taàtá wòm woo fon.»

Shimey kuúrí Fòn Davir

⁵ Fòn Davir ghán, e dù, e mèé e Bahurim, wìr wùmòʼ fəə́, a wìy, a kuùnìn kuùnìn. Yì‑iì dzə̀ wir kfəə Saul, a yír rəə́ dzə̀ Shimey woo wan Gera.

⁶ Wù wáa màʼ Fòn Davir wùn aàtǎr ntoʼ vəə́ e tíyí. Vé rərí‑iì kaàrí fon, e tàr, a Shimey kù maʼ wir dzə̀m máʼan e tíyí.

⁷ Wù wáa kuùrì Fòn Davir, a suúy jii, «Dù dúun, dù dúun, ŋgaà kinjuyrìwìr, kiŋgà ké jwè və̀n.

⁸ Wò‑oò faàsì sáʼ fo Saul, e yùyrí wír vee wun kfəə, a Nyùy Tàr siìr ne ŋkfə́tír e wò kitu, e sə̀ sáʼ fo wò, e fò e Absalom woo wan wò. Wò woo kinjuyrìwìr, vinyo vé vi kfə̀n ne e wò kitu.»

⁹ Abishay wo yè wov‑iì dzəə̀n Tsəruyia bùn fon, e sùúy jii, «Kimkpú ke jwi kìsə ki sà kuurì fon ji ka á? Á maʼti á, é m líysín, e shòʼ á kitú fo fo.»

¹⁰ Fòn Davir suúy kfə́ jii, «Kinyo kìn ki kùm ven vee wón Tsəruyia e gha? A lò a dzə, a suúy Nyùy Tàr ji wù wáa kuùrì mo, wàa sòv la ji wù sà kuurì mo bìʼ ka á?»

¹¹ Fòn Davir suúy áàtǎr ntoʼ vəə́ wùn à Abishay jii, «A wan wo dzəə̀n ji vitó vém lò, a kuùrì mo, bo a dzə̀ ké wìr woó kfəə Benjamin və̀sə ki wàa dzə e le? Màʼtì bey, é wù wáa kuù mo Nyùy Tàr tumen wun ji wù wáa kuù.

¹² A tàm é Nyùy Tàr yiì yèn ŋgeʼ sém, e səə̀vì mo fó kuùrì ye wù kuurì mo lán.»

¹³ Fòn Davir wùn à wír vəə́ nèn kù a dù e dzəə, Shimey wáa wav e gwan fo ndzən, aáwuné ŋkìʼnìn, wáv bèy, maʼ Fòn Davir e tíyí, maʼ e vimáŋ vé nsay vi.

¹⁴ Fòn Davir wùn à wír vəə́ meé fo vé‑eè du, aá dórkír ne, e nèn meèmè fo.

Hushay bá wún e Absalom wùn

¹⁵ Absalom wùn à wír veé Israyi wáa nəə́ e Jerusalem, a Ahitofel dzə̀ é ŋgoo.

¹⁶ Hushay woo wir Arek woo ŋgaà ntir Fòn Davir bvə́y fó, a waamé jii, «Nyùy dzəsi dzəʼə̀m fòn, Nyùy dzəsi dzəʼə̀m fòn.»

¹⁷ Absalom suúy e Hushay jii, «Ábáy, á dzə́ə ye à tóm ŋkar yè yee Davir sho à? Kì yiì ka, la à yòʼ dù vèn wun?»

¹⁸ Hushay bìnèr jii, «Yòʼ kì dzə̀ m dù vèr wun. M yíi a lìm kém a dzə̀ fo wìr wo Nyùy Tàr wùn à wír vìne, à wír veé Isray adzə̀me shoʼon, a kù mày woo shoon wo m yíi a lìm fo wun.

¹⁹ A dzə̀ m wàa lìm a dzə̀ fo la, bánlà fo wan tàr wor? Mo mò‑oò lim fo tàr won, sì mo m yíi a lìm fo wò.»

²⁰ Absalom nèn lò, e yòŋ Ahitofel, e dzə̀r shó jii, «Vèsən lo, e yèe? Fó ver ntir yè.»

²¹ Ahitofel nèn tìr Absalom ji wù du, e neèm a e vikǐy tàr wov ve ceméné ve wù‑uù lèmèn ji á wáa leéy ntoʼ, é wìr dzə̀m nèn kìíy a ji wùn tàr wov yòʼ dzəə́ kér a kinyo ké a taŋ. Á bèy, é wù nèn tàvír a kóy wìr və́.

²² Á nèn tàm táv Absalom e kikfəv ke lav, wù nəə́ shó, e neèm e vikǐy tàr woví, a wìr dzə̀m woó Isray yéné.

²³ Ntir Ahitofel‑iì dzə̀ é ghan fen, aá kù jumrì jùmrìn mo suuy a Nyùy bèy, kìn‑eè dzə̀ Davir, kìn‑eè dzə̀ Absalom.