2 Samuel 1 - ŊWÀʼ NYÙY

Davir yú kpú Saul

¹ Saul‑iì kpù é Gilboa, a Davir dzə̀ é kwaʼ rər fo wù‑uù duùn, e tòn wír veé Amalek. Wù kfə́n é bàm, e shìíy e Tsiklag vishiíy vibaà.

² Vishiíy ví lòo meé vitaár, wánlè nsùm wùmòʼ bvə́y fó, e ndzə̀y sí sisaasìn, e kibvər ki é kitu, a wù léʼ fo Saul kilaʼáy. Wù wìy bèy, e gbù e Davir si, e làʼ kitú fo nsay.

³ Davir dzə́r e wun jii, «À wìy fo feé?» Wù bìnèr jii, «M lèʼ fo wír veé Israyí kilaʼáy.»

⁴ Davir kfən dzə̀r e wun jii, «Rə́r sí màʼ e le? Suúy e mò.» Wù bìnèr jii, «Sí ghàʼ ne, wíri nyéŋkír, aneéníne kpúkír, Saul wùn wan və Jonatan kpú sá.»

⁵ Davir dzə́r e wánlè nsùm və̀y jii, «À ghàn é le, e bóo kiíy ji á yùyrí ne Saul wùn wan və Jonatan?»

⁶ Wù bìnèr jii, «M kì dzə̀ é Gwan Gilboa, e yèn Saul, a wù yéʼ e wun kòŋ, a vé rər veé nyàm sií sí méʼ wun, veé vitentén wùn à vé koʼo.

⁷ Fòn bínkír, e yèn mo, e tòóy mo. M biímé jii, ‹Nyàr, mo á və̀ne.›

⁸ Fòn dzə́r e mò ji m sà dzə̀ wír woo feé á? M bínér ji m dzə̀ á wan wìr Amalek.

⁹ Wù nen sùúy e mò ji wun lèm á feyì, ye dzə̀ á wun kpù. Kii mò, m ku wìy, e màysì a wun, e yùyrí.

¹⁰ Á bèy, m nen shaà, e yùyrí, bìʼ fo m kì kiìn ji wù lo, e gbù, e làa yòʼ lùŋ. M nen shòʼ ntáráʼ fó kitu wo, e shòʼ kisáʼ fó koy wo, e nèn a wìy sho lèn ji m neer á e taàtá wóm si.»

¹¹ Davir yú bey, e ghàr ndzə̀y fó wùn, e sàtì, wír vəə́ ku yiì sa bèy adzə̀m,

¹² a dìy, a toŋ. Á ku nèn a dìy kpú Saul wùn wan və Jonatan, à yé wìr veé Israyi adzə̀m, bìʼ fo vé rə́r Nyùy Tàrí‑iì kpukin é shùu rər anín. Á wáa dìy bèy, e lèm jíŋ, e dù, e mèé e ŋkuùr.

¹³ Davir lò, e dzə̀r e wánlè nsùm və̀y jii, «À dzə̀ wír woo feé?» Wù bìnèr jii, «M dzə̀ wan kiŋgwìy ke wìr Amalek.»

¹⁴ Davir kfən dzə̀r shó jii, «À kì mùm a dzə̀ ka, e bóo laʼ kiwó ké e fòn wo yoʼon Nyùy Tǎr kitu, e yuyrí.»

¹⁵ Davir nèn jàŋ wír və wùmòʼ, e sùúy sho jii, «Shaà, e ndzə̀n wír və̀sə.» Wù shaà, e ndzə̀n, wù gbù fo nsay, e nèn a kpu.

¹⁶ Davir wáa suúy sho jii, «À kì fo wò kpu. Kù sùúy shuu wó ji à kì yùyrí á fon wo yoʼon Nyùy Tàr.»

Davir díy kpú Saul wùn Jonatan

¹⁷ Davir‑iì yòv yòv kpu və̀n kùm Saul wùn wan və Jonatan,

¹⁸ e nèn fò sáʼ ji wír veé Judàa yéʼéy á yòv kpu və̀n, e yiì a yòv. Vé‑eè sàŋ yòv və̀n e ŋwàʼ Jashar, a wù dzə̀ jii:

¹⁹ «Éè Isray, viwìr vé vi sí néŋ vikpúkín, ví néŋ e vitu ve agwan. Á bàʼ ne kitàm.

²⁰ Lá à yòʼ yiì, é wír veé Gati kiíy, lá à yòʼ fùŋ é dzəə seé Ashkelon, fo wón veé Filistia vee vikìyí wáa sheʼrí, fo wón wìr vee fó laʼ vee vikìyí wáa yu vijuŋ.

²¹ «Éè agwan veé Gilboa, lá wuú yòʼ shèm fó, lá ŋwéʼe yòʼ gbù fo, lá nsay yè yòʼ a fəə́r vifá ve yi. Dzə̀ fó fo vé‑eè shùʼtìn ŋkeè ntav, ŋkeè Saul gòʼ ne là yóʼ.

²² Kinte ke Jonatan ki yòʼ‑oò nyaʼ wír. Kí‑iì neer antav, la nyùy Saul yòʼ a bavtí wír. Yì‑iì laàr ataamò rər.

²³ «Saul wùn Jonatan, wír, aá tó sí, a wíri leey, koŋè. Vé‑eè dzə̀ kintatì fə̀m á mvə̀m kpu. Vé‑eè shwìr, e shaà lùŋ wo wiy, vé‑eè tàv, e shaà bvərə̀ʼ.

²⁴ «Éè wòn veé Isray vee vikìy, vèn diy Saul. Wù‑uù màʼ ndzə̀y e věn wùn, ndzə̀y see náŋsín e làv wo fəvír woo fèm. Wù‑uù wàyrí vifá ve sùsù vi e věn ndzə̀y, vifá vee fèr e *kisha ke mbàm ke baar kí.

²⁵ «Ébéèy, antavi sí néŋ agwatìn é shùu rər. Dzə́n sé antav vé rər sí sí foy e kwaʼ Jonatan néŋ e gwan, a sì ŋkfə.

²⁶ Fə̀r wom Jonatan, kpú yée nə̀ə́ mo é ŋàŋ. Wò‑oò koŋ mo, a kí boŋ mo é ŋàŋ. Kí‑iì boŋ mo, e shaà mo wiíy kòŋ wán kìn lúm.

²⁷ «Ébéèy, antavi sí néŋ agwatìn. Vifá vév vé rər ví foy e kwaʼ.»