Biblia Todo Logo
Bib sou entènèt

- Piblisite -

1 Wòŋ 10 - ŊWÀʼ NYÙY


Fòn Saul láy
( 1 Samuel 31.1‑13 )

1 Wír veé Filistiàa nèn lò, e màʼ rə́r wùn à wír veé Israyi é Gwan Gilboa, e yùyrí wír veé Isray fo anín, ámóʼó nyéŋkír.

2 Wír veé Filistiàa nyoòrì Fòn Saul wùn à wóné, e yùyrí wón və́ vee Jonatan wùn à Abinadad, à Malkishua.

3 Rə́r sí‑iì gìm Saul e dzəə ye tavín, mvəne koó wun, e lèmér.

4 Saul suúy e ŋgaà ŋkeè və jii, «Shóʼ nyùy yè, e yùyrí mo shó, fo viŋgà vé wìr veé Filistia vee améŋnyùy vìne wiy, e yùyrí mo, a binsí mbeeteé.» Ŋgaà ŋkeè və fàn feyì, e tèn fóo yuyrí wun. Saul nèn lì nyùy rə̀r rə, e gbù e kitu wo.

5 Ŋgaà ŋkeè yén ji Saul kpù á ne, e nèn lì rə́ə yee nyùy rə̀r, e gbù sa e kitu wo, e nèn kpù.

6 Á mo Saul wùn à wón və́ vee ataári, à wír və́ adzə̀me‑eè tatin, e kpù ben.

7 Wír veé Isray adzə̀m ve vé‑eè dzəə̀n é Mboʼ Jesreeli yú ji rə́r sí ghàʼ á ne wír vév, á wáa nyeŋ a nyeŋén, e kfə̀n yù ji á yùyrí ne a Saul wùn à wón vəə́, á nèn màʼtì ntèʼ sév, e nyèŋkír. Wír veé Filistiàa nèn yòv ntèʼ see shooy, a dzə fo.

8 Ndzə bvəə́shí, e ràn, wír veé Filistiàa dù ji á shóʼtí á vifá ve rər fo dzə́n sé wíri sí wùn, e nèn yèn dzə́n Saul wùn à sé won və́ sí, a sí néŋnin e Gwan Gilboa.

9 Á shóʼóy ndzə̀y sé rər sé Saul, e shòʼ kitú kfə́, e tàtí, e dù sho, e nèn tsə̀nsí vé ntume woŋ Filistia e dzə̀m, á wáa ghan, a fìʼtì sáʼka wo juŋ və̀n aáwuné virə̀ʼ vé anyùy, e kfə̀n a fìʼtì e wír véví adzə̀m.

10 Vé‑eè lèm vifá və́ vé rər vin aáwuné lav anyùy, e sə̀ŋ kitú kfə́ é lav ye á cu nyùy woo Dagon sho.

11 Wír veé Jabesh Gileadi lò, e yù kinyo ke wír veé Filistiàa mùmèn e Saul,

12 vilum vév adzə̀m ve á kér melíví nèn ŋàʼáy, e dù, e lì dzə́n Saul wùn à sé won sí, e wìy sho e Jabesh, e dzəə̀mè e sar kici ké *terebint, e nèn lèm jíŋ kishiíy saàmbà.

13 Saul‑iì kpù ben bìʼ fo wù yòʼ‑oò tíy tìítiy wùn Nyùy Tàr. Wù‑uù méŋ sáʼ Nyùy Tàr, kfə̀n du, tar vinyo a dzə̀ fo vé ŋgàŋe,

14 e làa yòʼ a tàr a dzə̀ fo Nyùy Tàr. Bìʼ bey, Nyùy Tàr yúyrí wun, e nèn fò sáʼ a dzə̀ e Davir woo wan Jessi.

© 2022 CABTAL

Swiv nou:



Piblisite