1 Samuel 8 - ŊWÀʼ NYÙY

Wír veé Israyi taʼ Fon

¹ Samuel‑iì dzə̀n, e nèn lèm wón və́ ji á wáa dzə atǎr nsaʼ wìr veé Isray.

² Wo mbìy‑iì dzə̀ Joel, wo bàm Abija, aá dzə́ e Beersheba, tínen nsaʼ si fó.

³ Bó áwune yòʼ‑oò ló a jùmrì liì tàr wov. Vé‑eè koŋ a dzə̀ yíkísáŋ, sə́ kòyàr, nèn shwiv nsaʼ si.

⁴ Kfə́m sé wìr veé Isray si nèn lò bàʼtí sidzə̀m, e dù, e yèn Samuel e Rama,

⁵ e sùúy sho jii, «À dzə̀n ne, a bó wón vée yòʼ jumrì liì wò. Fó ri ver fon wo wù wáa saʼ ver réŋréŋ mo vitúm vidzə̀m vi kér afon ve á sáʼ áwune.»

⁶ Mo áwune yòŋèn ji Samuel fó á áwune fon wo wù wáa saʼ áwune, kí nyár Samuel, wù wáa bùnrì, a bi Nyùy Tàr.

⁷ Nyùy Tàr suúy shó jii, «Yuúrí kinyo ke áwune suuy ki. Áwune yòʼ méŋ a dzə̀ wò, á méŋ a dzə̀ mo. Áwune mèŋ ne mo fó fòn wov.

⁸ Kèʼ mo mò‑oò fəərin áwune fó Ejiv, e wìy shem lán, áwune lo, á màʼtì mo, a ghvəm anyùy ámóʼó. Kù dzə̀ kinyo kíwun ke á lo a yiì sa e wò.

⁹ Ku yuùrí kinyo ke áwune suuy ki. Yii bèy, naàrì aáwune kijuujùŋ, e yiì, aáwune kiíy kfə́ə liì wo fòn wo wù yíi a saʼ áwune yíi a ker.»

¹⁰ Samuel nèn fèr kinyo kidzə̀m ke Nyùy Tàr‑iì suuyin e wun e wír ve vé‑eè yoŋ ji wù fó áwune fone.

¹¹ Wù wáa naàrì, a suúy jii, «Vinyo ve fòn wo wù wíy a saʼ ven wíy a yiì vi dzə̀ jii, wù wíy a lì wón vén vee vilum ji ve rər və́. Ámóʼó lóo sə̀ŋ *viténtén və́ vé rər, aámóʼó wáa dzə aŋgaà ve á kóʼ nyám sə́, aámóʼó wáa dzə wír ve á léʼ e mbìy vitèntén.

¹² Wù wíy shoʼtí vilìmbìy ve vé rərí, é vímóʼ ví wáa wam vé rər nsə̀kì nsə̀kì, é vímóʼ ví wáa wam vé rər mtàn mtàn. Wón vén ámóʼó wíy a lìm súm və́, aámóʼó wáa kav vifá ve kavín ví, aámóʼó wáa tòn vifá ve rər, aámóʼó kfə́n a fèr vifá və́ vé vitentén ve səŋ nyám si.

¹³ Wù wíy lì wón vén vee vikìy ji á wáa fèr a virə̀ʼtìn ve bìʼ, aámóʼó kfə́n a naá vifá ve yi, aámóʼó wáa tòn ve tonèn ví.

¹⁴ Wù wíy sə súm sén se juŋ si sidzə̀m, sé vifa ve yi, à sé vitiír vé *vayin si, à sé vici vé *oliv si, e fo e nsheèlav sə́ sí.

¹⁵ Vèn wíy lòo kav vifá, aá wáa jàv virə́ʼ e ghvə̀m, a fo kirə́ʼ kee kimòʼón ki aàtǎr ntoʼ vəə́ wùn à e nsheèlav sə́ sí.

¹⁶ Wù wíy faàsì vimbèʼbìy vén, à wír vén lìm vee vilum wùn à vee vikìyí, à wónlě nsùm vén ve tavkíné, aá wáa lìm fo wun.

¹⁷ Vèn wíy a jàv nyám sén virə́ʼ e ghvə̀m, a fo kee kimòʼón ki e fòn. Vèn wíy a dzə ji akwàn və́.

¹⁸ Ghán see shooy si wíy gheén, é vèn wáa toŋ ji á sə́ á ven fo fòn wo vèn koʼorin ji wù wáa saʼ ven, é la Nyùy Tàr yòʼ a ghay.»

^19-20 Yii bèy, wíri kínén kinyo ke Samuel, kinèn bèy, suuy jii, «Àáyà, vèr taʼ a dzə moo vitúm vímóʼ ví, a ker fon wo wù wáa saʼ ver, a tinén nsaʼ sér, é vèr áwune kfə́n a fəə, a màʼ rə́r sér.»

²¹ Samuel yú kinyo kidzə̀m ke wíri‑iì suuyin, e nèn naàrì e Nyùy Tàr.

²² Nyùy Tàr suúy e Samuel jii, «Biímé kinyo ke áwune suuy ki, e fò áwune fon.» Samuel nèn sùúy ji wìr dzə̀m woó Isray wáa kfən a e wun laʼ, a yuurí.