Zabuli 101 - Luganuzi Luswanu Kuli Wanhu Wose 2002

Wihuwizo wo mutemi

¹ Lwimbo lwangu ku soko yo wihuwilwa ne ning'aniza, nane nolwimba so lilumbo lyako 'gwe go Muwaha Mulungu.

² Ne mikalile yangu yowa yisina yilema lyo lyose. Alu 'gwe ma, konyiziza nili? Mu kaya yangu, nokwikala mu mikalile, yono yikwilaniciye,

³ hamba sinoyikangalilila nghani yo yose yimbi. I mijendele ye wanhu wabi, ane si niyendile yaye. Sunga ne mikalile yawo, ane si noyityatya ng'o.

⁴ Ne nzila yo yose yo wajilile, yeze yili kutali nane, nane nokwilega no wubi we mawala gose.

⁵ Nowapezezya lukulu, wose wono wendile kuwaheha wayawo, hamba si nosuma kuwakangalila, i wedunhumuzi, ne wepelelezi.

⁶ Wanhu wehuwilwa, awo langa wo wayangu, ne wetumami wangu, wowa wo walya wono wasina wubi.

⁷ No munhu wo wose mono mulambi, ayo si kosuma kwikala mu kaya yangu, hamba mukoci wo wose si cokwikalana nayo yaye.

⁸ Nane nhondo zose, nowongomezeza lukulu, i wabi wose mu yisi yetu, nowawusiza lukulu i wabi wose, mwi'kaya lyo Muwaha Mulungu.