Yelemiya 44 - Luganuzi Luswanu Kuli Wanhu Wose 2002

I nghani yo Muwaha Mulungu kuli Waisilayeli, ku Misili

¹ U Muwaha Mulungu, yakanonjela kanyhi za kuli i Waisilayeli wono wekalaga mu Misili, na mu makaya gose ga Migidoli na mu Tapenesi, na mu Mempisi, sunga na mu zisi zo lubavu lwa kutakama lwe 'si.

² Muwaha Mulungu, we mihanga, u Mulungu wa Isilayeli, yakalonga yakatya, “Anye nyo weneco mwewonelela i mabi gose gono nagaleta mu Yelusalemi, na mu makaya gose ga mu yisi ya Yuda. Na vyono gekala matongo sunga nalu. Hasina hamba munhu yumonga kanyhi mono yekaye mumo,

³ vyono i wanhu wayo wetuma zimbi muno, wakanghoza 'ne likuwo. Hambi nha wayilavizyaga makumbiko milungu yinji, no kuyitumamila milungu yono wene si wayihembaga ku wulawa na katali, hamba nyenye, hamba ne walezi wenyu, si wayihembela lukulu.

⁴ Ninga hamba nhavivyo, nane vyo nghajendelela du, kumutumilenyi wetumami wangu wawizi, wono wazaga kumulonjelenyi vyono, mulecele lukulu kwituma makani gago ge cikomaza, gono si nigendile yaye.

⁵ Ninga 'nye si mwasacila lukulu kuzihulika hamba kuzicelelela yaye. Hamba si mwasaka ho mugalece gago metumo genyu mabi go kuyikumbika milungu yinji.

⁶ Holeka nane nghawa kulimwaga likuwo lyangu mu makaya ge yisi ya Yuda, sunga na mu zinzila za Yelusalemi, nghawa kugapembela moto. Gakawa kulekwa matongo go kogofya muno ku wulangwe, nha vyono gakwijela sunga nalu.

⁷ “Holeka nane no Muwaha Mulungu we mihanga, ane no Mulungu wa Isilayeli, nghumuwuzenyi, nghutya nhavi, alu nhawulenyi mukwituma i zimbi zono zinha zizi. Hamba nhawule lo mukuhila kwiyiletela nyo weneco wongomele, anye mo we cilume, na we cicekulu, ne wana, sunga ne wana wagalika, ho halece kuwa kanyhi na munhu wo wose wa muli nyenye, mono kolosigala yaye?

⁸ Alu nhawulenyi mukunghalaza, no kunghoza likuwo so wuhemba vihwani, na so wukumbika milungu yinji, mu yisi yiyi ya Misili, mono mwikaye? Hamba mukwituma zizi ho mwiyongomeze nyo weneco, ne makungugo gose ga mono'nze gamubedegalenyi, no kwitumamila litagwa lyenyu nha wulijitwe ne cevu lo?

⁹ Hamba mwasemwa lo i zimbi zono zetumwa ne walezi wenyu, ne watemi, mu makaya ga mu yisi ya Yuda, na mu zinzila za mu Yelusalemi, ne walezi wenyu, ne watemi wa Yuda hamonga ne wagolece zawo, hamonga na nyenye ne wagolece zenyu lo?

¹⁰ Ninga sunga nalu baha, anye mukali si mukulajila nhumbula yo winenenyhezi yaye. Hamba si mukusaka kumhela cogopo yaye, hamba kuwa ne mikalile yo kutyatya ze malajilizo gangu gose, gono namupelenyi nyenye hamonga ne walezi wenyu.

¹¹ “Holeka aluno nane, ane no Muwaha Mulungu, we mihanga, Mulungu wa Isilayeli, nomulecenyi, niyongomeze yisi yose ya Yuda.

¹² Awo nawo i wanhu wa Yuda, wono wasigaye, wono nawo wejelela, wakawa kubita kwikala mu yisi ya Misili, nane nolanjilila sunga niwongomeze wose. Nawo wose, i wawaha ne wadodo wofwila wose kuko du ku Misili, wofwa so nzala, hamba wofwila mu wulugu. Nawo wolowa cinhu ca kogofya muno, sunga ne wanhu wololitumamila litagwa lyawo nha wulijitwe ne cevu.

¹³ Nane nolowalipiciza wanhu wose wono wekaye mu Misili, nha vyono nayilipiciza Yelusalemi ko wulugu, ne nzala, hamonga ne matamwa.

¹⁴ Na holowa hasina munhu wowose we yisi ya Yuda, muli wawo wose wono wasigala no kubita kwikala ku Misili, mono kolopona hamba kuwumipa. Hamba hasina munhu wo wose mono kolowuya kanyhi ku yisi ya Yuda, kono wakusulumila, ho wabite wakekale kuko kanyhi. Hasina hamba monga mono kolowuya kuko, langa wolowuya wacefu du wono wolopona.”

¹⁵ Ale, baho, i wanhu wose we cilume, wono wakamanya nha vyono, wagolece zawo wayilavizya makumbiko milungu yinji, hamonga ne wacekulu wono wali wali bahalya, hamonga ne Waisilayeli wose wono wekalaga ku lubavu lwa kutakama lwe yisi ya Misili, wawa lipuga lyose, wakanonjela wakatya,

¹⁶ “Gwe Yelemiya, ase cayilemela lukulu nghani yono wacilonjela, mwi'tagwa lyo Muwaha Mulungu.

¹⁷ Langa ase cojendelela du kwituma zinghani zose, nha vyono calonga. Cojendelela du kumulavizya makumbiko, mulungu wetu we cicekulu wa ku wulanga, no kumujidila vilavywa vyetu vye divayi, nha vyono canozaga ase, ne walezi wetu, ne watemi wetu, hamonga ne walongola wetu, mu makaya ga mu yisi ya Yuda, na mu zinzila za mu Yelusalemi. Na lono canozaga nhavivyo, cikatuga ndigwa nyinji muno, kanyhi cikamoteswa muno, cikawa cisina hamba wugaye wo wose yaye.

¹⁸ Ninga ku wulawa lono cali ceza kuleka kumulavizya makumbiko, u mulungu wetu we cicekulu wa ku wulanga, no kuleka kumujidila i vilavywa vyetu vye divayi, hobaho cikawa kucepucilwa vinhu vyose. Ne wanhu wetu, wakawa kufwa, ko wulugu ne nzala.”

¹⁹ I wacekulu nawo wakatya, “Nase lono canozaga mikate, no kumulavizya makumbiko u mulungu wetu we cicekulu wa ku wulanga, hamonga no kumujidila vilavywa vyetu vye divayi, cali cilumbanize ne walume zetu, muli zizo zose zono cetumaga.”

²⁰ Nane baho nghawapitula i walume wose, hamonga ne wacekulu muli zizo, nghawatya,

²¹ “Ninga mumanye, nha vyono u Muwaha Mulungu, hamba si yagasemwa yaye, i makumbiko gono nyenye, ne walezi wenyu, ne watemi wenyu, ne walongola wenyu, hamonga ne wanhu wose du wa mu'si, mwalavyaga mu makaya ga mu yisi ya Yuda, hamonga na mu zinzila za mu Yelusalemi, mwene yagamanyile, hamba si yasemigwe yaye.

²² Kanyhi mulanje nha vyono, ne yisi yenyu yakondya kuwa matongo, hasina hamba munhu mono yekaye mumo. Hambi nha ceza cinhu ca kogofya muno. Sunga ne wanhu weza kulitumamila litagwa lyayo nha wulijitwe. Hambi u Muwaha Mulungu, nha si kosuma kujendelela kuwukangalila u wubi wenyu, hamonga ne mabi genyu gono mukwituma.

²³ Holeka sunga ne magazo gaga, gamuzizenyi, ku soko ye vilavywa vye makumbiko genyu, gono mwali kuyilavizya milungu yinji, no kumusutizya u Muwaha Mulungu, na kanyhi vyono si mukusaka kugatyatya ne malajilizo gakwe.”

²⁴ Kanyhi nghawalonjela i wanhu wose, hamonga ne wacekulu, zono u Muwaha Mulungu we mihanga, u Mulungu wa Isilayeli, yawalonjelaga i wanhu wa Yuda, wono wekaye mu yisi ya Misili.

²⁵ Nha vyono yatya nhavi, “Anye hamonga ne wagolece zenyu, mwehuwiza kuli mulungu we cicekulu wa ku wulanga. Mwehuwiza nha vyono, momulavizya makumbiko, hamonga no kumujidila vilavywa vye divayi, nanye mbeka mukawukamisa muno wihuwizo wenyu. Ale, du viswanu! Mujendelele kuwukamisa wuwo wihuwizo wenyu!

²⁶ Ninga luno, muwuhulicizaje u wilahize wangu nane, ane no Muwaha Mulungu, u wilahize wono nghuwilahiziza mu vilungo vye litagwa lyangu, kuli'nye nyo Waisilayeli wose, mono mwikaye mu yisi ya Misili. Nha cinji, ku wulawa lulu, si nghusacila lukulu kanyhi, yunji muli nyenye yetumamile litagwa lyangu mu wilahize, yawe kutya nha vyono, ‘Ane nghwilahiziza muli Muwaha Mulungu mumi!’

²⁷ Nane nolanjilila ta, hono motuga wumoteswe. Ninga hamba si momoteswa ng'o, langa mokongomezwa wose du. Wose molofwa du, wanji wolofwa ko wulugu, na wanji wolofwa so nzala, hasina hamba monga wa muli'nye, mono kolosigala yaye.

²⁸ Langa wacefu du wa muli nyenye, wo wolopona, wawuye ku yisi ya Yuda, ku wulawa kuko ku Misili. Nawo wawo wono wolopona, wo wolomanya nha vyono, nghani ya nani yono mbeka yifisilizwa, hono nghani yangu yo yifisilizwe, hamba nghani yawo.

²⁹ Ane no Muwaha Mulungu, nghumukangazizenyi nha vyono, mbeka nomulipicizizenyi mono yisi yiyi. Sunga no wihuwizo wangu wo kumongomezenyi wowa wa mbeka.

³⁰ Nane nomutajila Hofula, u mutemi wa Misili, mu miwoko ye walugu wakwe, wono wakusaka wamuwulaje, nha vyono namutajila Zedekiya u mutemi wa Yuda, mu miwoko ya Nebukadineza u mutemi wa Babiloni, mono yali mulugu wakwe, mono yasakaga yamuwulaje.”