Yelemiya 43 - Luganuzi Luswanu Kuli Wanhu Wose 2002

Yelemiya yakutegulwa ku Misili

¹ Nane nghawa kukondya, kuwalonjela wanhu zinghani zose zono u Muwaha Mulungu, u Mulungu wawo, yanhuma nize niwalonjele.

² Nane nali neza kondya kuzilonga zizo zose, hobaho Azaliya u mwana wa Hoshaya, na Yohanani, u mwana wa Kaleya, hamonga ne wanhu wose i wedunhumuzi, wakawa kunonganga wakutya, “Gwe Yelemiya, awo wulambi wako du. U Muwaha Mulungu, u Mulungu wetu, hamba si yakulajilize yaye wuze wucilonjele, cilece kubita kwikala ku Misili ng'o.

³ Langa Baluku u mwana wa Neliya, yuyo yo yakukonjile agwe wucigaluce, ho cisolwe no kutajilwa mu miwoko ye Wababiloni, waciwulaje, hamba lunji wacisole wacitegule ku Babiloni.”

⁴ Holeka ku soko yiyo, i wanhu wose, hamonga na Yohanani, ne wawaha wose we wasilikale, hasina hamba yumonga mono yalihulika lilajilizo lyo Muwaha Mulungu, ho wekale mu yisi ya Yuda.

⁵ Ninga mwene Yohanani hamonga ne wawaha wose we wasilikale, wakawa kuwasola wanhu wose, wono wali wakali wasigaye mu yisi ya Yuda, wakawa kuwategula ku Misili, hamonga ne wanhu wose, wono wali wawuya, ku wulawa mu makungugo kono wali weyagaliye.

⁶ We cilume na we cicekulu ne wana, hamonga ne wana we cicekulu wo mutemi. Wakawasola wanhu wose du wono wali walekwa na Nebuzaladani, u muwaha we wasilikale mu miwoko ya Gedaliya, wakasoleleza na nene hamonga na Baluku.

⁷ Hamba si walihulika lilajilizo lyo Muwaha Mulungu yaye, wene wakabita du ku yisi ya Misili sunga kwi'kaya lya Tapenesi.

⁸ Na kuko kwi 'kaya lya Tapenesi, u Muwaha Mulungu yakanonjela yakatya,

⁹ “Gwe Yelemiya, alu wusole mabwe mawaha, wugavumvumice mu swakala, ha mulango we likaya lyo wutemi lya mwi'kaya lili. Na lono wukuzinoza zizi, wuzinozezaje ha meso ge Waisilayeli, nawo waziwone zose zono wuzinozize.

¹⁰ Hanyuma wuwalonjele nha vyono, ane yo nene Muwaha Mulungu, u Mulungu we mihanga, u Mulungu wa Isilayeli, nomutuma u mwitumami wangu Nebukadineza, u mutemi wa Babiloni, yaze hanhu bahano. Nayo koliwika ligoda lyakwe lyo wutemi, mucanyha ye mabwe gago gono wugazenjeleze, yakome ne lihema lyakwe lyo lukumyo mucanyha yago.

¹¹ Nayo kolo yakuza, koloyihoma yisi ya Misili. Ne wanhu wono wawicilwa kufwa no wutamwa, awo wolofwa ko wutamwa. Nawo wono wawicilwa kusolwa no kutegulwa kutali nha wafungwa, awo nawo wolosolwa wategulwe kutali nha wafungwa. Nawo wono wawicilwa wawulajilwe ku wulugu, ale, nawo wolowulajilwa ku wulugu.

¹² Nane nologapembela moto i makumbicilo gose ge milungu ye Wamisili. Nayo u mutemi wa Babiloni, koloyisola milungu yawo, yayipembele mu moto, hamba lunji yaze yabite nayo ku Babiloni. Kanyhi koloyimeha muno yisi ya Misili, yayilece nzelu swee, nha vyono u mudimi kamehaga mhani mu myenda yakwe, kayinoza yiwa yisina mhani.

¹³ Kanyhi kologatulanga sunga ne mabwe ge cikumbucizo, gono gali kuko ku Heliyopoli mu yisi ya Misili, yazipembele moto ne zinyumba ze milungu ye Wamisili.”