Yelemiya 42 - Luganuzi Luswanu Kuli Wanhu Wose 2002

I wanhu wakumulomba Yelemiya, yawalombele kuli Mulungu

¹ Baho i walongola wose we wasilikale, hamonga na Yohanani u mwana wa Kaleya, na Yezaniya u mwana wa Hoshaya, hamonga ne wanhu wose wawaha ne wadodo, wakanyiziza,

² wakanonjela wakutya, “Gwe Yelemiya, cikukunena wucinozeze zono cikukuhila! Ase cikukulomba, wucilombele ase wose mono cisigaye. Hambi nha cali cili wenji, ninga luno casigala cili wanhu wacefu du, nha vyono nagwe wukuciwona.

³ Wumulombe u Muwaha Mulungu, u Mulungu wetu, yacilajile nzila yono yinojeye ciyikole, ne nghani yono yocikwila ku witume.”

⁴ Nane nghawapitula nghawatya, “Ale, viswanu, ane nomulomba u Muwaha Mulungu, u Mulungu wetu, nha vyono musacile nyenye. Na kanyhi nane nomuganulilenyi zose zono mwene kolonga, hamba si nomuhundicenyi nghani yinji yaye.”

⁵ Nawo wakamhitula wakatya, “U Muwaha Mulungu yo kowa muhomelezi wetu we mbeka, kanyhi mwihuwilwa kuli 'se, hono cilece kugebata malajilizo gono u Muwaha Mulungu, u Mulungu wetu, kokupela wuciletele.

⁶ Hamba gawe gakucendeza, hamba ng'o, ninga ase comuhulika du u Muwaha Mulungu, u Mulungu wetu, mono cikukunena agwe wucilombele kuli mwene. Hambi nha cimanyile nha vyono hono cimuhulice mwene, nghani zetu zose zowa swanu muno.”

U Muwaha Mulungu yakuwupitula wulombe wa Yelemiya

⁷ Vyaza kupuluta vilo yikumi, nghani yo Muwaha Mulungu yikawa kunyiziza.

⁸ Nane nghawa kumucema Yohanani, hamonga ne walongola wose we wanhu wono wali wali hamonga nayo, hamonga ne wanhu wose.

⁹ Nane nghawalonjela nghatya, “U Muwaha Mulungu, u Mulungu wa Isilayeli, mono anye munhumile kuli mwene, ho nhegule wulombe wenyu kuli mwene, yakutya nhavi,

¹⁰ ‘Hono muwe mbeka mwendile kwikala mono yisi yiyi, ale, nane nomuzenjenyi, hamba si nomumwagulenyi yaye. Kanyhi nomuhadicenyi, hamba si nomukulenyi yaye. Sunga no wugazice wose wono nene nghamuletelenyi, alu wukumhela wukalale wuwaha muno.

¹¹ Holeka luno, mulecele lukulu kumogopa kanyhi u mutemi wa Babiloni. Hambi 'ne nha nili hamonga nanye, nane nomuponyenyi mu miwoko yakwe.

¹² Hambi 'ne, nha nili lusungu, nane nomunoza mwene yawe no lusungu kuli'nye, nayo komulecenyi muwuye ku kaya. Vyo nghutya, ane no Muwaha Mulungu.’ ”

¹³ Ninga hono mutye, “Ase si cikwenda kwikala mu'si yiyi.” Mulece kumuhulika u Muwaha Mulungu, u Mulungu wenyu.

¹⁴ Na hono mutye, “Aa, ng'o! Ninga ase cobita ku'si ya Misili kono sicowuwona wulugu, hamba kuhulika lizi lyo wulugu, hamba kutuga nzala, canjile ndigwa. Nase cokwikala kuko.”

¹⁵ Hono mulonje nhavivyo, nayo u Muwaha Mulungu, we mihanga u Mulungu wa Isilayeli, yakutya nhavi, “Nye nyo wo musigalila wa Yuda, hono muwe mwakondya kudumula nghani nha vyono mokwikala ku Misili.

¹⁶ Ale, no wulugu wono mukuwogopa, womusumenyi, ne nzala yono mwina mahwele nayo, yiyo nayo yomuzizenyi du, nanye wose molofwila kuko ku Misili.

¹⁷ Nawo wose wono wakondya kudumula nghani, nha vyono wobita wakekale kuko ku Misili, ale, wolofwila mu wulugu, hamba mu nzala, hamba mu matamwa. Na hasina hamba monga wa muli wene, mono kolopona yaye, hamba kwiponya yaye mu magazo gono nowaletela.”

¹⁸ U Muwaha Mulungu, u Mulungu wa Isilayeli yakutya nhavi, “Ninga mulanjilile! Hono mwijelele du mubite kuko ku Misili, ale, nane nomukolelwenyi likuwo lyangu hawaha, nha vyono nawakolelwa likuwo i wanhu wa Yelusalemi. Nanye molowa yiwifyo no wizine hali wanhu wose, nawo wolomubedegalenyi, no kulitumamila litagwa lyenyu nha wulijitwe. Nanye hamba si molohawona hanhu baha kanyhi.”

¹⁹ Nghawalonjela kanyhi nghatya, “Ninga mumanye vyono u Muwaha Mulungu, yakondya kumulonjelenyi, nha vyono, anye nyo wanhu mono musigazwe mu yisi ya Yuda, mulece kubita ku Misili yaye. Holeka ku soko yiyo, nane nghumusugulenyi, vyono, alu,

²⁰ mweza kwituma nghani 'mbi muno muno. Mumanye nha vyono nyenye nyo weneco, mukasaka ane nimulombelenyi kuli Muwaha Mulungu, u Mulungu wenyu, kanyhi mukehuwiza nha vyono, mokwituma zose nha vyono mwene komulajilizenyi.

²¹ Nane luno nakondya kumulonjelenyi. Ninga anye hamba si mukusacila lukulu kuzituma zose zono u Muwaha Mulungu, u Mulungu wenyu, yanhuma nize nimulonjelenyi.

²² Holeka ku soko yiyo, mumanye nha vyono, anye wose molofwila mu wulugu, hamba mu nzala, hamba mu matamwa, ku yisi yiyo yono mukusaka mubite mukekale.”