Yelemiya 22 - Luganuzi Luswanu Kuli Wanhu Wose 2002

I nghani ya Yelemiya, kuli nyumba yo wutemi wa Yuda

¹ U Muwaha Mulungu yakanonjela kanyhi yakatya, mbite ku kaya yo wutemi, yo mutemi wa Yuda, wo lulelo lwa Dawudi.

² Nghamulonjele u mutemi ne wetumami wakwe wose, hamonga ne wanhu wose wa Yelusalemi, wayihulicize nghani yono yakulonga u Muwaha Mulungu, yakutya,

³ “Ane no Muwaha Mulungu, nghumulajilizenyi nha vyono munojeye mweze kwituma ze ling'ani na zo mugoloka. Mweze kumutaziza u munhu wo wose mono yakukongwa-kongwa no kwiwonelwa no munhu yunji. Kanyhi mulecele lukulu kuwewonela, hamba kuwatendela vibi i wajenzi, hamba i wana wono wasina walezi, hamba i wacekulu wafwile. Hamba mulece kuwawulajila i hanhu hono helile, i wanhu wono wasina masutya.

⁴ Na hono mwitume nha vyono nghumulajilizenyi, ale, no lulelo lwa Dawudi lojendelela kuwa watemi. Kanyhi wene, hamonga ne wetumami wawo, ne wanhu wawo, wojendelela kukola mu milango ye kaya yiyi yo wutemi, hamonga ne mituka yawo yo wulugu, ne zifwalasi zawo.

⁵ Ninga hono mulece kugebata malajilizo gangu, mbeka nghumwilahilenyi nha vyono, likaya lili lyo wutemi lyologwa, gawe matongo du. Vyo nghutya ane no Muwaha Mulungu.

⁶ “Ninga ku lubavu lwangu, ane nghuyiwona kaya yo wutemi wa Yuda, swanu muno yihwanile nhe yisi ya Gileyadi, nhe matunda ga Lebanoni. Ninga ane noyinoza yiwe yisi nyhiwa, yono yowa yisina munhu wo wose mono kokwikala mumo kanyhi.

⁷ Hambi nha notuma wanhu wabite wakayongomeze, ne wanhu wawo, woteguliza hamonga ne zinhemo zawo, wakayitemanje ne mihagata, i mibici yayo miswanu muno, wayipembele mu moto.

⁸ “Na hanyuma yayo, i wajenzi wolowa kukola baho akuno wakwiwuza weneco wose, wakutya, alo so cici u Muwaha Mulungu, kalitendela likaya lili liwaha, zono zinha zizi lo?

⁹ Ninga kanyhi wokwipitula weneco wose wawe kutya, vyono, zizi zimwaganenyi ku soko anye mwakondya kucileka i Cilagane cono mwacinoza nane, ane no Mulungu wenyu, mukawa kuyihemba no kuyitumamila milungu yinji.”

I nghani ya Yelemiya kuli za Yowahazi

¹⁰ Nye nyo wanhu wa Yuda, mulece kumulilila u mutemi Yosiya ye, hamba mulece kulila ku soko yo wufwe wakwe. Langa mumulililaje ko wusungu wuwaha muno, Yowahazi u mwanagwe, hambi nha womusola, wamutegule kutali, nayo si kolowuyila lukulu hamba si koloyiwonela lukulu kanyhi ne yisi yono yalelelwa.

¹¹ Nayo Muwaha Mulungu, kuli za Yowahazi u mwana wa Yosiya, mono yawuhala wutemi wo sogwe Yosiya, yakawa mutemi wa Yuda, yakutya, nhavi, “Alu, kakondya kubita kutali, hamba si kolowuyila lukulu kanyhi.

¹² Langa kolofwila du kuko ku yisi yono kolotegulwa. Hamba si koloyiwonela lukulu kanyhi yisi yiyi ng'o.”

I nghani ya Yelemiya kuli za Yehoyakimu

¹³ Woyi, hee! Kuli munhu mono yakuzenga kaya yakwe mu nzila yono si ye ling'ani, no kuyonjeleza yiwe mbaha, mu nzila yono si ye ling'ani. Mono kawetumyaga i wanhu wanji bwete, hamba kuwalipa musahala wawo.

¹⁴ Woyi hee! Kuli munhu mono katezaga, “Ane nozenga kaya yo wutemi yono yowa yina vyumba vigazi muno ku golofa yayo.” Ale, hanyuma kawa kuwicila sunga ne madilisha mu kaya yakwe, kayigubika ne mihagata mucanyha yayo, kayihiliwa ne lanji ndunghu.

¹⁵ Alu mwene gwee! Kolo wazenga kaya swanu ko mubici wo muhagata, alo kaya yiyo yo yokunoza wuwe mutemi muswanu lo? Mono kowa wuli muswanu, wucizize sunga ne watemi wanji lo? Ninga wumanye nha vyono, u sogo yekala mu mikalile yo wumoti, Nayo yali yali ling'ani, na we mbeka vilo vyose. Na ku soko yiyo, yakamoteswa mu milimo yakwe yose.

¹⁶ Yawaling'anizaga waciwa kwe ling'ani, holeka na zose zikamuwela swanu muno. Na yiyi yo yikulajila nhunizo yo kumumanya Muwaha Mulungu.

¹⁷ Ninga agwe wukukwegwa no wihwesa zako du go mweneco, wukuwawulaga i wanhu wono wasina masutya wukuwewonela i wanhu wako ko wukali. Vyo nghutya ane no Muwaha Mulungu.

¹⁸ Holeka u Muwaha Mulungu yakulonga za kuli Yehoyakimu u mwana wa Yosiya u mutemi wa Yuda, yakutya nhavi, “Hasina hamba munhu monga mono kolocililila cifo cakwe, hamba kucilonga-longa kose yawe kutya, ‘Ka, nye! Mhola ndugu yangu si!’ Hamba hasina munhu mono kolomulilila hamba kwikunguza yawe kutya, ‘Mhola mulongola wangu! Mutemi wangu!’

¹⁹ Nayo kolozikwa nha vyono ndogowe yizikwaga, nha cinji, kolokwegwa, yawe kugumilwa du, kunze ye milango ya Yelusalemi.”

I nghani ya Yelemiya kuli ze zimbali zono zoyagana Yelusalemi

²⁰ Nye nyo wanhu wa Yelusalemi, alu mubite ku Lebanoni, mukalile muzozize, bitenyi na ku yisi ya Bashani, kuko nako mukalile, mucemeleze mu wulawilila mu matunda ga Mowabu, hambi i wendece wako wose nha wakondya kongomela.

²¹ Hambi u Muwaha Mulungu, nha yalongana nagwe, lono wali wukali wina no wumoteswe, ninga agwe wukalema kumuhuliciza, Nagwe wukawa wusina cihuliko mu mikalile yako yose, hamba si wasacila lukulu kumuhulika Muwaha Mulungu.

²² Holeka i walongola wako, wolopemhelusizwa kutali ne mbeho, ne wendece wako nawo wolosolwa nha wafungwa mu wulugu, ne likaya lyako, nalyo mbeka lyolokozwa cevu no kupuwa. Ku soko yo wubi wose wono wetuma.

²³ Nagwe mono wikaye wupolile mu mihagata yono yaletwa ku wulawa ku Lebanoni, kolowa wuli munhu wa kuwonelwa lusungu muno, kolo wusungu wakwagana, u wusungu wono wihwanile wo mucekulu mono yali mu nghunga yo lusawo.

Wuling'anizi wo Mulungu kuli Yehoyakimu

²⁴ U Muwaha Mulungu yakamulonjela u mutemi Yehoyakimu, u mwana wo mutemi Yehoyakimu, u mutemi wa Yuda, yakatya, “Na mbeka, nha vyono yo nene u Mulungu mumi, holeka hamba wuwe agwe wali wuli nyamwidole yangu ye citanjilo, mu muwoko wangu wo kulume, ninga alu nokuwopola,

²⁵ nghuwice mu miwoko ye wanhu wono agwe wuwogopile muno, i wanhu wono wakusaka wakuwulaje. Nokuwika mu miwoko ya Nebukadineza u mutemi wa Babiloni, hamonga ne wasilikale wakwe.

²⁶ Nokusola gwegwe hamonga no nyina yako, nimutegulenyi ku wuhamywe. Nanye molotegulwa sunga ko ku yisi, yono hasina hamba monga wa muli nyenye, mono yalelelwa kuko. Nanye wose molofwila kuko du.

²⁷ Nanye lono muli kuko, moloyisukwa muno muno yisi yenyu yiyi, ninga hamba si molowuyila lukulu ng'o.”

²⁸ Nane nghatya, “Alo mutemi yuyu Yehoyakimu, yehwana njilo ye malenga yono yakondya kutulika, yakondya kutagwa kunze, hambi nha yeza yisina cambuzi lo? Hamba yiyi yo soko yono yikaleka mwene, hamonga ne wanagwe wose, wakahamywa, wakategulwa ku yisi yono si wayimanyile yaye lo?”

²⁹ Gwe go'si, gwe go 'si, gwe go'si! Wuhulicize ta zono Muwaha Mulungu yakulonga, yakutya,

³⁰ “U munhu yuyu, yakondya kuling'anizwa yawe yasina wana, yawe munhu mono si kolomoteswa kanyhi yaye. Kolowa yasina kanyhi wana, wono wolotema mu yisi ya Yuda, wawe wo wahazi we ligoda lyo wutemi lya Dawudi. Vyo nghutya ane no Muwaha Mulungu.”