Yelemiya 16 - Luganuzi Luswanu Kuli Wanhu Wose 2002

U wuhile wo Muwaha Mulungu mu mikalile ya Yelemiya

¹ U Muwaha Mulungu yakanonjela kanyhi yakatya,

² “Gwe Yelemiya, wulece kutola, hamba kulela wana, i hanhu hono henha bahano.

³ Ninga nane nokulonjela zono zowagana i wana wono wolelelwa baha, hamonga ne walezi wawo.

⁴ Hambi wose nha wofwa ku soko ye matamwa mabi, na kanyhi holowa hasina hamba yunji wo wose mono kolowalilila hamba kuwazika yaye. Ne miwili yawo, yolowa yilundile caka du ako na ako mu muhangha, kotya malundo ga suji. Nawo wolofwila mu wulugu, hamba mu nzala, ne miwili yawo yolowa ndigwa ye zindeje hamonga ne vilimu vya mu mbago.

⁵ “Nagwe, yikunojeye wulecele lukulu kwinjila mu kaya yo yose yono yina cililo. Kanyhi nagwe wulece kumulilila hamba munhu monga. Nane hamba si nowamotya wanhu wangu no mulamu yaye, hamba si nowalajila zo wendo wangu, hamba si nowawonela lusungu yaye.

⁶ Nawo i wagoli ne waciwa, wose wofwila mono yisi yiyi du, na holowa hasina hamba munhu monga mono kolowalilila, hamba kuwazika yaye. Kanyhi holowa hasina hamba munhu monga mono kolokwisalanga-salanga mu muwili wakwe, hamba kwiceta mu mutwe wakwe, ho yalajile wukalale wono yena nawo mu nhumbula yakwe ku soko yawo.

⁷ Kanyhi holowa hasina hamba munhu monga mono kololya ndigwa, hamba kung'wezana na yunji mono yafwiliywe no nduguye, ho yiwe nha yo nzila yo kumusindamika. Hamba hasina munhu monga, mono kolomuwonela lusungu, u munhu wo wose mono yafwiliywe no sogwe hamba nyina.

⁸ “Nagwe Yelemiya, nghukulonjela nha vyono kanyhi, wulecele lukulu kwinjila mu kaya yo yose yono yina zindigwa ze sikukuu, no kuhanga nawo mu wulye na mu wung'we.

⁹ Alu agwe wuhulicize zono nowanoza, ane no Muwaha Mulungu, we mihanga, u Mulungu wa Isilayeli. Ane nogadumya ha meso genyu, i mazi gose ge nyemo no wusangalale, hamonga ne mazozo gose ge nyemo, ga mu zindigwa zi nyinji ze zi halusi.”

¹⁰ “Nagwe kolo wukukondya kuwalonjela zizi zose, nawo wokuwuza i soko yono yikuleka ane ndumula nghani, nha vyono nowalipiciza vibi muno muno nhavivyo. Wokuwuza kanyhi wamanye i nghani 'mbi yono wetumile, hamonga no wubi wono wamutendeye u Muwaha Mulungu, u Mulungu wawo.

¹¹ Nagwe wuwapitule, wuwalonjele zono u Muwaha Mulungu yakulonga yakutya nhavi, ‘I walezi wenyu, wandeka ane no Mulungu wawo, wakawa kuyihemba milungu yinji, no kuyitumamila. Wakalemela lukulu no kugahulika i mejizo gangu.

¹² Anye nanye luno mwetuma vibi muno kuciza ne walezi wenyu. Nanye wose, mweza musina hamba cihuliko, kanyhi mweza muli wanhu wabi muno, hamba si mukusaka kuwa na cihuliko kuli'ne yaye.

¹³ Ku soko yiyo, nane nomuwusenyi mono yisi yiyi, nimutegulenyi ku yisi yono anye si muyimanyile yaye, yono ne walezi wenyu wali si wayimanyile ng'o. Nanye kuko, molowa kuyitumamila i milungu yinji misi ne cilo, nane hamba si nolomuwonelenyi lusungu ng'o.’ ”

U wuwuye wo kulawa ku wuhamywe

¹⁴ U Muwaha Mulungu yakutya nhavi, “I vilo vikuza lono i wanhu si wolowa kwilahila kanyhi muli'ne, ane no Mulungu mumi, mono nawawusa wanhu wa Isilayeli ku yisi ya Misili.

¹⁵ Langa wolowa kwilahila muli'ne no Mulungu mumi, mono nawawusa wanhu wa Isilayeli mu yisi ya ku lubavu lwa kusumuka, hamonga na mu wulawa mu ma'si gose mono nali niweyagazize. Nane nolowagomola kanyhi mu yisi yawo, mu yisi yono nawapela i walezi wawo. Vyo nghutya ane no Muwaha Mulungu.”

U wulipicizwe wono wukuza

¹⁶ U Muwaha Mulungu yakutya nhavi, “Ane nowatuma wanimula somba wenji muno, waze wawanimule wanhu wawa. Hanyuma yayo, niwaceme i wapelembi wenji, waze wawapelembe mu wulawa mu matunda gose, na mu vigongo, sunga na mu zimhango ze mabwe.

¹⁷ Hambi'ne, nha nghuziwona zose zono wakwituma, hasina hamba cinji co cose cono cihundicigwe ha meso gangu. No wubi wawo wose nha wijeye du calinze ha meso gangu.

¹⁸ Nane nowalipiciza nghanghulo nyejete, ku soko yo wubi wawo, ne metumo gawo mabi. Hambi nha wayavufya yisi yangu ku soko ye milungu miseswe, yono yisina wumi, yihwanile ne mivimba du. No kuyimemya yisi yangu ne milungu yawo yo wulambi.”

Yelemiya yakulomba yapetuce hali Muwaha Mulungu

¹⁹ Gwe o Muwaha Mulungu, yo gwegwe du mono kundimaga, no kumhela vilungo, kanyhi yo gwegwe du mono kumhelaga wutazi mu mapango go wugaye. Ne makungugo nha golokuziza gakulawa mu zimhelo zose ze yinze wawe kutya, “I walezi wetu hamba si wahala cinji, langa wahala i milungu yo wulambi, hamonga ne vihwani viseswe, vyono visina hamba cambuzi co cose.

²⁰ Alu mwene, mbeka u munhu kosuma kwinozeza mweneco milungu yakwe hongo? Na mbeka hamba si kosuma yaye. Na hono yayisese, ayo hamba si yowa milungu ye mbeka yaye.”

²¹ Muwaha Mulungu yakutya nhavi, “Lanje ta, alu noganoza i makungugo gose gaviwone vilungo vyangu hamonga no wusume wangu. Nawo nhondo ho womanyila vyono ane yo nene Muwaha Mulungu.”