Yelemiya 15 - Luganuzi Luswanu Kuli Wanhu Wose 2002

Woyi hee kuli wanhu wa Yuda

¹ Hanyuma u Muwaha Mulungu yakanonjela yakatya nhavi, “Gwe Yelemiya, hamba yali yaze Musa na Samwili, wawe wemile bahano izuwali, wakuneneleza 'ne, nane hamba si nali niwawonele lusungu wanhu wawa ng'o. Holeka wuwawuse wabite, wawuce ha meso gangu.

² Nawo kolo wakukuwuza vyono wabite hayi lo, nagwe wuwalonjele zono ane nonjile, nitya, Woyi hee, hambi wanji nha wofwa ne matamwa, na kuko ko wobita! Woyi hee, wanji wofwila ku wulugu, na kuko ko wobita! Woyi hee, wanji wofwa ne lizala, na kuko ko wobita! Woyi hee, nawo wanji wosolwa wategulwe kutali nha wafungwa, nawo kuko ko wobita!

³ Nane no Muwaha Mulungu, nakondya kudumula nghani, nha vyono zizo nghani mbaha yine, zo zowagana. Wowulagwa no wulugu, ne miwili yawo yokwegwa ne mabwa, ne zindeje zoyilya, i malimu ga mu mbago, nago golya cono cowa cikali cisigaye.

⁴ Nane nowanoza i wanhu, wawe nghani ya wogofye, kuli wanhu wa mono'nze yose, ku soko ye nghani yono Manase u mwana wa Hezekiya, yetuma mu Yelusalemi, lono yali mutemi wa Yuda.”

⁵ U Muwaha Mulungu yakutya nhavi, “Alu nye nyo wanhu wa Yelusalemi, alo nani mbi mono komuwonelenyi lusungu, hamba nani lo, mono komulililenyi? Hamba nani lo mono komuzizenyi yamuwuzenyi zo wuwe wenyu?

⁶ Hambi anye nyo wanhu, nha mwakondya kundeka 'ne, nalu mwamhitucila migongo yenyu. Ku soko yiyo, holeka nane nghawugolola muwoko wangu, nghamongomezenyi, hambi nha nali nalemwa kulimila likuwo lyangu.

⁷ Nane nghamupemhelusizenyi ne mbeho mu makaya gose ga mu'si, kotya nha muli mahanze, nghamongomezenyi, anye nyo wanhu wangu, nghawawulaga ne wana wenyu, vyono si mwaleka kwituma zinghani zenyu zimbi.

⁸ Sunga nalu mu yisi yenyu, mowali wacekulu wenji muno i wafwile, no winji wawo winha nho musawawa wa mwi'lenga. Kanyhi nghawawulaga i wazelelo wenyu mu wuzelelo wawo, nghawatajila mu wusungu wuwaha i wanyina zawo. Nghawapela wusungu musunho, hamonga no wogofywe.

⁹ No nyina yo munhu mono yawajilize i wanagwe mupunghati, yakondya kuzilika, yakuhangawa no wehele. No wuzelu wakwe we lizuwa, alu wapituka wawa wutitu, nalu yakolwa cevu no kuwa no wusungu wuwaha mu nhumbula yakwe. Nane nowaleta walugu wenyu, wawawulaje wose wa muli nyenye wono wakali womi. Vyo nghutya ane no Muwaha Mulungu.”

Yelemiya yakumung'ung'ulicila u Muwaha Mulungu

¹⁰ Alu nhondo, neza nili munhuci waco, mono sina hamba nyemo yose! Hamba socici lo yaya yandela? Hambi nha neza nili munhu wa wugombane no wisumaniza na wanhu wanji wa mono'si. Ane ninga ho nghali si namukopesha yunji pesa zangu, hamba kukopa kwa yunji yaye. Ninga hamba nhavivyo, i wanhu vyo wakali wakundijita du.

¹¹ Gwe go Muwaha Mulungu, nane nghutya, hono niwe ane si nakwitumamila viswanu, ale malijito gawo lece ganyizize, na hono niwe si nakunena, ku soko ye walugu wangu, lono wali wali mu wugaye, hamonga no wusungu wuwaha.

¹² (Na hasina munhu wo wose mono kosuma kucibena cuma, na ko muno, cuma cono cikulawa kusumuka, hamba shaba.)

¹³ Kanyhi u Muwaha Mulungu yakanonjela yakatya, “Kanyhi nolowaleta walugu, waze wazisole zisawo ze wanhu wangu hamonga no wugoli wawo wose, wawalipicize ku soko yo wubi wono wetumile mu yisi yose.

¹⁴ Kanyhi nolowanoza wawetumamile i walugu wawo, mu yisi yono si wayimanyile yaye. Hambi likuwo lyangu nha linha moto, nalyo lyojendelela kwaka cibitilila.”

¹⁵ Hanyuma nane Yelemiya, nghapitula nghatya, “Gwe go Muwaha Mulungu, agwe go mweneco wuzimanyile. Ninga langa wunghumbucilaje, wumhele wutazi. Nghukunena wundipicizize simbili yangu kuli wose wono wakumhela magayo. Wulece kuwakangalila wawo, ho walece kusuma kumbulaga. Kanyhi wukumbucile vyono ane nghutovulwa ku soko yako gwegwe.

¹⁶ Agwe wanonjela zinghani zako, nane nghazihuliciza muno. Ane nili wako, agwe go Muwaha Mulungu, we mihanga vyose. Holeka ne zinghani zako zimemile mu nhumbula yangu na nyemo hamonga no wusangalale.

¹⁷ Nane hamba si nali nendile kuvitaga vilejeho vyangu, mu wuduwa ne wanhu wanji, kwiyendeza bwete du mu luseko, na mu wiyendeza ne zangu nene no mweneco. Na ku soko ye cihuliko cangu ca kuli zo wulajilize wako, holeka hanji, nekalaga nyamaye nili wene, akuno memigwe ne likuwo.

¹⁸ Alu nhawule njendelele mu wusungu du? Hamba alu socici ne zinghomele zangu si zikuponywa yaye? Hamba nhawule lu si zikupona ng'o? Gwe go Mulungu, hamba wukusaka wunhukuwice mutima wangu, nhe cikolongo cono cinyalaga mwibahu?”

¹⁹ Nayo Muwaha Mulungu yakamhitula yakatya, “Hono wuwuye, nane nokugomola, nagwe kowa wuli mwitumami wangu kanyhi. Na hono wuzilece zinghani ze cibwete-bwete, wuwe kuganula zinghani zangu, baho langa ho kowa wuli muwizi wangu kanyhi. Ne wanhu wokuziza gwegwe, ninga agwe kowa wusina soko yo kuwabitila wene.

²⁰ Nane nokunoza wuwe nhe lijinji lya shaba muli wanhu wawa. Nawo wokwihoma nagwe, ninga si wokusuma yaye. Nane nowa hamonga nagwe ho nghudime no kukuponya.

²¹ Nane nokuponya mu miwoko ye wanhu wabi, ne wanhu wagazi. Vyo nghutya ane no Muwaha Mulungu.”