Yelemiya 13 - Luganuzi Luswanu Kuli Wanhu Wose 2002

Kaputula ya bafuta

¹ U Muwaha Mulungu yakanonjela mbite nghegulile kaputula ya bafuta, niyivwale. Ninga yakatya vyono, ndece kuyiloweka mu malenga yaye.

² Holeka nghagula kaputula ya bafuta nha vyono Muwaha Mulungu yanonjela, nghayivwala.

³ U Muwaha Mulungu yakanonjela kanyhi yakatya,

⁴ “Alu wubite sunga ko kwi'kolongo lya Efulata, wukayihundice kuko kaputula yiyo, mu mhalika ye libwe.”

⁵ Ale, du, nane nghawa kubita, nghawa kuyihundika kuko, behi ne likolongo lya Efulata.

⁶ Vyali vyeza kupuluta vilo vinji, u Muwaha Mulungu yakanonjela vyono mbite kwi'kolongo lya Efulata, nghayisole kanyhi kaputula yi yilya.

⁷ Ale, nane nghawa kubita, nali neza kuhawona i hanhu hono nayihundika kaputula yiyo, nghayagana yakondya kuhodanjika, hamba si yokwila kanyhi cinji co cose.

⁸ Hanyuma u Muwaha Mulungu, yakanonjela kanyhi yakatya nhavi,

⁹ “Ale, nane vyo nowuhodanga nhavivi, u wiwoni no widunhumuzi wa Yuda, na wa Yelusalemi.

¹⁰ Hambi i wanhu wawa, nha wakulema kuzihulika zinghani zangu. Weza wanhu wabi ku wulawa na katali, wakuhemba no kuyitumamila i milungu yinji. Holeka nawo wokwihwana ne kaputula yiyino, yono yeza yisina kanyhi cambuzi co cose.

¹¹ Ale, nha vyono kaputula yikamaga nzii mu ciwino, nane nali nitumbiye nha vyono i wanhu wose wa Isilayeli na Yuda, wowa wenamatiye nane hamba kundeka yaye. Nane nazinoza zizi, i wene ho wawe wanhu wangu, ho wasume kulikumya no kulipela lilumbo litagwa lyangu. Ninga wene si wakasaka kuhulika 'ne hamba nhavi.”

Njilo ye divayi

¹² U Muwaha Mulungu yakanonjela kanyhi yakatya nhavi, “Gwe Yelemiya, ale wuwalonjelaje wanhu wa Isilayeli nha vyono, njilo zose zomema divayi. Ninga wene wokupitula watye, nawo heya wamanyile nha vyono njilo zose zomema divayi.

¹³ Nagwe wuwalonjele nha vyono, ane no Muwaha Mulungu, nowang'wesa divayi, i wanhu wose we yisi yiyi, nawo woying'wa sunga wagale muno muno, hamonga ne watemi wawo, wo lulelo lwa Dawudi, sunga ne wakohani wawo, ne wawizi, hamonga ne wanhu wose wa Yelusalemi.

¹⁴ Hanyuma ho niwe kuwatulanjiza nhe zinjilo zono zikutowezwa njilo na njilo nyagwe. Nawo vyo wotowezwa munhu na muyagwe, i wasogo zo munhu ne wana wawo. Nane si nowawonela lusungu yaye, hamba lusungu, si lonyimila yaye, ho ndece kuwawulaga ng'o.”

Yelemiya yakuwasugula wanhu kuli zo wiwoni

¹⁵ Nye nyo wanhu wa Isilayeli, u Muwaha Mulungu yakondya kulonga. Mweze wenenenyhezi, kanyhi muli cihuliko kuli mwene.

¹⁶ Mogopenyi u Muwaha Mulungu, u Mulungu wenyu, lono yakali si naleta wutitu, wono wosuma kumwambuzenyi mwikobale mu matunda, mu madaha go wutitu, ne madaha gono mukulanjilila wuzelu, u wuzelu wono mwali muwitumbiye.

¹⁷ Holeka hono mwikale si mumuhulice, nane nolila cinyele ku soko yo wiwoni wenyu, nolila ko wusungu muno, ne mahozi gangu gosulula, ku soko ye wanhu wo Muwaha Mulungu, wono wakondya kusolwa mateka.

¹⁸ U Muwaha Mulungu yakanonjela kanyhi yakatya, “Wubite wumulonjele mutemi, hamonga no nyina, wawuce mu magoda gawo go wutemi. Hambi i vipombelo viswanu mu mitwe yawo, nha vyakondya kuwopozwa mu mitwe yawo.

¹⁹ Hambi i makaya ga Yuda, gono gali ku lubavu lwa kutakama ge yisi ya Yuda, nha gakondya kupilimwa no wulugu, hamba hasina munhu wo wose mono kosuma kwinjila mu makaya gago kanyhi. Ne wanhu wose wa Yuda nha wakondya kusolwa, wategulwa ku wuhamywe.”

²⁰ Ale lu Yelusalemi, winule meso gako wulanje! I walugu wako nha weza kukuziza wakulawilila ku lubavu lwa kusumuka! Ku lubavu lwe wanhu wono wali wakwitumbiye muno u wudimi wako, i wanhu wono nagwe wedunhumulilaga muno.

²¹ Alu ho kotya wule, lono i wanhu kanyhi wawo, wono wehwesaga vyono wo wayago, alu wakusuma no kukutema? Na mbeka kohulika wusungu muno, nho mucekulu mono yali mu nghunga yo lusawo.

²² Na kolo wukwiwuza go mweneco wukutya, alo nhawule zizi zinyijelela lo? Heya! Myenda yako yidemulwa, nagwe wukebatwa ne walume, no kugona nagwe kwe vilungo. Ale, wumanye nha vyono, zizi zikwagana ku soko yo wubi wako wono wukogofya muno.

²³ Alo wukwihwesa nha vyono u munhu mutitu, kosuma kuwukawaniza wutitu we nghuli yakwe lo, hamba suwi kugapata i mawalawala gayo? Na hono yiwe yisumice, ale, na gwegwe mono wuzoweye kwituma zimbi du, kumbe kosuma kwiyijiza ku wituma ziswanu.

²⁴ Ninga luno u Muwaha Mulungu, kokwiyagaza ako na ako nhe mahanze, gono gakuwa kupemheluswa ne mbeho ya mu nyika.

²⁵ Hambi nha yalonga na katali, nha vyono lili lyo lyowa lye 'fungu lyako. Hambi nha yadumula nghani, nha vyono kokutendela zizi. Ku soko vyono 'gwe wamusemwa mwene, wakondya kuyitumbila milungu yo wulambi.

²⁶ Nayo u Muwaha Mulungu kokupenula myenda yako yakukoze cevu.

²⁷ Hambi nha yakondya kukuwona vyono, wukwituma zinghani zono mwene si yazendile yaye. Kakondya kukuwona na vyono wukuyityatya i milungu ye wanhu wono si wamumanyile Mulungu mu vigongo, sunga na mu mawimbi, nha munhu mono yakumusulumila u mucekulu wo muyagwe, hamba nha fwalasi nume yono yikuyisulumila fwalasi nyhekulu. Woyi hee! Nye nyo wanhu wa Yelusalemi! Hambi nha mukulema kwezwa! Alu ho mojendelela ne zinghani zizo sunga nili lo?