Yelemiya 11 - Luganuzi Luswanu Kuli Wanhu Wose 2002

Yelemiya ne Cilagane

¹ Hanyuma kanyhi u Muwaha Mulungu yakanonjela yakatya, nhavi,

² “Alu Yelemiya, wuhulicize ta nghuloloseze i zinghani ze Cilagane cici. Nagwe wuwalonjele i wanhu wa Yuda na wa Yelusalemi,

³ nha vyono ane no Muwaha Mulungu, u Mulungu wa Isilayeli, nakondya kumulijita munhu wo wose, mono si yakuzikamisa zinghani ze cilagane cici.

⁴ Hambi nha co cilagane cono nacinoza ne walezi wawo, lono nawawusiza mu yisi ya Misili, mu yisi yono yali yinha nha moto mukali kuli wene. Nane nghawalonjela nha vyono wahulice 'ne no kwituma zinghani zose, zono nawalajiliza. Nane nghawaloloseza nha vyono, hono wazibate, wowa wanhu wangu, nane nowa Mulungu wawo.

⁵ Ale, nane ho nowufisiliza wihuwizo wangu, wono nawehuwiziza i walezi wawo, nha vyono nowapela yisi yono yina wugoli, hamonga no moso mwinji, yono wena nayo luno.” Nane nghapitula nghatya, “Heya vyo yiweze, gwe go Muwaha Mulungu.”

⁶ Nayo Muwaha Mulungu yakanonjela yakatya, “Alu, wubite mu makaya gose ge yisi ya Yuda, hamonga na mu zinzila zose za mwi'kaya lya Yelusalemi. Wubite wukayiganule nghani yangu kuko, wuwalonjele wanhu vyono, yiwanojeye wazihulice zinghani ze cilagane no kuzitumama.

⁷ Hambi nha nawahomelela no kuwasugula i walezi wawo, lono nawawusiza mu yisi ya Misili, vyono yiwanojeye wahulice'ne. Kanyhi hamba si naduma baho du, langa najendelela kuwasugula wanhu sunga nalu.

⁸ Ninga wene hamba si wahulika yaye, hamba kwituma zono nghulonga. Langa wene wakajendelela du kuwa wasina cihuliko, no kwituma zimbi nha vyono wali wazoweye. Ninga nane, nghacila muno kuwalajiliza wetume ze cilagane cici, ninga wene wakalemela lukulu kwituma. Holeka nane nghawalipiciziza mu wulipicize wono wukuloloswa mu cilagane cici.”

⁹ Hanyuma kanyhi u Muwaha Mulungu yakanonjela yakatya, “I wanhu wa Yuda, hamonga ne wanhu wa Yelusalemi, nha wamumbiye wuhile wubi.

¹⁰ Alu nha wawuwuyila u wubi we walezi wawo, wono walemaga kwituma zono nawalonjelaga, wene wakayihemba milungu yinji. Holeka ku soko yiyo, wawa wose, Isilayeli na Yuda, wakondya kucibena cilagane cangu cono nacinoza ne walezi wawo.

¹¹ Holeka sunga nalu, ane no Muwaha Mulungu, nghali kuwasugula du, nha vyono nowaletela wongomele wuwaha muno, wono si wosuma hamba kuwilega yaye. Nawo kolo wakundilila wakusaka wutazi, nane hamba si nowahuliciza yaye.

¹² Hanyuma yayo wawo wanhu wa Yuda na Yelusalemi, wawe kuyibitila i milungu yiyo, yono wayilavizyaga makumbiko, wakayililile yiwapele wutazi. Ninga i milungu yiyo, si yosuma hamba hadodo kuwaponya, kolo weza kuza u wongomezwe wuwo.

¹³ Kanyhi, wumanye nha vyono i wanhu wa Yuda, wena milungu minji muno muno, nha vyono winha u winji we makaya gawo. Nawo i wanhu wa Yelusalemi, wazenjile makumbicilo menji muno, gehwanile no winji we zinzila zawo za mwi'kaya go kumufusiza wuvumba mulungu we cevu Baali.

¹⁴ Holeka ku soko yiyo, 'gwe Yelemiya, wulece kuwalombela wanhu wawa kuli'ne, hamba kuneneleza 'ne ku soko yawo. Hambi lono wali mu magayo, na kolo wakundilila ho niwapele wutazi, nane si nowahuliciza hamba hadodo ng'o.”

¹⁵ U Muwaha Mulungu yakutya nhavi, “Alu lanje ta! I wanhu wono niwendile, wakwituma luno zinghani zimbi. Alu, ho wowa wena ling'anici kanyhi mu Nyumba yangu? Alo wene wakwihwesa nha vyono wosuma kuwimila wongomezwe wuwo hongo, mu nzila yo kwihuwiza du, na mu nzila yo wulavya mitugo so makumbiko? Wule, wukwihwesa zizo zowanoza wawe wena nyemo hongo?

¹⁶ Nane halulongozi, nawacemaga wene, u mubici wo muzeyituni wono wina mahamha gono gadedewaye, wono wulelile mikalo miswanu muno. Ninga aluno, ane nogakung'unhila mu moto mahamha gayo ne nyhinyinho mbaha, ne manhambi gayo gose gobeneka.”

¹⁷ “Ane no Muwaha Mulungu, u Mulungu we mihanga, yo nene mono nawahadika Isilayeli hamonga na Yuda. Ninga lu lanje, nakondya kuwogofya ne magazo. Ninga zizi zose, nha weletela weneco du, so wituma zimbi wawo. Hambi nha wanghoza likuwo so wulavizya Baali makumbiko.”

Yelemiya yakuwumbilwa wuhile wubi

¹⁸ U Muwaha Mulungu, yakamanyiza zo wuhile wubi wono wakumumbila i walugu wangu.

¹⁹ Ninga ane nali ninha nyana ye ngholo, yono mholo, yono yikutegulwa ku wuwulagwe, hamba si nali manyile nha vyono wakondya kumumbila wuhile wubi. Wakutya, “Nye! Alenyi ciwudumule u mubici wuwu, lono wukali wukamile. Alenyi cimuwulaje, ho halece kuwa na munhu wo wose mono kolomukumbucila kanyhi.”

²⁰ Hobaho nane nghawa kumulomba Mulungu nghatya, “Gwe go Muwaha Mulungu u Mulungu we mihanga, agwe yo gwegwe mono wuli muling'anizi we ling'ani, kanyhi yo gwegwe du mono kuwajelaga i wanhu mu zinhumbula zawo, sunga na mu mitima yawo mugati. Holeka nane luno, nghuziwika zinghani zangu mu miwoko yako, nane nghulanjiliye wuwalipicize wanhu wawa.”

²¹ Ne wanhu wa ku Anatoti, wali wendile ane mbulagwe. Wakanonjela nha vyono wosuma kumbulaga, hono njendelele kuyiganula nghani yo Muwaha Mulungu.

²² Ale! Nayo u Muwaha Mulungu we mihanga yakatya, “Ale, heya, nowalipiciza! I wazelelo wawo, wowulajilwa ku wulugu, nawo i wana wawo, i wahinza ne wazelelo, wofwa ne nzala.

²³ Nane nha nakondya kuliwikaniza lizuwa lyono nolowuletela wongomele muli wanhu wa Anatoti. Ne lizuwa lilyo kolo lyakondya kuza, holowa hasina hamba munhu monga wa muli wene mono kolopona.”