Nehemiya 9 - Luganuzi Luswanu Kuli Wanhu Wose 2002

Wanhu wakunena wubi wawo

¹ Mu mwezi wuwo, mwi'zuwa lye makumi mejete na yine, i wanhu wa Isilayeli wakekongholela hamonga, wakaleka kulya, ho walajile wukalale wawo so wubi wawo.

² Wali wakondya kwisiwanula ne wanhu we makungugo ganji. Wakavwala magunila, no kwiyesela manghundi mu mitwe yawo, ciwe nha citanjilo co wukalale awo. Wakema, wakanza kunena wubi wono wali wetumile, hamonga no wubi we walezi wawo.

³ Lilajilizo lyo Muwaha Mulungu, u Mulungu wawo, likasomwa ha mwande yawo saa yidatu. Na mumapango kanyhi ga saa yidatu, wose wakema wima wakanena wubi wawo, wakamuhemba Muwaha Mulungu, u Mulungu wawo.

⁴ Baho hali ho hali hanhu hacanyha ho kulonjela hono hali hazenjigwe ne mabici hono Walawi wemaga mucanyha yayo. Ale Yeshuwa yakema mucanyha yayo, hamonga na Bani, na Kadimiyeli, na Shebaniya, na Buni, na Shelebiya, hamonga na Bani na Kenani. Wakalomba hamonga kwe mazi mawaha, kuli Muwaha Mulungu, u Mulungu wawo.

⁵ Hobaho i Walawi, Yeshuwa, Kadimiyeli, Bani, Hashebeneya, Shelebiya, Hodiya, Shebaniya, na Petahiya, wakawa kuwacemeleza wanhu waze ku wuhembi, wakatya, “Mwime mukamile, mumulumbe Muwaha Mulungu, u Mulungu wenyu, Mumulumbaje cibitilila ne cibitilila! Ale, wose walikumye litagwa lyako lyo lukumyo. Lyono likumucile si nho wulugute wose ne lilumbo lyose.”

⁶ Hobaho wana wa isilayeli, wakalomba lilombo alino, “Gwe go Muwaha Mulungu, yo gwegwe Muwaha wuli wene, yo gwegwe mono wawumba wulanga, hamonga ne zinyelezi kucanyha. Yo gwegwe mono wawumba yisi ne lilenga, na vyose vyono vili mumo. Yo gwegwe mono kuvipelaga vyose wumi. Mihanga yose ya ku wulanga. Yikufugamilaga gwegwe no kukuhemba.

⁷ Yo gwegwe go Muwaha Mulungu u Mulungu mono wamuhagula Abulamu. Wukamutonga ku wulawa ku Uli wa ku Babiloni, wukamupela ne litagwa lya Abulahamu.

⁸ Wukamuwona vyono mwihuwilwa kuli'gwe, wukawika cilagane nayo, wukamwilahiza vyono kowapela wo lulelo lwakwe yisi ya Kanani. Ne yisi ye Wahiti, ne Waamoli. Ne yisi ye Wapelizi, Wayebusi, ne Wagiligashi. Ho yiwe yisi yono zindelo zakwe zowa kwikala. Wakamisa wihuwizo wako. Vyono agwe wuli mwihuwilwa.

⁹ “Wukawona ne walezi wetu vyono wagazwaga ku Misili, wukawahulika ne cililo cawo, lono wasakaga wutazi he'lenga lya Shamu.

¹⁰ Walajila vitanjilo vyo wizine kuli mutemi Falawo, hamonga ne walongola wakwe, ne wanhu wa mu yisi yakwe. Hambi 'gwe nha wukamanya vyono wawewonelaga wanhu wako, wuketujila lukumyo lono wina nalo sunga nalu.

¹¹ Wukanoza wukolo mwi'lenga, so wanhu wako, wakakola mu muhangha mukavu. Ne Wamisili wono wawatyatyaga, wukawagubiza mu malenga kotya yibwe, mu visolo vye lilenga.

¹² Wukawatonga ku misi ne lisumbili lye livunde. Na ku cilo nako wawamulicilaga nzila ne lisumbili lyo moto.

¹³ Yo gwegwe mono watima mwi'tunda lya Sinayi ku wulawa ku wulanga, wukalongana ne wanhu wako, wukawapela no wuling'anizi we mbeka, ne malajilizo maswanu.

¹⁴ Yo gwegwe mono wawalanjiza, wayibate Sabato yako yono yelile. Wukawapelela ne malajilizo gako muli Musa u mwitumami wako.

¹⁵ Na lono wali wasina ndigwa, wukawapela ndigwa ku wulawa ku wulanga. Na lono wali wakaluka, wukawapela malenga ku wulawa mwi'bwe. Wukawalajiliza wakayiteme yisi, yono wawehuwiziza vyono kowapela.

¹⁶ Ninga walezi wetu wakekumya muno, wakawa wasina cihuliko mu mikalile yawo, wakalema sunga no kugatyatya ne malajilizo gako.

¹⁷ Wakalema kuwa na cihuliko, wakasemwa zose zono wetuma. Wakasemwa sunga ne mapoto gono wetuma. Na mu cibede cawo, wakahagula mulongola, ho yawagomole ku yisi ya Misili, yisi yo wuwanda. Ninga 'gwe, wuli Mulungu wo wunenezi. Mono wumemile wendo ne lihewa, kanyhi si wuli mupelu kukolwa ne likuwo. No lusungu lwako luwaha, hamba si wawaleka yaye.

¹⁸ Wakenozeza cihwani cenjedulwe ca ndama wakatya, yali yo mulungu wawo, mono yawawusa ku yisi ya Misili! Wakakutovula wutovule wuwaha 'gwe go Muwaha Mulungu.

¹⁹ Ninga 'gwe siwasuma kuwaleka mu nyika yi yilya ku soko yo lusungu lwako luwaha, siwawawusiza lisumbili lye livunde lyono lyawalajilaga nzila ku misi. Hamba lisumbili lyo moto lyono lyawamulicilaga nzila ku cilo.

²⁰ Ko wuswanu wako, wawalonjelaga cono wetuma. Wukawalisa i mana, wukawapela ne malenga go kung'wa.

²¹ Mu myaka makumi mane yono wene wapilimaga mu nyika, wawapela visakwa vyawo vyose. Sunga ne myenda yawo si yasakala, ne migulu yawo hamba si yavimba so mawine go kujenda.

²² “Wukawapela wusume muli walugu wawo na muli makungugo, no wutemi, hamonga ne zi'si zono wawagawila. Wakayisuma yisi ya Heshiboni yo mutemi Sihoni, hamonga ne yisi ya Bashani, yono yali yo mutemi muwaha Ogu.

²³ Wukawapela wana wenji muno, wakawa wenji nhe zinyelezi zono zikwijela ku wulanga. Kanyhi wukawasumila no wulugu wawo, wakekala na mu'si yilya yono wawehuwiza vyono kowapela walezi wawo.

²⁴ Wakayisuma ysi ya Kanani. Nagwe wukawawusa ne wanhu wono wekalaga mumo. Wukawapela wanhu wako vilungo, ho wetuma nha vyono wasakaga weneco, kuli wanhu ne watemi wa Kanani.

²⁵ Wanhu wako wakatema ne makaya gono gali mazenjelwe magomawakali, ne yisi yo moso, ne zikaya zono zali zina sawo, hamonga ne masima, ne mibici ye mizeyituni, ne mibici ye mikalo miswanu, hamonga ne Mizabibu. Wakalya vyose vyono wasakaga, wakajina muno, wakendezwa ne vinhu vyose viswanu vyono wawapela.

²⁶ “Ninga hamba nha vivyo i wanhu wako siwakuhulika yaye. Wene wakakugaluka, wakataga ne malajilizo gako. Wakawawulaga sunga ne wawizi wono wawasugulaga, no kuwalonjela wakupitucile gwegwe. Wakakutovula kenji na kenji.

²⁷ Na ku soko yiyo nagwe wukawaleka, wakatowa no kutemwa ne walugu wawo. Na mu mapango go wugaye, wakakulomba wutazi, nagwe wukawapitula ku wulawa ku wulanga. Na ko lusungu lwako luwaha, wukawaletela walongola, wono wawakomboza mu walugu wawo.

²⁸ Ninga wali weza kutuga mulamu, wakawuyajila ku wituma wubi kanyhi. Nagwe kanyhi wukawaleka walugu wawo, wakawatema. Hamba nhavivyo wali weza kunena, no kukulilila wuwataze, wukawahulika kuko ku wulanga no kuwataza kenji na kenji, so lusungu lwako.

²⁹ Wukawasugula wagavumile mafundo gako, ninga so cibede cawo, wakagalema ne malajilizo gako, hamba yiwe, mu wibata wulajilize wako, yo nzila yo wumi. Ninga wene so cibede cawo wakafyula wakalema no kukuhulika.

³⁰ Mu myaka yose, agwe wawasugulaga ko wukangalile. Wukawejiza wawizi, ho wawalonjele, ninga wanhu wako wakawa wali ciziwi. Holeka nagwe wukawaleka, wakatowa ne walugu wawo wa mu makungugo ganji.

³¹ Hamba nhavivyo, so lusungu lwako luwaha kuli wene, holeka si wawaleka hamba kuwongomeza yaye. Hambi 'gwe, nha yo gwegwe Mulungu we lihewa no lusungu!

³² “Holeka 'gwe Mulungu, go Mulungu wetu, wuwaha wako wucizize! Mono wuli wo kogofya, kanyhi wuli we vilungo! Mono kukamisaga ko wihuwilwa cilagane no lusungu lwako, hamonga no wihuwizo wako. Ku wulawa mu vilo vyono watemi wa Ashuli waciwonelaga, sunga na lulu hose, magayo malinga gono gakondya kucagana! I watemi wetu ne walongola wetu, ne Wakohani wetu, ne wawizi, ne walezi wetu, hamonga ne wanhu wose, cili mu wugaye. Holeka wukumbucile vyono cagaya muno!

³³ Wetuma viswanu kucilipiciza, kanyhi wuketuma ze ling'ani, hambe nha cakunozeza wubi.

³⁴ Walezi wetu, ne watemi wetu, ne walongola wetu, hamonga ne wakohani, hamba si walityatya Lilajilizo lyako, hamonga no Wulajilize wako wono wawapela.

³⁵ Ninga ko wuswanu wako wuwaha, i watemi wo wawalongoza wanhu wako, lono wekalaga mu yisi yo moso, kanyhi ngazi, yono wawapela. Ninga wene wakalema kukupitucila no kukutyatya.

³⁶ Nalu ceza cili wawanda mu yisi yono wacipela, yisi yo moso, yono yikucipela ne zindigwa.

³⁷ Na ku soko yo wubi wetu, holeka vyose vyono yisi yikulela, vibitaga kuli watemi wono wacipela. Nawo wakucitema, kanyhi wakucinozeza nha vyono wakusaka weneco, hamonga ne mitugo zetu. Holeka cili mu wugaye wuwaha muno muno!”

Wanhu wakwilumbaniza

³⁸ Ku soko ya zizi zose zono zakodya kucijelela, nase co wanhu wa Isilayeli, cikuwika cilagane zuwali cono cikamile, cono cokwandikwa, kanyhi cowicilwa ne vitanjilo vye walongola wetu, ne Walawi, hamonga ne wakohani.