Nehemiya 5 - Luganuzi Luswanu Kuli Wanhu Wose 2002

Wiciwa wakwiwonelwa

¹ Vikapuluta vilo vicefu wanji wa muli wanhu we cilume na we cicekulu wakanza kuwang'ung'ulicila wandugu zawo Wayahudi.

² Wanji wakatya, “Ase cina mhuga mbaha, holeka cikulomba, cituje wutazi wa ndigwa zo kulya, sese ne wana wetu ho cikale womi.”

³ Wanji nawo wakatya, “Ase, cikupinjika ne migunda yetu ye mizabibu, hamonga ne viwanza, ne zinyumba zetu cituje ndigwa yo kulya mu nzala yiyi.”

⁴ Hamba nhavivyo, wanji nawo wakatya, “Nase, yali yicinojeye cikope pesa, ho cilipe kodi yo mutemi, mu nzila yo kupinjika migunda yetu, ne mizabibu yetu.

⁵ Ase, nha cili nghungugo monga ne wandugu zetu Wayahudi. Ne wana wetu, wehwanile ne wana wawo. Alu ceza kuwawika i wana wetu mu wuwanda, na wanji wa muli wahinza wetu waguzwa, nawo waza wawanda. Alu nhondo, zeza cisina wutazi wo wose, vyono migunda yetu, hamonga ne mizabibu, vyasolwa na wanji.”

⁶ Nane nali neza kuhulika zo wung'ung'ulice wawo wuwo, mbeka nghakalala muno muno.

⁷ Hobaho nghawa kuwacema i walongola, hamonga ne wawaha wose, nghawa kuwalonjela nghawatya, “Anye, mbeka mukuwewonela wandugu zenyu!” Hobaho nghawa kuwakongholela hamonga wanhu wose, ho wayilanje nghani yiyi.

⁸ Nghawatya, “Alu 'se, mu nghango yetu, cakondya kuwakomboza wandugu zetu Wayahudi, wono wali weguzize weneco kuli wanhu we zinghungugo zinji. Alu kanyhi mweza kuwadindimiza wandugu zenyu nyo weneco, weguze kuli'nye nyo Wayahudi wayawo hongo!” Walongola wose wali wanyamaye twii, wasina hamba yo kulonga.

⁹ Na kanyhi nghawatya, “Azi zono mukwituma, si swanu yaye! Yinojeye muwe ne cogopo hali Mulungu, no kwituma ze ling'ani. Na mu nzila yiyo, ho simosuma kuwapela walugu wetu wono si Wayahudi, soko yo yose yo kucisekanga.

¹⁰ Ane nowakopesha wanhu pesa ne zindigwa, ho wawe wali hamonga nane, hamonga ne wanhu wono wakuyitumamila. Alu, hodu ciwalekaje, cilece kuwadaya co cose kanyhi.

¹¹ Hamba mulece kuwadaya migawa yo yose yono mukuwadaya, hono ziwe pesa hamba ndigwa, hamba divayi, hamba mafuta. Kanyhi, muwagomolelaje mbela ne migunda yawo, hamonga ne mizabibu yawo, ne zi nyuma zawo, ne mizeyituni yawo.”

¹² I walongola nawo wakapitula wakatya, “Cokwituma nha vyono wucilonjeye. Cowagomolela zi sawo zawo, kanyhi sicowadaya ne migawa yaye.” Nghawacema wakohani, no kuwasaka walongola wose, welahize ha mwande yawo, vyono mbeka siwoyidaya migawa yiyo yaye. Kanyhi na vyono wokamisa wilahize wawo wono welahize.

¹³ Hobaho, nghawuwopola musipi wono nali niwopile mu ciwino nghawukung'unha nghatya, “Mulungu komukung'unha nhavivi muli nyenye, u munhu mono kobena cilagane cici.” Kanyhi nghatya, “Mulungu komuwusizenyi lukulu zikaya, na vyose vyono mwina navyo; no kumulecenyi muli bwete.” Na wose wono wali wali baho, wakavumila wakatya, “Heya!” Wakamukumya Muwaha Mulungu. Ne walongola wose waketuma nha vyono wehuwiza.

Metumo maswanu ga Nehemiya kuli wanhu

¹⁴ Ale, mu myaka yikumi na myejete, yono nali mulongola wa mwi'tumbi lya Yuda. Ne vipango vyo mutemi Alitashasita, ku wulawa mu mwaka we makumi mejete sunga yakafisa myaka makumi madatu na myejete mu wuteme wakwe, ane hamonga ne wandugu zangu, sicalya ndigwa yono yali yinojeye nilye nha mulongola.

¹⁵ Hambi mulongola wo wose, muli wono wanongolela 'ne mu wulongola nha wali muzigo muzito kuli wazenji wawo. Hambi 'nha wadayaga fweza makumi mane, kwe 'zuwa limonga so zindigwa na divayi. Sunga ne wetumami wawo nawo, wawewonelaga muno muno wanhu. Ninga ane, sinetuma nha vyono wene. Hambi ane nha nali nimogopile Mulungu.

¹⁶ Nane nghahidimbala muno mu wuzenga lijinji, hamba si nadaya cinji. No munhu wo wose, mono yanyitumamilaga, nayo yaketajila na mu luzengo.

¹⁷ Kenji na kenji, nghawalisa ha meza yangu Wayahudi yigana limonga na makumi mahano, hamonga ne walongola wawo, hamonga na we zinghungugo zinji, wono wanyizizanga, wono cekalanaga behi nawo.

¹⁸ Na mwi'zuwa limonga, netumamlaga nghongolo monga na ngholo mutandatu zono zijinile, hamonga na nghuku nyinji du. Kanyhi lwa kamonga mu vilo yikumi, nghawa kuwapela divayi nyinji mhya, ne mihilimo minji ye zindigwa. Ninga hamba nhavivyo, nghamanya vyono wanhu wadinghuye mutegulo muzito. Holeka nane si nadaya yaye ne lifungu lyono lyali linojeye mulongola yapegwe, nha vyono lyali liwajigwe.

¹⁹ Holeka, nghukulomba, Gwe go Mulungu, wunghumbucilaje muli ziswanu zose zono nawatendela wanhu wawa.