Mwamulizo 2 - Luganuzi Luswanu Kuli Wanhu Wose 2002

¹ Ale, u wulanga ne yinze, hamonga ne vinhu vyose vyono vili mumo, vikawa vyakondya.

² Lyeza kufika ilizuwa lyo mupunghati, u Mulungu nayo, yakawa yayikondya i milimo yono yetumaga, na mwi'zuwa lilyo lyo mupunghati, yakawa kuceha.

³ Lizuwa lilyo lyo mupunghati, Mulungu yakalilugutiza no kulisiwanula, vyono lyo lizuwa lyono mwene yacehela mu wulawa mu milimo yakwe yose yo kuwumba.

⁴ Na vyo yinha, u wulanga ne yinze vyo vyawumbwa. Na mwi'zuwa lono u Mulungu yawumbila u wulanga ne yinze,

U mugunda wa Adeni

⁵ i yinze yali yisina vilimwa vyo vyose, hamba mibici yali yikali sinacindika, hambi Mulungu, u Muwaha Mulungu, nha yali yakali sinatonyeza mvula mu yinze, hamba munhu wo kuyilima, hali hakali hasina.

⁶ Hamba nhavivyo, imalenga gakalawa hasi nha mivwilo no kuwuloweka muhangha wose.

⁷ Baho u Mulungu, yakasola lilongo, yakamuwumba munhu, yakawa kumuputila u muhe wo wumi mu mhula, nayo munhu yuyo yakawa ciwumbwa cumi.

⁸ Hanyuma u Mulungu, yakahadika mugunda kuko ku Adeni, ku lubavu lwa kucilima, yakawa kumuwika mumo mu mugunda u munhu yuyo mono yamuwumba.

⁹ Mulungu yakacindya mu yisi yose, i mawala gose ge mibici miswanu, yono yikulela mikalo yono yikwiliye so ndigwa ye wanhu. Ninga haciligati yo mugunda wuwo, hali howuli u mubici wo wumi, kanyhi no mubici wo kumanyila i ziswanu ne zimbi.

¹⁰ Baho ha Adeni, hali holili likolongo lyono lyahulumaga no kuwumwajila malenga u mugunda wuwo, na kanyhi ku wulawa mu Adeni, likolongo lilyo likegawa likawa makolongo mane.

¹¹ Likolongo lilongozi, likucemwa Pishoni, ne likolongo lilyo liyipilime yisi yose ya Havila, kuko kono zijelaga zizahabu.

¹² Ne zahabu ye yisi yiyo, yo zahabu yono swanu muno. Na kuko, kanyhi ko gakuwa kwijela ne mafuta ge mhunjile swanu, gono gakuwa kucemwa bedola, sunga ne mabwe maswanu go wuguzi wukamu muno.

¹³ Likolongo lye kejete likucemwa Gihoni, ne likolongo lilyo liyipilime yisi yose ya Kushi.

¹⁴ Ne likolongo lye kadatu likucemwa Tigilisi, nalyo likalaga likuhuluma ku lubavu lwa kucilima ye yisi ya Ashuli, ne likolongo lye kane, likucemwa Fulata.

¹⁵ Hodu, u Mulungu yakamusola u munhu yuyo we cilume, yakamuwika mumo mu mugunda wa Adeni, ho yawulime no kuwulanjilila.

¹⁶ Mulungu, u Muwaha Mulungu, yakamulajiliza u munhu yuyo mulume, yakatya, “I mana ge mibici yose yono yili mu mugunda, kosuma kulya,

¹⁷ langa i mana go mubici wo kuzimanyila i ziswanu ne zimbi, wulece kulya hamba hadodo, wumanye vyono, ilizuwa lyono wulalila i mana gayo, hodu kolofwa.”

¹⁸ Hanyuma u Mulungu yakatya, “Si viswanu munhu yuyu we cilume yawe yali wene du! Ciba nimunozeze muyagwe, u mutazi mono komukwila.”

¹⁹ Holeka mu wulawa mwi'longo, u Muwaha Mulungu yaviwumba i vilimu vyose, hamonga ne zindeje zose zono zikwanga mucanyha, hanyuma yakawa kuvileta vyose kuli mulume yuyo, ho yawone kovicemela matagwaci, ne matagwa gono yavicemela viwumbwa vivyo, gago go gakawa i matagwa gavyo du.

²⁰ Ale, u mulume yayo yakawa kuvicemela matagwa i vilimu vyose vyono vifugwaga, ne vilimu vya mu mbago, sunga ne zindeje zose. Ninga hamba nhavivyo, siyejela yunji mono yakawa mutazi mono yamukwiliye.

²¹ Holeka u Muwaha Mulungu yakawa kumupela u mulume yuyo nhongo nyinji muno muno. Yakawa kugona nhongo nzito. Na lono yali yali mu nhongo, u Mulungu yakamusopola u mulume yuyo lubavu lwakwe lumonga, ne hanhu hayo, yakawa kuhagubika ne nyama.

²² Nayo u Muwaha Mulungu, yakalusola lubavu lulo, lono yalusopola ko mulume, yakamunoza mucekulu, hanyuma, yakawa kumuleta kuli mulume yuyo.

²³ Nayo mulume yuyo yakatya, “Hee, alu langa! Ayu, lye fupa lya mu mafupa gangu, kanyhi wo muwili wono wulawile mu muwili wangu, holeka ayu kocemwa, ‘Mucekulu,’ ku soko vyono kasolwa muli mulume.”

²⁴ Na ayi yo soko yono yikuleka, u mulume yawalece u sogwe no nyina, no kwilunza no mugolece wakwe, nawo wakuwa muwili wumonga.

²⁵ Nawo wose, vyono wejete u mulume no mugolece wakwe, wali wali cipwi, ninga hamba siwawonaga cevu yaye.