I Cililo 3 - Luganuzi Luswanu Kuli Wanhu Wose 2002

Wulipicizwe no Wunene no Witumbilo

¹ Ane yo nene mono newonelela no mweneco, u wulipicizwe wo Mulungu vyono winha.

² Yanyinjiza mu wutitu muno muno.

³ Yanhowanga kali kenji muno ko wukali.

⁴ Yandeka muwili wangu wugandile kanyhi wutimbile, yagabenanga ne mafupa gangu.

⁵ Yandindila mu jela yo wukalale ne cevu.

⁶ Yambika nikale mu wutitu we lifwa wono wikalaga.

⁷ Yambopa ne manyolo, nalu nawa nili muwopwe sina hamba witumbilo wo kupona yaye.

⁸ Nane nghulilila wutazi, ninga Mulungu si yakusaka kuhuliciza ng'o.

⁹ Nane nghupebesuka-pebesuka lono nghujenda, hambi majinji ge mabwe, nha ganhejeye mu zinzila zose kose kono nghubita.

¹⁰ Yanhejela nha dubu, kanzumhila kotya simba.

¹¹ Kanghundujiziza ha mhelo ye nzila, kanhemasha nha nili nyama, kawa kundeka baho.

¹² Kawutawika wupinde wakwe, kanoza ane yo niwe munhu wo kulungwa ne zisonga zakwe.

¹³ Kanguma, ne zisonga zakwe zinjila mu muwili wangu.

¹⁴ Ne wanhu wakusekanga misi yose, nawa nili munhu wo kuzwajizwa kuli wene wose.

¹⁵ Nayo kamhela magayo mawaha, yiwe yo ndigwa yangu, ne malenga go kung'wa.

¹⁶ Kanghuluza wusu wangu hasi, kagabena ne meno gangu mu masakalawe.

¹⁷ Nane lu nakondya no kuvisemwa na vyono vinha, u wumoteswe, no mulamu, hamonga no wusangalale.

¹⁸ No wikala nili mumi, weza wudodo. No witumbilo wangu wa kuli Muwaha Mulungu, wawuka.

¹⁹ Na kolo nghwihwesa zo wusungu wangu, na vyono kanyhi neza sina kaya, yikuwa nha sumu nghali kuli'ne.

²⁰ Nane nikalaga nghuzihweza zizo, ne nhumbula yangu yina wukalale wuwaha.

²¹ Ninga kanyhi witumbilo wangu wukuza, kolo nghuzikumbucila zinghani azino zono zikutya,

²² U lusungu no wendo wo Muwaha Mulungu, si vidumaga yaye.

²³ Vikalaga vyo vipya du nhondo zose, nha vyono yinha hakali mitondo lono lizuwa likusosomoka, wihuwilwa wakwe wo wuwaha muno muno.

²⁴ Holeka ane, Muwaha Mulungu lyo lifungu lyangu. Nane nimwitumbiye mweneco du.

²⁵ U Muwaha Mulungu, muswanu kuli wose wono wakumwitumbila.

²⁶ Holeka yowa nghani swanu kuli'se cimulindile ko wukangalizi, yaciponye.

²⁷ Kanyhi yicinojeye ciyijize wukangalizi wuwu lono cikali wadodo.

²⁸ Na lono cenjila mu magayo, yicinojeye cikale cibembo cili wene, ciwe cinyamaye ko wukangalile.

²⁹ Yicinojeye ciyilavye mu nzila yo kumwinamila, hambi nha ko kowuli witumbilo kuli mwene.

³⁰ Hamba hono citowe, hamba kutovulwa, yicinojeye ciwe kuzibocela zose du.

³¹ Hambi Muwaha Mulungu wetu, nha yali lusungu, hamba si kocileka cibitilila.

³² Hanji yadahile kuciletela wukalale, ninga wendo wakwe kuli'se wo we mbeka, kanyhi wuli vilungo.

³³ Kanyhi mwene, si kendezwaga yaye yaciletele wukalale no wusungu.

³⁴ Nayo Muwaha Mulungu, yamanyile lono zinhumbula zetu ziwopigwe mu jela, zikupondangwa.

³⁵ Kanyhi yamanyile na lono cikuzilema ze ling'ani zono yacipela.

³⁶ Ne ling'ani lono si yikwitumwa mu mahakama, mwene yamanyile du.

³⁷ U wuhile wo Muwaha Mulungu du, wo wunojeye wuwe kwitumwa nhondo zose.

³⁸ I ziswanu ne zimbi, zose zili mu wulajilize wakwe.

³⁹ Alu mwene nhawule cendile kung'ung'ulika, lono cikulipicizwa ku soko yo wubi wetu?

⁴⁰ Ninga aluno, yicinojeye ciyihenje mu mikalile yetu, cimuwuyile Muwaha Mulungu wetu.

⁴¹ Cimwinulile Mulungu zinhumbula zetu ku wulanga, cimulombe.

⁴² “Ase mbeka cetuma wubi no kukuleka, ninga nagwe go Muwaha Mulungu, hamba si wacinenela.

⁴³ “Wacityatya wukaciwulaga, hambi lusungu lwako nha lwali lwihundice mwi'kuwo lyako.

⁴⁴ No wulombe wetu hamba si wakuficila yaye ku soko ye livunde lizito lyono walicita.

⁴⁵ Wacinoza ciwe cili manghundi, mono yinze.

⁴⁶ “Nalu cikutovulwa no kuzwajizwa ne walugu wetu wose.

⁴⁷ Ceza cili mu magayo hamonga no wongomele, cikaye mu zi mbali no woga.

⁴⁸ Ne meso gangu, gakuhuluma makolongo ge mahozi, ku soko yo wongomele we wanhu wangu.

⁴⁹ “Ne mahozi gangu, gojendelela du kuhuluma nhe cikolongo.

⁵⁰ Sunga lono Muwaha Mulungu, kolo yakulanga hasi ku wulawa ku wulanga yaciwone.

⁵¹ Ne nhumbula yangu, yikalaye muno, lono nghuziwona zono zawejelela wacekulu wa mwi'kaya.

⁵² “Walugu wangu wakangwiza mu mutego mbula soko yo kusulila.

⁵³ Wakangumila mwi'kombo vyo nili mumi, hanyuma wakawa kubidusiza libwe, no kuwudinda mulango we likombo.

⁵⁴ Ne malenga gakawa kwanza kuhulumila mumo mwi'kombo, nghawona vyono lifwa lyasejelela.

⁵⁵ “Nane nghakulilila go Muwaha Mulungu lono nili mumo mwi'kombo.

⁵⁶ Nane nali neza kukulomba wuhulice cililo cangu, nagwe wukahulika.

⁵⁷ Wukamhitula, wukanonjela vyono wulece kogopa.

⁵⁸ “Wukaza wukamhonya 'gwe go Muwaha Mulungu wangu, wukawuponya wumi wangu.

⁵⁹ Holeka wuning'anize nghani yangu, hambi nha wuzimanyile zimbi zono zetumwa kuli'ne.

⁶⁰ Hambi agwe nha wumanyile, vyono walugu wangu wasulile, na vyono wakwihehemeza ku soko yangu.

⁶¹ “Hambi nha kuwahulikaga vyono wakunhovula 'gwe go Muwaha Mulungu, kanyhi wumanyile no wihehemeze wawo wose.

⁶² Misi yose walongaga zangu du, no kwilumbaniza zo wuhile wawo wubi kuli'ne.

⁶³ Na ku wulawilila hakali mitondo sunga lyoswa, wekalaga wakusekanga du.

⁶⁴ “Gwe Muwaha Mulungu, wuwalipicize mu nghango ye metumo gawo.

⁶⁵ Wuwalijite, kanyhi wuwapele no wukamu we zinhumbula.

⁶⁶ Wuwapelembe, wuwapatile lukulu mono yinze!”