Hoseya 8 - Luganuzi Luswanu Kuli Wanhu Wose 2002

Mulungu yakuwalemeza Waisilayeli walece kuhemba vihwani

¹ Muwaha Mulungu yakutya, “Towe ndulele lizi lye citanjilo! Hambi walugu nha wakuzumha hasi, nha numba, mu'si yangu! Wanhu wangu wabena icilagane cono nalagana nawo, wabedegala no wulajilize wangu.

² Hamba wawe wakunyhema no kunyitya ane nili Mulungu wawo, no kwiyitya wene wanhu wangu, na vyono wamanyile 'ne,

³ ninga wazilema ziswanu. Na ku soko ya zizo, i walugu wawo wowatyatilila.

⁴ “Wanhu wangu wakwihagulila watemi, ninga wakwituma zizi wali wene. Wakwiwicila wawaha hamba kwilumbaniza nane ng'o, wakusola fweza zawo na zahabu, wawa kunoza vihwani so wongomele wawo weneco.

⁵ Ane si nghucisacila lukulu cihwani ce ndama ye zahabu, yono wakuhemba wanhu we likaya lya Samaliya. Ngholigwe ne likuwo muno muno ku soko yawo. Alu mwene wojendelela sunga nili ho waze walece wuhemba vihwani vyawo?

⁶ No munhu munghula mu Waisilayeli, yo munoza cihwani. Ninga yiyo ndama ye zahabu, yono wakuyihemba kuko ku Samaliya, yolobenanjizwa-benanjizwa tici-tici.

⁷ Ku soko vyono wakuhadika mbeho, holeka wolodudula mukukunzo! Migunda yo wuhemba siyolopisa hamba siyolosuma kulavya ndudula yo yose. Na hamba yize yilavye, iwajenzi wo woloyilya wayimale.

⁸ Waisilayeli weza wenha makungugo ganji, wono si wakwiliye cinji, weza wenha ciya cono cisakaye.

⁹ Wena nhumbula nghamu nha ye nyhenje. Waisilayeli wakujendela mu zinzila zawo weneco. Wakondya kubita kulondola wutazi kuli Wasiliya, no kugalipa i makungugo ganji ho gawadime kuli walugu.

¹⁰ Holeka luno ane nowakonghola hamonga, ho niwalipicize. Nawo wokwinyongola ko wusungu musunho, lono mutemi wa Siliya yakuwatendela ko wukali.

¹¹ “Na mu nghango yono Waisilayeli wasuma kuzenga vikumbicilo vinji muno, yo nghango yiyo du kanyhi, yo wakacila kuhonjeleza i hanhu ho kwitumila zo wubi!

¹² Hambi ane nha nawandicila wanhu mafundo gangu menji sigakuwala, ninga wene wakagalema no kugawona nha cinhu cipya, kanyhi cijenzi.

¹³ Wakundavivya makumbiko ge zinyama, no kulya weneco kanyhi zinyama zizo ze makumbiko. Ninga ane no Muwaha Mulungu singhwendezwa nawo. Naluno nowukumbucila wubi wawo, no kuwalipiciziza mu wubi wawo, nowagomola kanyhi sunga ko ku Misili!

¹⁴ I Waisilayeli, wazenga makaya go wutemi, ninga wamusemwa u Muwumbi wawo. Nawo wanhu wa Yuda, wazenga makaya gono gena magomawakali. Ninga nane notegula moto wono woganyanya no kugagwisa hasi makaya go wutemi hamonga ne makaya gawo.”