Hoseya 4 - Luganuzi Luswanu Kuli Wanhu Wose 2002

Muwaha Mulungu yakuwahosa Waisilayeli

¹ Muwaha Mulungu, yena nghani yo kuwahosa wanhu wono wekaye mu'si ayi. Muhulicize, Isilayeli, muli zizo zono yakulonga, “Kweza kusina wihuwilwa hamba lusungu mu'si, ne wanhu hamba si wakumanya 'ne vyono nili Mulungu.

² Wakunoza cilagane no kucibena, kanyhi wakulamba, no kuwulaga, wakuhiza no kwituma zo wusenyha. Wubena wulajilize, nawo wukonjezeka, na ko wuli wuwulaji ako na ako.

³ Holeka yisi yonyala, sunga ne vinhu vyose vyono vicindice mumo, vyonyala. Ne vilimu vyose vya mu mbago, hamonga ne zindeje, sunga ne zisomba zose, vyose vyofwa.”

Muwaha Mulungu yakuwahosa wakohani

⁴ Muwaha Mulungu yakutya, “Yunji yalece kuwahosa i wanhu hamba kuwatacila. Hambi wung'ung'ulice wangu nha wuli kuli'nye nyo wakohani.

⁵ Vyono cilo na misi, anye mwikalaga mukuhodanga du, sunga ne wawizi nawo si wakwituma ziswanu. Nane nomongomeza u nyina yako, 'gwe, Isilayeli.

⁶ Wanhu wangu wongomezwa ku soko vyono si wamanyile'ne. Nanye mo wakohani si mukusaka mumanye 'ne, kanyhi mukagalema ne mafundo gangu. Holeka nane nghumulemenyi nanye, hamba si nowavumila ne wana wenyu wawe wakohani wangu.

⁷ Na mu nghango yono mukucila kuwa wenji, yo nghango yiyo du kanyhi, yono ucila kusutizya 'ne. Holeka nane nolipitula lilumbo lyenyu liwe cevu.

⁸ Hambi nha mukugolipila mu wubi we wanhu wangu. Na ku soko yiyo holeka mukuwona viswanu wene wajendelele kwituma zo wubi.

⁹ Ninga mulanjilile! Nanye motuga wulipicizwe wuwo du wono wanhu wolipicizizwa. Nomulipicizenyi ho mulipe mabi gose gono mukwituma.

¹⁰ Molya lifungu lyenyu lye vilavywa, ninga hamba simokwiguta ng'o. Nanye mohemba milungu yono yina lulelo, ninga hamba simotuga wana ng'o. Ku soko vyono mwakondya kundeka 'ne, no kuyihemba milungu yinji.”

Muwaha Mulungu yakuwulemeza wuhembi we vihwani

¹¹ Muwaha Mulungu yakutya, “Divayi yose, mhya ne huma, yikuhodanga mahala ge wanhu wangu!

¹² Wakulomba wugubulilwe ku wulawa mu cihwani ce libici! Ne nghome yawo yo wuganga, yo yikuwalonjela zono wakuhila wene kuzimanya! Mbeka, wakondya kundeka 'ne. Wakondya kwiyilavya kuli milungu yinji, kotya mucekulu malaya.

¹³ Wakulavya makumbiko, mucanyha ye vizuli vye matunda, kanyhi wakufusa no wuvumba mucanyha ye matunda na ha masina ge mibici mitali. Vyono mibeho yayo yikwendeza muno! Ku soko yiyo, holeka wana wenyu we cicekulu, wekaye nha malaya, ne wakwe zenyu we cicekulu nawo wakusenyha.

¹⁴ Hamba nhavivyo, nane si nowongomeza i wana wenyu we cicekulu so zizo ng'o, hamba i wakwe zenyu we cicekulu, hambi nha nyenye nyo weneco mono mukujendana hamonga ne wasenyha, no kuhanga hamonga mu wulavizya vihwani makumbiko. Nha vyono mbazi yikutya, ‘Wanhu wakongomela ku soko yo wu wula kumanya kwawo.’

¹⁵ Ale, sunga na nyenye nyo Waisilayeli, si muli wehuwilwa kuli'ne, ninga wanhu wa Yuda walece kunoza nhavivi. Mulece kuhemba ku Giligali hamba Betaveni, hamba kwihuwiziza kuko mwi'tagwa lyo Mulungu mumi.

¹⁶ Wanhu wa Isilayeli wakamu, wehwanile nyumbu. Alu, nane ho nowadima nhawule nha ngholo, mwi'lolo?

¹⁷ I wanhu wa Efulayimu, wasumigwe ne vihwani. Holeka lece vyajililane kuko.

¹⁸ Kolo wakung'wa divayi nyinji, wakwendezwa no wusenyha wawo, nawo wendile cevu si nhe lilumbo.

¹⁹ Wolosolwa nha wakukwenghwelezwa ne mbeho, nawo wolokozwa cevu ku soko ye makumbiko gawo ge vihwani.”