Danyeli 5 - Luganuzi Luswanu Kuli Wanhu Wose 2002

Sikukuu ya Belishaza

¹ Mwi'zuwa linji cinyamihe, Mutemi Belishaza yakawalalika wanhu we mahala elufu monga, wabite walye sikukuu mbaha, no kung'wa divayi hamonga nayo.

² Na lono wajendelelaga kung'wa, Belishaza yakalajiliza viletwe vikombe vya zahabu, na vye fweza, hamonga ne zibakuli, vyono u sogwe Nebukadineza yavisola wulawa mu Nyumba yo Mulungu ku Yelusalemi. Mutemi Belishaza, yakavisaka ho vize waving'wele divayi, mwene ne wawaha wose ne wagolece zakwe, hamonga ne wajitulwa wakwe.

³ Lulo lulo vikombe ne zibakuli vikaletwa, nawo wakanza kuving'wela,

⁴ akuno wakuyilumba milungu yono yali minozwe ne zahabu, ne fweza, ne shaba, ne cuma, ne mabici ne mabwe.

⁵ Lo lulo lulo muwoko wa munhu wukejela, wukanza kwandika mwi'jinji lye likaya lyo wutemi lyono lihiliwe swakala, hanhu hono zitala zamulikaga viswanu. Nayo mutemi yakawuwona muwoko wuwo lono wandikaga.

⁶ Hobaho wusu wakwe wukasininghala so woga, ne mafugamilo gakwe gakanza kucicima.

⁷ U mutemi Belishaza yakacemeleza kwe yizi yiwaha, waletwe, waganga ne walotezi, na we mahala go wizuce we zinyelezi ne watowa visangu. Nawo wali weza kuwa waletwa, mutemi yakawalonjela yakawatya, “Munhu wo wose, mono kosuma kusoma mandiko aga, no kunonjela nhunizo yayo, yuyo nomuvwika myenda ye citemi-temi, hamonga ne kanzo yo lugandu, no luvumbe lwe zahabu lwe lilumbo mu singo yakwe. Nayo kowa munhu we kadatu wa muli wono wena wulajilize mu wutemi wangu.”

⁸ Baho wanhu we mahala wa mwi'kulu wo walongola, ninga hasina hamba yumonga muli wene, mono yasuma kugasoma mandiko gago, hamba kuyilolosa nhunizo yayo.

⁹ Na ku soko yiyo, Mutemi Belishaza, yakasininghala muno muno, na we mahala wakwe wakawula yo yose yo kunoza.

¹⁰ U nyina yo mugolece wo mutemi, yakahulika zinghani zono mutemi yalongaga hamonga na we mahala wakwe. Hodu yakawa kwinjila mwi'kumbo lyo wulilo we sikukuu. Yakatya, “Gwe mutemi, wuteme cibitilila! Kanyhi nghukulomba wulece kugazika no kusininghala muno.

¹¹ Hambi mu wutemi wako, nha mo yuli munhu yunji, mono yali hamonga ne myuhe ye milungu yono yelile. Lono u sogo mutemi Nebukadineza yali yatemile, munhu yuyo yalajila yihala yiswanu lyo wutanje, no wizuce ne mahweso, nha vyono milungu yikuwa kulajilwa. Lulo mutemi Nebukadineza u sogo, yakamunoza yawe yo muwaha we watowa visangu wose, ne wahawi, hamonga ne walotezi, na we mahala go wizuce we zinyelezi.

¹² Mbeka yena wizuce no wumanye mu wulolosa zinhunizo ze zindoto, no kuzilolosa zinghani ze mafumbo, hamonga ne zinghani zose zono hundikwe. Holeka wutume yunji yakamulete Danyeli mono mutemi yamupela litagwa lya Beliteshaza, nayo kosuma kukulonjela nhunizo ya zizo zose.”

Danyeli yakugalolosa mandiko

¹³ Lo lulo lulo Danyeli yakaletwa ha mwande yo Mutemi, nayo mutemi yakamutya, “Yo gwegwe Danyeli, ayulya Muyahudi muhamywa, mono waletwa na baba ku wulawilila ku yisi ya Yuda lono baba yali mutemi?

¹⁴ Nahulika vyono muhe we milungu yono yelile yili muli'gwe. Na vyono agwe wina wumanye no wizuce ne mahala.

¹⁵ We mahala ne wahawi wose wacemwa, ho wasome mandiko agano no kundoloseza nhunizo yayo, ninga hamba si wasuma kuyimanya nhunizo yayo.

¹⁶ Alu nahulika vyono agwe wukusuma kuzimanya zinghani zono hundikwe, sunga no kuzilolosa zifumbo. Alu, hono wusome mandiko aga, no kundoloseza nhunizo yayo, kovwalizwa myenda ye citemi-temi yono miswanu, ne kanzo ye liwala lyo lugandu, kanyhi kovwalizwa no luvumbe lwe lilumbo mu singo yako. Nagwe kowa yo we kadatu muli wono wena wulajilize mu wutemi.”

¹⁷ Danyeli yakapitula yakatya, “Gwe mutemi, vipegwa vyako wikalaje navyo du, hamba lunji wumupelaje munhu wo wose. Ninga ane, nokusomela bwete du mandiko gaga, no kukuloloseza ze nhunizo yayo, gwe go mutemi.

¹⁸ U Mulungu Mono Yalawiliciye, yo yamunoza sogo Nebukadineza yawe mutemi muwaha. Yakamupela ne nhojo ne lilumbo.

¹⁹ Nayo yali mogopwe ne wanhu wose we makungugo ne zimbeyu na we milonjele yose, wamogopaga muno muno no kucicima. Lono yasakaga kumuwulaga yunji, yamuwulagaga du. Na lono yasakaga kumuwopolela yunji yekale mumi, yamuwopolelaga du. Yawapelaga lilumbo wono yasakaga, na wono yasakaga kuwanyetye, yawanyetyaga.

²⁰ Ninga 'lu, vyono yalajila wivuni no wukali, hamonga no wu wula cihuliko, hodu yakawa kuwuswa mu wutemi, no kuwajiliza mukumbo wakwe wo wutemi, yakalyajiliza ne lilumbo lyakwe.

²¹ Yakawinjilizwa, no kuwuswa mu wikalana ne wanhu, ne mahweso gakwe gakehwana na ge malimu. Yakawa kwikalana ne zinyhenje, yakalya mahanze nhe zing'ombe, yakawa yakugona cipwi mwi'wagalila lya mwi'lolo, yasina na co kumugubika muwili wakwe, ho yalece kudodowekwa ne buhe. Sunga nhondo, yakamanya vyono mbeka u Mulungu Mono Yalawiliciye, yo yatemile wutemi wose mu wanhu, kanyhi yadahile kumupela wutemi munhu wo wose mono mwene yakumuhagula.

²² “Ninga lu, agwe nagwe go mwanagwe, hamba si wukwinyetya go mweneco, na kumbe nagwe ho wuzimanyile zizi zose.

²³ Nagwe wetuma zono si zikumwendeza Muwaha Mulungu wa ku wulanga, hambi nha kuvisola vikombe hamonga ne zibakuli, vyono sogo yavisola mu Nyumba yo Mulungu. Hanyuma gwegwe ne wawaha, ne wagolece zako, hamonga ne wajitulwa wako, muwa kuvitumamila so wung'wela divayi, akuno mukuyikumya milungu yono minozwe ne zahabu, ne fweza, ne shaba hamonga ne cuma ne mabici ne mabwe, milungu yono siyihulikaga hamba kuwona yaye, yono siyimanyile hamba cinji co cose. Hamba si wusacile kumupela lilumbo ne cogopo u Mulungu mono yena no muhe wako mu mawoko gakwe, na mono kakulongozaga muli zose zono wukwituma.

²⁴ Ku soko yiyo, holeka Mulungu kawutuma muwoko ho wandice zinghani zizino.

²⁵ “Ne zinghani zono zali zandicigwe zali zo zino: MENE, MENE, TEKELI, PELESI.

²⁶ Ne nhunizo yayo yoyi, MENE, wo wutya, Mulungu kaviwala vilo vyo wutemi wako, kakondya kuvidumya.

²⁷ TEKELI, wo wutya, wakondya kupimwa mu muzani, nagwe wejela vyono wacepuka muno.

²⁸ PELESI, wo wutya, wutemi wako wagawanulwa wapegwa Wamedi ne Wapelisiya.”

²⁹ Lo lulo lulo Belishaza yakalajiliza wetumami wakwe, wamuvwalize Danyeli, kanzo ye citemi-temi ye liwala lyo lugandu, no kumuvwaliza mu singo luvumbe lwa zahabu lwe lilumbo. Yakamunoza yawe munhu we kadatu muli wono wena wulajilize wa mu wutemi wuwo.

³⁰ Na mu cilo cico, Belishaza mutemi we Wababiloni yakawulagwa.

³¹ Hobaho Daliyo u Mumedi yakawusola wutemi wuwo, nayo lizika lyakwe yali yaficile myaka makumi mutandatu na myejete.