Danyeli 4 - Luganuzi Luswanu Kuli Wanhu Wose 2002

Ndoto ye kejete ya Nebukadineza

¹ Mutemi Nebukadineza yakategula mulamu kuli wanhu we makungugo gose, na we zimbeyu zose, na we milonjele yose wa mu yinze yose, yakatya, “Mulamu weze kuli nyenye.

² Hulicizenyi zinghani ze vitanjilo, ne mezino, zono u Mulungu mumi yandajiye.

³ Vitanjilo vyakwe nha viwaha, vyono Mulungu mumi yakucilajila! Ne mezino ge vilungo nha mawaha gono yakwituma. Mulungu yo Mutemi cibitilila, kanyhi yo kolotema mu zindelo zose.”

⁴ Nene, Mutemi Nebukadineza nali nyhehile mu kaya yangu, nhulile mwi'kulu lyangu.

⁵ Na lono nali ngonile, nghalota ndoto, na mumo mu ndoto yangu, nghawona wugubulilwe wo kogofya muno.

⁶ Nghawa kuwalajiliza we mahala wose wa mu Babiloni, waze ho wandoloseze ze nhunizo ye ndoto yiyo.

⁷ Ale, i watowa visangu, ne wahawi, na we mahala go wizuce we zinyelezi, wakaletwa hali 'ne. Nane nghawaloloseza ze ndoto yangu, ninga hamba siwasuma kuyilolosa nhunizo yayo yaye.

⁸ Lulo lulo Danyeli yakawa kuza, (mono yakucemwa Beliteshaza, litagwa lyo mulungu wangu.) Kanyhi muli mwene wikaye muhe we milungu yono yelile. Nane hobaho nghamuloloseza ze ndoto yangu yono nghalota. Nghamutya,

⁹ “Gwe Beliteshaza go muwaha we watowa visangu, ane manyile vyono u muhe we milungu yono yelile yili muli 'gwe, na vyono kanyhi, wuzimanyile na zono zihundicigwe zose. Alu ayi yo ndoto yangu yono ndotile, nane nghusaka wunonjele nhunizo yayo.”

¹⁰ Nayo mutemi Nebukadineza yakamutya Beliteshaza, “Ane lono nali ngonile, natuga wugubulilwe, nghawona mubici mutali muno muno wono wali wuli haciligati ye yinze.

¹¹ Wukawahapa muno muno, wukapamiza sunga ko ku wulanga. Nawo wejelaga kuli wanhu wose wa mono yinze.

¹² Ne mahamha gayo, gali maswanu muno muno, nago gali gavunice mikalo, yono yali yikwiliye ku wulya wanhu wose we yinze. Vilimu vyose vya mu mbago, vikaceha mu mubeho wayo. Ne zindeje zikazenga manhuli gazo mu manhambi gayo, kanyhi ne viwumbwa vyose, vyalizaga mikalo yayo.

¹³ “Na lono nali nghali ngonile nghwihwesa zo wugubulilwe wuwu, nghamuwona malayika yakutima yakulawilila ku wulanga, mono yali yewikanize so suguzi.

¹⁴ Yakalonga kwe 'zi yiwaha yakutya, ‘Wudumulenyi mubici wuwu, mugapilulangaje ne manhambi gayo, muhepe ne mahamha gayo gose, muyiyagaze ne mikalo yayo; muviwinje ne vilimu viwuce mu mubeho wayo, hamonga ne zindeje zono zili mu manhambi gayo.

¹⁵ Langa mulilece lisina lyayo mu muhangha, liwe yiwopwe no munyolo wa cuma, ne shaba yeze yipilime munyolo. Mulilece baho mu mahanze madece ga mwi'lolo. Mumulekaje baho munhu yuyu yatuje malenga ge buhe ya ku wulanga. Mulece yekale hamonga ne malimu hamonga ne mahanze.

¹⁶ Na mu myaka mupunghati, nhumbula yakwe yikawanice, yilece kuwa nhumbula yo munhu, langa yapegwe nhumbula, ya nimu.

¹⁷ Awu wali wo wulamuzi wa Malayika yulya mono yali yewikanize so suguzi. Holeka 'lu, wanhu wose wamanye vyono, u Mulungu Mono Yalawiliciye, yo yatemile mu wutemi wose wa mu wanhu, nayo kamupelaga mono mweneco yendile kumupela. Kanyhi kawapelaga wutemi sunga na wono wasoceye.’ ”

¹⁸ Baho mutemi Nebukadineza yakamutya Beliteshaza, “Ayino yo ndoto yono ndotile. Holeka lu Beliteshaza, wundolosezaje nhunizo ye ndoto yiyi. Hambi nha hasina yunji wa muli we mahala wa mu wutemi wangu, mono yasumile kundoloseza. Ninga agwe, kosuma kundoloseza, vyono muhe we milungu yono yelile yili muli gwegwe.”

Danyeli yakuyilolosa nhunizo ye ndoto

¹⁹ Muli yiyo, Danyeli mono kanyhi yacemwaga Beliteshaza, yali yeza kuzihulika zizo, baho yakakangawala, yakanyamala cipango cidodo. Mutemi yakamulonjela yakamutya, “Beliteshaza, wulece kukangawala so ndoto yiyi hamonga ne nhunizo yayo.” Beliteshaza yakapitula yakamutya, “Gwe mutemi, ane nghwenda ndoto yiyi ne nhunizo yayo, yeze yili muli walugu wako yilece kuwa kuli'gwe.

²⁰ Holeka nhunizo ye ndoto yako yoyi, mubici wono wali mutali wupamize ku wulanga, wijeye kuli wose wa mu yinze yiyi.

²¹ Ne mahamha gayo, gali maswanu muno muno, kanyhi gali gena ne mikalo yono yali yikwiliye kuwalisa we yinze yose. Ne malimu ga mu mbago gakaceha mu mubeho wayo, ne zindeje nazo zikazenga manhuli gazo mu manhambi gayo.

²² “Gwe mutemi, agwe yo gwegwe wo mubici wuwo mutali muno, kanyhi wuli vilungo. No wuwaha wako wuwiluce sunga ko ku wulanga, ne vilungo vyako vitandaye sunga mu yinze yose.

²³ Na lono agwe mutemi, wali wulanjiliye, Malayika yakatima kulawa ku wulanga, na hanyuma yakatya, ‘Dumulenyi mubici wugwe, hanyuma muwupilulaje. Langa mulece lisina mu muhangha. Muliwopeceze no munyolo we cuma, ne shaba yeze yipilime munyolo, mulilece kuko kwi'lolo lyono lina mahanze madece; Mumulekaje baho munhu yuyu, yatuje malenga ge buhe ya ku wulanga; Mumulece yekale hamonga ne malimu myaka mupunghati.’

²⁴ “Ne nhunizo yayo yoyi, Agwe mutemi, azi zo yakukulajila Mulungu Mono Yalawiliciye zono zokwijelela gwegwe ku mwande.

²⁵ Kolowingwa mu wikalana ne wanhu wayago, kolokwikalana ne malimu. Nagwe kolowa kulya mahanze nhe zing'ombe, kanyhi kolowa kugona mwi'hala caka, kono wubuhe wono wukulawa ku wulanga, wowa kukugwila sunga yipulute myaka mupunghati. Baho nagwe ho kolomanyila vyono, u Mulungu Mono Yalawiliciye yo yatemile mu wutemi wose wa mu wanhu. Kanyhi na vyono yo yadahile kumupela wutemi munhu wo wose mono mwene komuhagula.

²⁶ Na zono Malayika yateye, nha vyono lisina lilekwe mu muhangha. Nhunizo yayo yoyi. Agwe kolowa mutemi kanyhi, wulaza kuwa wakondya kumanya vyono mbeka Mulungu yo yayitemile yinze yose.

²⁷ Holeka Gwe mutemi, nghukunena wibataje nghani yangu yono nghukupela, nghutya nhavi, ‘Wulecele lukulu kwituma wubi, langa wanze kwituma ze ling'ani, kanyhi weze kuwawonela lusungu i waciwa.’ Baho ho kojendelela kwikala viswanu hamonga ne nyemo mu vilo vyose vyo wikale wako.”

²⁸ Zizi zose zikamwijelela mutemi Nebukadineza.

²⁹ Yaza kupuluta myezi yikumi na myejete, lono mwene yajendajendaga mwi'tembe mu kaya yakwe yo wutemi ha Babiloni.

³⁰ Hambi nha yakatya, “Langa ta! Likaya lye citemitemi lya Babiloni vyono yiwaha! Yonene mono nalizenga ho wuwe wikalo wangu wo wutemi. Nane ho nhandaze u wuwaha wangu hamonga no wusume, ne vilungo vyo wutemi wangu.”

³¹ Na lono yali yakali yakuzilonga zinghani zizi, lizi likalongana nayo kulawa ku wulanga likatya, “Mutemi Nebukadineza wuhulicizaje lu, zono nane nghukulonjela! Alu, wakondya kuwusizwa vilungo vyo wutemi wako.

³² Nagwe kowinjilwa lukulu muli wanhu, wukekale ne vilimu vya mu mbago, kanyhi kowa kulya mahanze kotya ng'ombe sunga yipulute myaka mupunghati. Baho nagwe ho komanyila vyono, u Mulungu Mono Yalawiliciye, yo yatemile mu wutemi wose wa mu wanhu, kanyhi na vyono yo yadahile kumupela wutemi munhu wo wose mono mweneco komuhagula.”

³³ Vidaha vicefu du, vyali vyeza kupuluta, zinghani zizi zikejela za mbeka. Nebukadineza yakawingwa mu wanhu, yakawa kulya mahanze kotya ng'ombe. Wubuhe wukamugwila mu muwili wakwe, ne zimvwili zakwe zikawiluka, zikawa zinha mazoya ga numba. Ne makombazala gakwe, gakawa matali kotya nha ga ndeje.

Nebukadineza yakumukumya Mulungu

³⁴ Mutemi yakatya, “Na lono myaka mupunghati yali yakondya kupuluta, nghenula meso gangu kucanyha, ne mahala gangu gakambuyila kanyhi, nghamulumba Mulungu Mono Yalawiliciye, nghamupela lilumbo no lukumyo mwene mono kekalaga cibitilila. “Mwene kolotema cibitilila. No wutemi wakwe hamba siwuladuma yaye.

³⁵ Mono yakuwalanga wanhu wa mono yinze kotya si cinji, Wamalayika ku wulanga ne wanhu wose wa kono'nze, wali mu wutonji wakwe. Hamba hasina yunji mono kobena wulajilize wakwe hamba kuziwuza zono mwene ketumaga.

³⁶ “Na mwi'pango lilyo, mahala gangu gakambuyila kanyhi, hamonga ne lilumbo lyangu, no wutemi wangu, hamonga no lukumyo lo wutemi wangu, vyose vikambuyila. I wetumami wangu, hamonga ne wanhu we mahala wakambocela. Hobaho nghapegwa vilungo vyo wutemi, nawo wutemi wukawa ne vilungo ne lilumbo kuciza na ha mwamulizo.

³⁷ Nene Nebukadineza, nghumulumbiza no kumupela cogopo, hamonga no lukumyo, u mutemi wa ku wulanga. Hambi zose zono ketumaga, nha za mbeka, kanyhi ze ling'ani. Kanyhi yo kamunyetyaga munhu wo wose mono yakwikumya.”