Philippians 3 - Lakota Portions

¹ Mitakuyepi, ehakela leṗa waċiƞ, Wak̇aƞṫaƞka niyuhapi ki heuƞ iyokipiiċ'iyapo. Ehaƞni wowapi waƞ leċel c̄iċiċaġapi eyaṡ ake piya eṗiƞ kte ki he tok̇a ṡni. Eċiƞ lena woiyaksape iniwaṡtepi kte.

² Oyate eya takuƞni itok̇api ṡni sʹe niuƞpi hena etaƞ iwaktaya opii'ċiyapo. Wiċaṡa oḣ'aƞ ṡiċapi na taku siċa eċaniċiuƞ ċiƞpi na wanihuƞhuƞpi kte.

³ Eyaṡ uƞkiyepi ċa wak̇aƞyaƞ ċeḣpi wawiċaksapi woeċuƞ ki he uƞkʹupi, eċiƞ Woniya Wak̇aƞ ki iyoḣlogya Wak̇aƞṫaƞka ċeuƞkiyapi na Christ Jesus uƞyuonihaƞpi. Na taku eċuƞkʹuƞpi ki hena uƞ uƞkiglataƞtaƞpi kte ṡni,

⁴ ogna taku heċel eċamuƞ ki hena uƞ miglataƞ owakihi tk̇a seċe, eyaṡ tukṡa uƞma ki hena heċel waiglataƞtaƞpi kte.

⁵ Miye wamak̇aƞyeja waƞ hehaƞ aƞpetu ṡagloġaƞ el wak̇aƞyaƞ woeċuƞ waƞ ċeḣpi wawiċaḣlayapi eyapi ċa hel miċiyuṡtaƞpi, na Israel oyatepi ki hemataƞhaƞ na Benjamin ṫaoyate hemataƞhaƞ. Hebrew ḣc̄a hemaċa. Pharisee ṫawowiċalapi ki iyeċel wiċawala, na Moses ṫawooṗe ki sutaya ahowaṗe.

⁶ Na heuƞ lila miglawa ki uƞ ok̇olakiċiye wak̇aƞ ki iyotiyekiye wiċawakiye. Wak̇aƞṫaƞka tokel owakaḣniġe ki he iyeċel taku wooṗe el owapi ki hena iyuha eċel eċamuƞ.

⁷ Eyaṡ Christ waablesmakiye, taku waƞ ṫokahewakiye ki he yatakuni ṡni.

⁸ Christ Jesus Iṫaƞċaƞ ki slolyapi ki he eċela waṡte. Taku wiċawala tk̇a waƞ hena iyuha abluṡtaƞ na hehaƞya takuƞni waye ṡni. Heċel Christ kiċi ṫaoye ogna mawani kte

⁹ na he unnṡimala ki slolwakiyiƞ kte. Moses ṫawooṗe ki ahowaṗe uƞ Wak̇aƞṫaƞka uƞṡimala kta miṫawaċiƞ. Christ wiċawala ki heuƞ Wak̇aƞṫaƞka uƞṡimala.

¹⁰ Christ ṫawowiċala ki he eċela slolwaya waċiƞ na Wak̇aƞṫaƞkawowaṡʹake waƞ uƞ wiċuƞtʹe etanhaƞ yukinipi ki he nakuƞ slowaya waċiƞ. Tokeṡke kakijiƞ na tʹe ki he iyeċel miṡʹeya matʹiƞ kte,

¹¹ ċa he tokel yukinipi ki he iyeċel miṡʹeya mayukinipi kte.

¹² Woyuṡtaƞ waƞ miċihaƞ ċa awaċami eyaṡ nahaƞḣc̄i iwahuƞni ṡni, . Eyaṡ Christ napimayuze. Ċa iyaƞkapi akiċiyapi el ohaƞ heċena iyotiyekiya wauƞ, taku waƞ ihaƞkeya waṡte ki he ohiwaya waċiƞ ki heuƞ.

¹³ Mitakuyepi, nahaƞḣc̄i woohiye ki he ohiwaye ṡni ki slolwakiye. Eyaṡ hektakiya ewaƞtuƞwe ṡni, na taku ṫokatakiya he ki etkiya ṡkiƞmiċ'iye.

¹⁴ Wasabgle waƞ he ki he etkiya ṡkiƞmiċ'iye, heċel maḣpiya ta woohiya waƞ he ki he ohiwayiƞ kte. Christ Jesus taku waƞ yuṡtaƞ egnake ki heuƞ Wak̇aƞṫaƞka woohiye ki le kaġe.

¹⁵ Tuwe ksabya wiyukcaƞpi ki hena waƞjilakiya leċel iyukcaƞpi kte iyeċetu. Na tuwe ṫogye wiyukcaƞ haƞtaƞnaṡ, Wak̇aƞṫaƞka leċel ablesnikiyiƞ kte.

¹⁶ Eyaṡ oaye ki hetaƞ kawiƞġe ṡni uƞyaƞpi kte.

¹⁷ Mitakuyepi, tokel wauƞ ki he iwaƞmayaƞkapi na iyeċel igluhapo, na etaƞ heċel uƞpi kʹuƞ hena nakuƞ ṫaoye ki ogna uƞpo.

¹⁸ Oyate eya iċiḣmeya igluhapi na Christ ċaƞiċ'ipaweġa waƞ el ktepi ki he wiċalapi ṡni, hena eċa ake iṡtamniyapi kiċ'uƞyaƞ iwaktaċiyapi

¹⁹ hena tuktel wiċotakuƞni ṡni waƞ yaƞka ċa ekta yapi. Iyeawaiċ'iyukc̄aƞpi na taku imnaiċ'iyapi kte ki hena eċela olepi. Mak̇a el wotakuƞni ṡni ki hena eċela awaiyukc̄aƞ uƞpi.

²⁰ Eyaṡ uƞkiye maḣpiya eċiyataƞhaƞ Wanikiya waƞ u kte ki he aṗe uƞkʹuƞpi. Iṫaƞċaƞ uƞkiṫawapi Jesus Christ

²¹ he taku ki iyuha oiṫaƞċaƞ yaƞke, uƞṫaƞċaƞpi ki uƞzaƞnipi ṡni eṡa iye oṫaƞṫuƞya uƞ ki iyeċel uƞṫaƞċaƞpi ki kaġiƞ kte.