Luke 20 - Lakota Portions

Jesus Waeċuƞ Ki Wowaṡʹake He Ṫaƞtaƞhaƞ

¹ Aƞpetu waƞji el, Jesus Tipi-Wak̇aƞ* el oyate ki wauƞspewiċakiyiƞ na woṫaƞiƞ-waṡte ki wahokuƞwiċakiye. Yuƞk̇aƞ waċekiye-wiċaṡa-oiṫaċaƞpi ki na Moses-ṫawooṗe-awaƞyaƞkapi ki hena

² Jesus iyopaṡtakapi, “Ho, uƞkokiyakapo, waeċanu ki lena Wak̇aƞṫaƞka e na iƞṡ wiċaṡa ċa wowaṡʹake nicʹu hwo?” eyapi.

³ Jesus leċel awiċayupte, “Miṡ-eya wiċiyuƞġapi kte,

⁴ John mniawiċakaṡtaƞ ki he Wak̇aƞṫaƞka e na iƞṡ wiċaṡa ċa wowaṡʹake kʹu hwo?”

⁵ Le okiċijijipi na heyapi, “Wak̇aƞṫaƞka eċa wowaṡʹake kʹu uƞkeyapi haƞtaƞṡ hehaƞl leċel uƞkiyuƞġapi ktelo. Ċa takuwe John waeye ki wic̄ayalapi ṡni hwo?” eyapi.

⁶ “Wiċaṡa ċa John wowaṡʹake kʹu uƞkeyapi haƞtaƞṡ oyate ki wiċauƞyuċaƞzekapi ki iƞyaƞ uƞ uƞkatʹapi ktelo. Eċiƞ oyate ki John wiċaṡa-wak̇aƞ-waayaṫaƞiƞḣc̄a heċa ċa wic̄alapi.”

⁷ Ċa Jesus leċel ayuptapi, “John mniawiċakaṡtaƞ wowaṡʹake ki le tuwa kʹu ki sloluƞyapi ṡni yelo,” eyapi.

⁸ Jesus awiċayupte, “Ċa miṡ-eya waeċamu ki le tokiyataƞhaƞ wowaṡʹake iwac̄u ki oċic̄iyakapi kte ṡni yelo,” eye.

Ċaƞwiyapehe Owoju Olotapi Ki Wiċoyake

⁹ Na ake Jesus leċel owiċakiyake, “Wiċaṡa waƞ ċaƞwiyapehe eya oju na huƞḣ owoju ki owiċakʹu. Ho na mak̇a ṫehaƞl iyaye.

¹⁰ Ċaƞwiyapehe ki waṡteṡte hehaƞ ṫawowaṡi waƞ ekta waskuye ki huƞḣ wiċaiju ikipiya hiyoyekiye. Ho eyaṡ, owoju olotapi ki aṗapi na wiċaiju ċola kigleyapi.

¹¹ Ċa ṫawowaṡi ic̄inupa waƞ ekta yekiye eyaṡ he iƞṡ-eya, naṗeyapi.

¹² Ċa ṫawowaṡi ic̄iyamni waƞ ekta yekiye eyaṡ he nakuƞ uƞṫuƞyaƞpi na naṗeyapi.

¹³ Tokeṡke eċuƞ kte ki taƞyaƞ iglukc̄aƞ, ‘Miċiƞkṡi yewakiyiƞ kte. Teweḣila ċa ogna anaġoptaƞpi kte sec̄e,’ eċiƞ.

¹⁴ Waƞyaƞkapi hehaƞ, tokeṡke hehaƞl eċuƞpi kte ki iwoglakapi, ‘Le ċaƞwiyapehe owoju ki ṫokata owaja kta ċa waƞċeyaṡ uƞktepi haƞtaƞṡ uƞkiṫawapi ktelo,’ eyapi.

¹⁵ Ċa owoju etaƞhaƞ iṡiƞkċiƞ eyayapi na ktepi.” Jesus leċel oyate ki owiċakiyake. Na hehaƞl iwiċayuƞġe, “Owoju ṫawa ki wiċaṡa lena tokeṡke owiċakuwa kta hwo?” eye.

¹⁶ “Ku na wiċaṡa lena wiċakte kte yelo. Na tuwa ṫokc̄a owoju ki owiċakʹu ktelo,” eye. Oyate ki le naḣʹuƞpi hehaƞ, “Wak̇aƞṫaƞka taku ki lena tohaƞni heċetulakiƞ kte ṡni,” eyapi.

¹⁷ Jesus awiċayuta na iwiċayuƞġe, “Leċetu kte ṡni hec̄i, takuwe Wowapi-Wak̇aƞ el leċeḣc̄i owa yaƞka hwo? Iƞyaƞ waƞ uƞ tikaġapi ki ċiƞpi ṡni na ḣeyab iḣpeyapi waƞ he eċa oihaƞke ekta ihaƞkeya iwaċiƞyapi.

¹⁸ Iyeċeḣc̄iya tuwa iƞyaƞ ki paḣeyab iyeya haƞtaƞṡ oteḣi slolyiƞ kte.”

Waḣpa Wokaijupi Ṫaƞtaƞhaƞ

¹⁹ Waċekiye-wiċaṡa-oiṫaċaƞpi na Moses-ṫawooṗe-awaƞyaƞkapi waƞ lena waƞc̄agna Jesus oyuspewiċakiya ċiƞpi, ċiƞ woyake ki le iye ċa iwowiċaglake ki akiblezapi. Ho eyaṡ oyate ki k̇owiċakiṗapi heuƞ waƞc̄agna oyuspe waċiƞpi ṡni.

²⁰ Kiyela awaƞyaƞkapi na huƞḣ oiye ic̄u kuƞzapi kta ċa kaisakib opiicʹiyewiċakiyapi. Na Jesus waeye ki ogluṡic̄iƞ kta waktapi. Oyuspapi na Rome oiṫaċaƞḣc̄a ki ekta ayapi kta awaċiƞpi.

²¹ Oiye ic̄u kuƞzapi waƞ hena Jesus wiyuƞġapi. “Wauƞspekiya, tuweni iyakiye ṡni eyaṡ Wak̇aƞṫaƞka ṫawowic̄ak̇e ki eċa olaka ċa sloluƞyapi.

²² Uƞkokiyakapo, waḣpa-wokaiju ki hena Mak̇asitomniya-Yataƞpi ki uƞkic̄aijupi kta hwo?”

²³ Ogluṡilkiyapi kteḣc̄iƞ ki akibleziƞ na heye,

²⁴ “Kaṡpapi (Mazaska) waƞji makipazopo. Tuwa ṫaċaje na itowapi ki aik̇owaka hwo?” “Mak̇asitomniya-Yataƞpi ki e,” eya ayuptapi.

²⁵ Hehaƞl Jesus iwiċayaksape, “Mak̇asitomniya-Yataƞpi ki taku ṫawa ki hena kiċupi na Wak̇aƞṫaƞka iƞṡ-eya taku ṫawa ki kiċupo,” eye.

²⁶ Oiṫaċaƞ ki Jesus, oyate wiċiṫokab ogluṡilkiyapi okihipi ṡni. Ksabya waeye ki lila iyuṡʹiƞyayapi ċa isam takuni eyapi ṡni.

Wiċatʹa Etaƞ Kinipi Ṫaƞtaƞhaƞ

²⁷ Sadducee oyate hena eċa Jesus ogluṡilkiyapi ċiƞpi ċa wiyuƞġapi. Wiċaṡa ki lena, Wak̇aƞṫaƞka oyate ki wiċuƞtʹe etaƞhaƞ wiċayukini ki he wic̄alapi ṡni.

²⁸ Ċa hekiyapi, “Wauƞspekiya, Moses leċel wowa ċa Jew oyate ki aiyeċel eċuƞkʹuƞpi kte: Wiċaṡa ṫawic̄uṫuƞ waƞji ċiƞc̄a ċola tʹa haƞtaƞṡ suƞkaku ki wiwazic̄a ki yuziƞ na hokṡila waƞji he tʹe ki he kic̄iyuhapi ktelo.

²⁹ Leċeḣc̄i Jesus yaijina waċiƞpi: Wiċaṡa waƞ suƞkaku ṡakpe. Ṫokaṗa ki ṫawic̄uṫuƞ eyaṡ wak̇aƞyeja wiċayuha ṡnihaƞni tʹe.

³⁰ Ċa iyokiheya ki wiwazic̄a ki le yuze yuƞk̇aƞ iƞṡ hehaƞl tʹe.

³¹ Ċa ic̄iyamni ki hehaƞl wiƞyaƞ ki le yuziƞ na iƞṡ-eya tʹe.

³² Heċeḣc̄i, ṡakowiƞpi ki iyuha wiċoni ayuṡtaƞpi. Na hehaƞl wiƞyaƞ ki ehakeḣc̄i wiċoni ayuṡtaƞ.

³³ Ċa Wak̇aƞṫaƞka wiċayukini kta haƞtaƞṡ ṡakowiƞ ki niuƞpi eċuƞhaƞ iyuha hiƞgnawiċaye ċa tukte waƞji hiƞgnaku kta hwo?” eyapi.

³⁴ Jesus leċel awiċayupte, “Mak̇a akaƞ wiċoni ki le, oyate ki kiċiyuzapi sʹa.

³⁵ Ho eyaṡ, Wak̇aƞṫaƞka tuwaoka ikipipi hena wiċayukini ki ohaƞ kiċiyuzapi wanic̄iƞ kte.

³⁶ Ogligle iyeċel tohaƞni tʹapi kte ṡni, Wak̇aƞṫaƞka ċiƞc̄api ktelo.

³⁷ Moses e kʹeyaṡ wiċuƞtʹe etaƞhaƞ kinipi ki iwoglake, Wak̇aƞṫaƞka ċaƞ woḣeṡma waƞ oile ki etaƞhaƞ wokiyaka hehaƞ. ‘Abraham e na Isaac e na Jacob ehaƞni tʹapi eyaṡ heċena Wak̇aƞṫaƞkayapi,’ keye.

³⁸ Uƞkiṫaċaƞpi ki mak̇a ṡina uƞkiyapi eyaṡ uƞkiṫanaġi ki heċena niuƞ. Hognayaƞ, Wak̇aƞṫaƞka ṫaoyate ki niuƞpi na Wak̇aƞṫaƞkayapelo,” eye.

³⁹ Wooṗe-awaƞyaƞkapi ki Jesus hekiyapi, “Wauƞspekiya, lila taƞyaƞ awiċalupte yelo,” eyapi.

⁴⁰ Hehaƞya tuweni isam Jesus wiyuƞġe ṡni.

Messiah Ki Ṫaƞtaƞhaƞ

⁴¹ Jesus anaġoptaƞpi ki hena iwiċayuƞġe, “Tokeṡke oyate ki Messiah he David wiċoiċaġe waƞji keyapi okihipi hwo?

⁴² Wiċaṡa-Yataƞpi David e kʹeyaṡ ṫaolowaƞ ki el leċel owa egnake: Wak̇aƞṫaƞka eċa Iṫaċaƞ miṫawa Messiah hekiye, “Miiṡlayataƞhaƞ yuonihaƞya el iyotaka yo,” eye.

⁴³ “Ṫokawiċaya ki hena wiċawakaṡtakiƞ na uƞṡiicʹiyawiċawakiyiƞ ktelo,” eye.

⁴⁴ Wiċaṡa-Yataƞpi David eċa Messiah he Iṫaċaƞ keyelo. Ho ċa tokeṡke nakuƞ David ṫakojakpaku okihi hwo?” eye.

Jesus E Na Wooṗe Awaƞyaƞke Ki

⁴⁵ Oyate naḣʹuƞ najiƞpi ki eċuƞhaƞ ihakab-uƞpi ki hewiċakiye,

⁴⁶ “Moses-ṫawooṗe-awaƞyaƞkapi ki hena wiċiḣeyab eċuƞpo. Owiċota ohaƞ ogle haƞskaska uƞ ikpazo omani waṡtelakapi. Na omnic̄iye-tipi timahel na wiċawote el wiċayuonihaƞpi ohaƞ yaƞka ċiƞpi.

⁴⁷ Eyaṡ wiwazic̄a ki ḣmiya tiwiċakipi na k̇ohaƞ woċekiye haƞskaska uƞ ikpazopi. Wiċaṡa ki lena ṡic̄aya waeċuƞpi ki lena uƞ tohaƞyaƞ okihika teḣi slolyapi ktelo.